L-2021 timmarka s-Sena Ewropea tal-Ferroviji — l-inizjattiva tal-Kummissjoni Ewropea tenfasizza l-benefiċċji tal-ferroviji bħala mezz ta’ trasport sostenibbli, intelliġenti u sikur biex jiġi appoġġjat it-twettiq tal-objettivi tagħha tal-Patt Ekoloġiku Ewropew fil-qasam tat-trasport. Iċ-ċibersigurtà hija rekwiżit ewlieni biex il-ferroviji jkunu jistgħu jużaw u jisfruttaw il-firxa sħiħa ta’ paradigma diġitali konnessa.
L-ENISA, l-Aġenzija tal-Unjoni Ewropea għaċ-Ċibersigurtà, u l-ERA, l-Aġenzija tal-UE għall-Ferroviji, ingħaqdu flimkien biex jorganizzaw Konferenza virtwali dwar iċ-Ċibersigurtà Ferrovjarja. Il-Konferenza se tlaqqa’ flimkien esperti biex jiddiskutu l-aħħar żviluppi u l-isfidi taċ-ċibersigurtà li qed jiffaċċja s-settur. L-għan huwa li jitrawwem id-djalogu fost l-organizzazzjonijiet ferrovjarji, dawk li jfasslu l-politika, l-industrija, ir-riċerkaturi, u l-organizzazzjonijiet tal-istandardizzazzjoni u taċ-ċertifikazzjoni.
Il-Konferenza hija maqsuma f’erba’ sessjonijiet, fejn il-membri tal-panel u l-attendenti se jkunu jistgħu jiddiskutu suġġetti differenti:
- L-evoluzzjoni tal-politika
- Standards u ċertifikazzjoni għas-settur ferrovjarju
- Riżultati mir-riċerka u l-innovazzjoni
- Modi kif tiġi kondiviża l-informazzjoni u kif jista’ jkun hemm kooperazzjoni lejn settur ferrovjarju aktar ċibersigur fl-UE.