An cruinniú deiridh den idirphlé maidir le rochtain ar ábhar closamhairc agus maidir le hinfhaighteacht an ábhair sin ar fud an Aontais

Ba dhíol sásaimh don Choimisiún an méid a chuir eagraíochtaí na bpáirtithe leasmhara isteach, agus ag an am céanna d’aithin sé raon feidhme leathan agus easpa nithiúlachta cuid de na rannchuidithe. Dá bhrí sin, mhol an Coimisiún an plé a dhíriú ar líon teoranta tograí, agus a n-ábharthacht agus a mbreisluach Eorpach á gcur san áireamh. 

Ag cur leis na tograí sin, phléigh an Coimisiún an bealach chun cinn leis na rannpháirtithe agus shainaithin sé réimsí le haghaidh gníomhaíochtaí na ngeallsealbhóirí: ar an gcéad dul síos, comhar a neartú ar fud an tslabhra luacha d’fhonn saothrú scannán ar líne a éascú; ar an dara dul síos, cleachtais nuálacha a fhorbairt maidir le rochtain trasteorann ar scannáin chatalóige chun a luach cultúrtha agus a nochtadh do shaoránaigh an Aontais a mhéadú; agus ar deireadh feabhas a chur ar bhailiú sonraí maidir le scannáin a fhaigheann maoiniú poiblí. D’áitigh an Coimisiún ar rannpháirtithe gníomhaíochtaí nithiúla a dhéanamh sna réimsí sin, gníomhaíochtaí a bhféadfaí tacaíocht airgeadais a thabhairt dóibh trí ghlaonna atá le teacht faoin tsraith MEDIA d’Eoraip na Cruthaitheachta.

Deimhníodh san idirphlé freisin gur cheart infhaighteacht ábhair chlosamhairc a mheasúnú i gcomhthéacs margaidh níos leithne, agus an t-éileamh ar inneachar den sórt sin agus infhionnachtain an ábhair sin á chur san áireamh. Sa tuarascáil ón gCoimisiún atá ar na bacáin maidir le margaí na meán, an tIonchas do na Meáin, tabharfar léargais ní hamháin ar infhaighteacht, ach ar iompraíocht agus ar shainroghanna lucht féachana agus éisteachta, lena n-áirítear infhionnacht. Is féidir leis sin cuidiú le machnamh a dhéanamh amach anseo ar conas borradh a chur faoi iomaíochas foriomlán scannáin, sraitheanna agus clár faisnéise an Aontais lasmuigh de mhargaí baile.

Foilseofar tuarascáil achomair ón gcruinniú deiridh go luath.

Cúlra

Mar a fógraíodh sa Phlean Gníomhaíochta Meán agus Closamhairc, d’eagraigh an Coimisiún roinnt cruinnithe le comhlachais ar leibhéal an Aontais a dhéanann ionadaíocht ar ghuthanna éagsúla na hearnála AV, chomh maith le tomhaltóirí, chun bearta nithiúla a phlé agus chun teacht ar chomhaontú maidir le céimeanna nithiúla chun rochtain ar ábhar closamhairc agus infhaighteacht an ábhair sin a chothú ar fud an Aontais. D’iarr an Coimisiún ar na rannpháirtithe go léir gníomhaíochtaí nithiúla a shainaithint agus gealltanas a thabhairt iad a chur chun feidhme. Cé go raibh an t-idirphlé dírithe ar gach saothar closamhairc ar dtús, bhain na tograí go príomha le cúrsaíocht scannán AE.