iStock photo Getty images plus
Barra minn hekk, bħala l-ewwel sistema fl-Ewropa li tikseb prestazzjoni fuq skala eksa, jiġifieri l-kapaċità li jiġu eżegwiti aktar minn biljun biljun kalkolu kull sekonda, se tqiegħed lill-UE bħala mexxejja dinjija fis-supercomputing. Appoġġat minn kontribuzzjoni totali tal-UE ta’ EUR 500 miljun, is-superkompjuter il-ġdid se jkun lokalizzat u operat miċ-Ċentru tas-Supercomputing ta’ Jülich (JSC) fil-Ġermanja.
Wara l-installazzjoni u t-twaqqif tagħha fix-xhur li ġejjin, is-sistema JUPITER hija mistennija li tkun aċċessibbli għal firxa wiesgħa ta’ utenti Ewropej minn tmiem l-2024. Dan se jgħin lir-riċerkaturi tas-supercomputing jagħmlu skoperti xjentifiċi u jikkontribwixxu biex jinstabu soluzzjonijiet fil-monitoraġġ tat-tibdil fil-klima, l-iskoperta tad-drogi u tal-materjali, u l-ħtieġa għal sistemi aħjar ta’ rispons f’każ ta’ emerġenza. Il-konfigurazzjoni ta’ superkompjuter addizzjonali ta’ livell medju, Daedalus, tinsab għaddejja fil-Greċja, filwaqt li t-tieni superkompjuter fuq skala eksa tal-EuroHPC huwa mistenni li jiġi ospitat fi Franza fl-2025.
Kif imħabbar mill-President von der Leyen fid-diskors tagħha dwar l-Istat tal-Unjoni tal-2023, dawn il-magni se jkunu disponibbli għan-negozji ġodda tal-Intelliġenza Artifiċjali (IA) biex iħarrġu l-mudelli tagħhom, iqassru b’mod sostanzjali l-ħinijiet tal-iżvilupp, u jaċċelleraw l-użu ta’ teknoloġiji u algoritmi bbażati fuq l-IA f’oqsma kritiċi, bħat-tbassir estrem tat-temp, ir-rikostruzzjoni tal-infrastruttura, u s-Saħħa elettronika. Dan se jikkontribwixxi għall-għan tal-UE li tmexxi l-isforzi globali fl-IA u tikseb innovazzjoni responsabbli u etika.
Jupiter se jingħaqad mas-superkompjuters eżistenti tal-Impriża Konġunta EuroHPC li diġà qed topera: Discoverer fil-Bulgarija, MeluXina fil-Lussemburgu, Vega fis-Slovenja, Karolina fiċ-Ċekja, LEONARDO fl-Italja, LUMI fil-Finlandja u Deucalion fil-Portugall. It-tielet superkompjuter Ewropew fuq skala pre-eksa MareNostrum5 fi Spanja se jiġi inawgurat fix-xhur li ġejjin.