Matul id-Djalogu, ġew diskussi aġġornamenti tal-politika u aktar opportunitajiet ta’ kooperazzjoni fl-oqsma tas-semikondutturi, it-teknoloġiji kwantistiċi, il-pjattaformi online, il-governanza tad-data u l-identitajiet diġitali, iċ-ċibersigurtà, kif ukoll l-intelliġenza artifiċjali. Saru wkoll diskussjonijiet dwar il-kooperazzjoni konġunta futura fir-riċerka, inkluż fis-semikondutturi u l-kwantum kif ukoll dwar il-ħidma li għaddejja lejn l-interoperabbiltà ta’ soluzzjonijiet tal-identità diġitali.
Id-Djalogu huwa pjattaforma kruċjali biex jittieħed kont tal-kisbiet u tiġi stabbilita t-triq 'il quddiem għall-kooperazzjoni futura taħt is-Sħubija Diġitali bejn l-UE u l-Ġappun. Dan kien kopresedut minn Thomas Skordas, Viċi Direttur Ġenerali tad-DĠ CNECT, u Toshihiko Shibuya, Direttur Ġenerali Ġappuniż għall-Istrateġija tal-IT tal-METI.
Is-Sħubija Diġitali bejn l-UE u l-Ġappun tnediet fl-2022 biex tavvanza l-kooperazzjoni dwar id-diġitali biex jitrawmu l-innovazzjoni, il-kompetittività u trasformazzjoni diġitali ċċentrata fuq il-bniedem ibbażata fuq valuri komuni. Huwa strument ta' kooperazzjoni flessibbli li jinkludi djalogu u skambju ta' informazzjoni bejn l-UE u l-Ġappun. Dan jagħti eżiti konkreti fil-qasam tas-semikondutturi, il-5G/6G, l-IA, il-pjattaformi online, l-identitajiet diġitali, il-governanza tad-data, il-kwantum, iċ-ċibersigurtà u l-konnettività.
Aqra aktar informazzjoni dwar is-Sħubija Diġitali bejn l-UE u l-Ġappun.