iStock Photo Getty Images +
Din il-leġiżlazzjoni l-ġdida tipprovdi salvagwardji kontra l-indħil politiku fid-deċiżjonijiet editorjali u kontra s-sorveljanza tal-ġurnalisti. l-Att jiggarantixxi li l-midja tista’ topera b’mod aktar faċli fis-suq intern u online. Barra minn hekk, ir-regolament għandu wkoll l-għan li jiżgura l-indipendenza u l-finanzjament stabbli tal-midja tas-servizz pubbliku, kif ukoll it-trasparenza kemm tas-sjieda tal-midja kif ukoll tal-allokazzjoni tar-reklamar tal-istat.
Il-Viċi President għall-Valuri u t-Trasparenza, Věra Jourová, qalet:
“Għall-ewwel darba, l-UE għandha liġi li tipproteġi l-libertà tal-midja. l-UE tirrikonoxxi li l-ġurnalisti għandhom rwol essenzjali għad-demokrazija u għandhom jiġu protetti. Nappella lill-Istati Membri biex jimplimentaw ir-regoli l-ġodda malajr kemm jista’ jkun.”
Il-Kummissarju għas-Suq Intern, Thierry Breton, żied jgħid:
“Il-kumpaniji tal-media għandhom rwol vitali fid-demokraziji tagħna iżda qed iħabbtu wiċċhom ma’ tnaqqis fid-dħul, theddid għal-libertà u l-pluraliżmu tal-media u taħlita ta’ regoli nazzjonali differenti. Bis-saħħa tal-Att Ewropew dwar il-Libertà tal-Media, il-kumpaniji tal-media se jgawdu salvagwardji komuni fil-livell tal-UE biex jiggarantixxu pluralità ta’ vuċijiet u jkunu jistgħu jibbenefikaw aħjar mill-opportunitajiet li joperaw fis-suq uniku tagħna mingħajr ebda interferenza, kemm jekk privati kif ukoll pubbliċi.”
Propost mill-Kummissjoni f’Settembru 2022, dan ir-Regolament jistabbilixxi diversi protezzjonijiet għad-dritt għall-pluralità tal-midja li jsiru applikabbli fi żmien 6 xhur. Aktar dettalji dwar l-iskeda ta’ żmien għall-applikazzjoni tiegħu huma disponibbli f’din l- infografika. Aktar informazzjoni dwar l-azzjoni tal-Kummissjoni biex tiddefendi l-libertà u l-pluraliżmu tal-media u s-sikurezza tal-ġurnalisti hija disponibbli wkoll online.
Tista’ taqra aktar dwar il- libertà u l-pluraliżmu tal -midja.