Il-Komunikazzjoni tqis ir-riżultati konkreti miksuba s’issa permezz tal-ispinta doppja bla preċedent tal-RRF għal riformi u investimenti ekoloġiċi u diġitali fl-Istati Membri. Jiddeskrivi wkoll passi ulterjuri biex tiġi appoġġata l-implimentazzjoni kontinwa b’suċċess tal-pjanijiet nazzjonali għall-irkupru u r-reżiljenza. L-Annessi tal-Komunikazzjoni jiċċaraw ċerti aspetti tekniċi tal-mod li bih il-Kummissjoni tivvaluta l-progress tal-Istati Membri.
Ursula von der Leyen, il-President tal-Kummissjoni Ewropea, qalet:
“Il-pjan ta’ rkupru tagħna NextGenerationEU sar saħansitra aktar minn rispons vitali għall-pandemija tal-COVID-19. Sentejn wara l-ħolqien tal-fond, diġà żborżajna aktar minn EUR 140 biljun u ssuperajna l-miri ta’ investiment inizjali tagħna għat-tranżizzjonijiet ekoloġiċi u diġitali. Issa, bl-invażjoni brutali tal-Ukrajna mir-Russja u kriżi globali tal-enerġija, il-fond sar element ewlieni tal-Pjan Industrijali tal-Patt Ekoloġiku tagħna. Dan se jappoġġa lill-Istati Membri tagħna fit-triq lejn żero netti, bl-ispinta finanzjarja addizzjonali tar-REPowerEU. NextGenerationEU wera li huwa strument kapaċi biex jindirizza ħafna sfidi differenti li l-Unjoni tagħna qed tiffaċċja. Ir-riformi trasformattivi permezz tal-pjanijiet nazzjonali ta’ rkupru tal-Istati Membri huma kruċjali biex nimmodernizzaw u nsaħħu l-Unjoni Ewropea tagħna. L-implimentazzjoni rapida għandha tkompli.”