Il-laqgħa kienet kopreseduta mill-Kummissarju Ewropew għas-Suq Intern, Thierry BRETON, il-Ministru Ġappuniż għat-Trasformazzjoni Diġitali KONO Taro, il-Ministru għall-Affarijiet Interni u l-Komunikazzjoni, MATSUMOTO Takeaki, u l-Viċi Ministru Parlamentari tal-Ekonomija, il-Kummerċ u l-Industrija ISHII Taku.
l-Unjoni Ewropea u l-Ġappun (minn hawn’il quddiem imsejħa “iż-żewġ naħat”) affermaw mill-ġdid l-importanza tas-sħubija strateġika dejjem aktar mill-qrib bejn l-Unjoni Ewropea u l-Ġappun fir-rispett tal-ordni internazzjonali liberu u miftuħ ibbażat fuq l-istat tad-dritt u fil-promozzjoni tal-valuri u l-viżjoni kondiviżi tagħhom għat-trasformazzjoni diġitali inkluż approċċ iċċentrat fuq il-bniedem għat-trasformazzjoni diġitali u r-rispett għad-drittijiet fundamentali. Iż-żewġ naħat evalwaw il-progress mill-ewwel laqgħa tal-Kunsill ta’ Sħubija Diġitali bejn l-Unjoni Ewropea u l-Ġappun (Tokyo, 3 ta’ Lulju 2023) u ħabbru riżultati tanġibbli ġodda. Huma enfasizzaw ukoll l-importanza ta’ involviment aktar b’saħħtu tal-partijiet ikkonċernati inkluż permezz tar-Round Table dwar in-Negozju bejn l-UE u l-Ġappun u inizjattivi ddedikati taċ-Ċentru għall-Kooperazzjoni Industrijali bejn l-UE u l-Ġappun.