European Commission
Dibattitu dwar it-tħejjija fil-ġlieda kontra t-theddid għaċ-ċibersigurtà jniedi l-kampanja llum fil-Parlament Ewropew.
Il-kampanja ta’ dinis-sena tindirizza l- “inġinerija soċjali”, fenomenu li qed jikber fejn scammers jippruvaw jimmanipulaw lin-nies biex iwettqu azzjonijiet online jew jagħtu informazzjoni sensittiva u/jew personali li mbagħad tintuża għal raġunijiet malizzjużi. Ix-xenarju ta’ Theddid ippubblikat mill-Aġenzija tal-Unjoni Ewropea għaċ-Ċibersigurtà (ENISA) sab li l-phishing sar l-aktar theddida komuni biex jinkiseb aċċess għal organizzazzjoni. Ladarba l-aggressuri jkollhom aċċess għal ġewwa ta’ organizzazzjoni, jistgħu jitwettqu aktar attakki bħal ransomware.
Margaritis Schinas, il-Viċi President għall-Promozzjoni tal-Istil ta’ Ħajja Ewropew Tagħna, qal:
Ix-xahar Ewropew taċ-Ċibersigurtà għandu l-għan li jżid is-sensibilizzazzjoni tagħna dwar iċ-ċibersigurtà u jħaffef il-pass mat-theddid ċibernetiku. Ifakkarna li faċilment nistgħu nsaħħu ċ-ċibersigurtà tagħna stess billi nsiru midħla ta’ xi drawwiet diġitali tajbin. Billi nkunu attenti kontra scammers nistgħu nibqgħu sikuri.
Thierry Breton, il-Kummissarju għas-Suq Intern żied jgħid:
L-iscammers qed isiru aktar kreattivi fil-modi tagħhom kif jattakkaw individwi u organizzazzjonijiet. Għalhekk huwa essenzjali li nibqgħu attenti b’teknoloġija ġdida u li s-sikurezza online tagħna tittieħed bis-serjetà ħafna. It-theddid ċibernetiku qed jevolvi b’pass mgħaġġel u l-imġiba taċ-ċittadini jista’ jkollha rwol fundamentali fil-mod kif nibqgħu ċibersiguri — hija r-responsabbiltà kondiviża tagħna.
Ix-xahar Ewropew taċ-Ċibersigurtà huwa organizzat mill-ENISA, il-Kummissjoni u l-Istati Membri tal-UE b’avvenimenti li jsiru madwar l-Ewropa matul ix-xahar ta’ Ottubru. Matul ix-xahar, se jiġi promoss ukoll l-aktar materjal promozzjonali innovattiv u ta’ suċċess prodott mill-Istati Membri tal-UE matul is-snin.