Il-Global Gateway hija l-istrateġija Ewropea l-ġdida biex tingħata spinta lil rabtiet intelliġenti, nodfa u siguri fis-setturi diġitali, tal-enerġija u tat-trasport u biex jissaħħu s-sistemi tas-saħħa, tal-edukazzjoni u tar-riċerka madwar id-dinja. Bejn l-2021 u l-2027, Tim Ewropa, jiġifieri l-istituzzjonijiet tal-UE u l-Istati Membri tal-UE b’mod konġunt, se jimmobilizza sa EUR 150 biljun ta’ investimenti fl-Afrika.
Il-pakkett ta’ investiment il-ġdid Global Gateway Afrikan żvelat fl-okkażjoni tas-sitt Summit UE-UA fi Brussell fis-17 u t-18 ta’ Frar 2022 jippreżenta Inizjattivi konkreti ta’ Tim Ewropa li ser jappoġġaw ambizzjonijiet komuni bejn l-UE u l-UA għall-2030.
Fil-qasam diġitali, il-pakkett se jtejjeb il-konnettività b’sett ta’ Inizjattivi ta’ Tim Ewropa ffukati fuq il-konnessjoni bejn l-Ewropa u l-Afrika permezz ta’ kejbils sottomarini, ir-reġjuni tal-Afrika permezz ta’ backbones tal-fibra ottika u reġjuni mhux moqdija permezz ta’ komunikazzjoni bis-satellita. Se tappoġġa l-ekosistemi tal-innovazzjoni diġitali fil-pajjiżi Afrikani u torbothom mal-ekosistemi tal-innovazzjoni diġitali Ewropej.