L-esperti qed jippjanaw li jiddokumentaw l-għeluq tal-Internet u l-effetti tagħhom fuq is-soċjetà kemm jista’ jkun malajr u b’mod komprensiv. Il-ħolqien tal-grupp ġie ffaċilitat mill-Kunsill tal-Kummerċ u t-Teknoloġija (TTC) bejn l-Istati Uniti u l-UE.
Matul dawn l-aħħar snin l-għeluq tal-Internet impost mill-gvern kien qed jikber fil-kwantità u fis-sofistikazzjoni madwar id-dinja. Fl-avveniment ta’ tnedija ta’ dan il-grupp il-ġdid, l-Unjoni Ewropea u l-Istati Uniti tennew it-tħassib tagħhom dwar din il-prattika dejjem aktar stabbilita li tirrappreżenta ksur sfaċċat tad-drittijiet tal-bniedem.
Il-grupp il-ġdid ta’ esperti tekniċi se juża d-data disponibbli biex janalizza b’mod robust kif, meta u fejn iseħħ l-għeluq. Il-grupp se janalizza wkoll l-impatti soċjoekonomiċi tal-għeluq. L-UE se tkun qed tibbaża fuq is-sejbiet ta’ dan ir-rapport u ta’ dawk futuri fil-ħidma diplomatika u teknika tagħha.
Fl-avveniment ta’ tnedija li għalih attendew dawk li jfasslu l-politika, is-soċjetà ċivili u l-partijiet ikkonċernati tas-settur privat, il-grupp ippreżenta l-ewwel rapport rivoluzzjonarju tiegħu, "Rapporttekniku b’diversi partijiet ikkonċernati dwar l-għeluq tal-Internet: Il-każ tal-Iran fost il-protesti tal-ħarifa tal-2022”.
Ir-rapport jipprovdi stampa komprensiva ta’ kif il-gvern tal-Iran għalaq l-Internet b’mod konsistenti f’dawn l-aħħar xhur u jitfa’ dawl fuq l-impatti prattiċi u ekonomiċi tal-miżuri ta’ ċensura.