Treoir maidir le bearta le haghaidh ardleibhéal comhchoiteann cibearshlándála ar fud an Aontais (Treoir NIS2) - Ceisteanna Coitianta

Is í Treoir NIS – an chéad dlí cibearshlándála de chuid an Aontais – an chéad ionstraim chothrománach de chuid an mhargaidh inmheánaigh arb é is aidhm di feabhas a chur ar athléimneacht córas gréasán agus faisnéise san Aontas i gcoinne rioscaí cibearshlándála. D’ainneoin na n-éachtaí suntasacha atá bainte amach aici, tá teorainneacha áirithe léirithe ag Treoir NIS. Tá claochlú digiteach na sochaí, atá treisithe ag géarchéim COVID-19, tar éis timpeallacht na bagartha a leathnú. Tá dúshláin nua tagtha chun cinn, a dteastaíonn freagairtí oiriúnaithe agus nuálacha ina leith.

Chun a bheith in ann anailís a dhéanamh ar an tionchar agus easnaimh Threoir NIS a shainaithint, rinne an Coimisiún comhairliúchán fairsing le páirtithe leasmhara. Shainaithin an Coimisiún na príomh-shaincheisteanna seo a leanas:

• leibhéal neamhleor cibear-athléimneachta na ngnólachtaí atá ag feidhmiú san Aontas
• athléimneacht neamhréireach ar fud na mBallstát agus na n-earnálacha
• comhthuiscint neamhleor ar na príomhbhagairtí agus na príomhdhúshláin i measc na mBallstát
• easpa freagairt chomhpháirteach ar ghéarchéimeanna.

Mar thoradh air sin, agus chun freagairt do na bagairtí atá ag dul i méid mar gheall ar dhigitiú agus idirnascthacht, i mí na Nollag 2020 mhol an Coimisiún tacar athbhreithnithe rialacha a sheasfaidh an aimsir arb é is aidhm dóibh leibhéal na cibear-athléimneachta san Aontas a neartú, ar tháinig na comhreachtóirí ar chomhaontú polaitiúil ina leith an 13 Bealtaine 2022 agus ar ghlac siad an Treoir nua go foirmiúil go déanach i mí na Samhna 2022.

Ó bhí géarchéim COVID-19 ann, tá geilleagar na hEorpa ag brath níos mó ná riamh ar réitigh dhigiteacha. Tá earnálacha agus seirbhísí ag éirí níos idirnasctha agus níos idirspleáiche. Mar thoradh air sin, tá timpeallacht bhagartha cibearshlándála ag fás agus ag athrú go tapa: d’fhéadfadh éifeachtaí cascáideacha níos leithne a bheith ag aon suaitheadh, fiú suaitheadh a bhí teoranta d’eintiteas amháin nó d’earnáil amháin ar dtús, rud a d’fhéadfadh a bheith ina chúis le tionchair dhiúltacha fhorleathana agus fhadtéarmacha ar sholáthar seirbhísí ar fud an mhargaidh inmheánaigh ina iomláine.

Léirigh paindéim COVID-19 leochaileacht ár sochaithe atá ag éirí níos idirspleáiche i bhfianaise rioscaí gan choinne. Chuir sé dlús leis na saincheisteanna atá ag teacht chun cinn cheana féin sa Treoir NIS atá ann faoi láthair agus bhí sé ina chatalaíoch dá hathbhreithniú. Athrú nithiúil ar Threoir NIS i bhfianaise na géarchéime seo ba ea raon feidhme na Treorach nua a leathnú, lena gcumhdaítear gnéithe níos sonraí in earnáil na sláinte, amhail eintitis a dhéanann gníomhaíochtaí taighde agus forbartha ar tháirgí íocshláinte.

Le Treoir NIS2, cuirtear bearta dlíthiúla ar fáil chun borradh a chur faoi leibhéal foriomlán na cibearshlándála san Aontas, chun rannchuidiú le feidhmiú foriomlán an mhargaidh inmheánaigh. Cuireann sé leis na trí phríomhcholún a bhí mar bhonn le Treoir NIS1:

1. Ag tógáil ar straitéis NIS1 maidir le slándáil córas gréasán agus faisnéise, chun ardleibhéal ullmhachta na mBallstát a bhaint amach, ceanglaítear le Treoir NIS2 ar na Ballstáit straitéis náisiúnta chibearshlándála a ghlacadh. Ceanglaítear ar na Ballstáit freisin Foirne Freagartha náisiúnta do Theagmhais a bhaineann le Slándáil Ríomhairí (CSIRTanna), atá freagrach as láimhseáil riosca agus teagmhas, údarás inniúil náisiúnta cibearshlándála, agus pointe teagmhála aonair (SPOC) a ainmniú. Ní mór do SPOC feidhm idirchaidrimh a fheidhmiú chun comhar trasteorann a áirithiú idir údaráis na mBallstát leis na húdaráis ábhartha i mBallstáit eile agus, i gcás inarb iomchuí, leis an gCoimisiún agus le ENISA chomh maith le comhar trasearnála le húdaráis inniúla eile laistigh dá Bhallstát a áirithiú.
2. Le Treoir NIS2, leantar freisin de chreat NIS1 lena mbunaítear Grúpa Comhair NIS chun tacú le comhar straitéiseach agus malartú faisnéise i measc na mBallstát, agus Líonra CSIRTanna, agus chun an comhar sin a éascú, lena gcuirtear comhar oibríochtúil tapa éifeachtach chun cinn idir CSIRTanna náisiúnta.
3. Áirithítear le Treoir NIS1 go ndéanfar bearta cibearshlándála i seacht n-earnáil, atá ríthábhachtach dár ngeilleagar agus dár sochaí agus a bhraitheann go mór ar TFC, amhail fuinneamh, iompar, baincéireacht, bonneagair an mhargaidh airgeadais, uisce óil, cúram sláinte agus bonneagar digiteach

Eintitis phoiblí agus phríobháideacha arna sainaithint ag na Ballstáit mar oibreoirí seirbhísí fíor-riachtanacha sna hearnálacha sin, ceanglaítear orthu measúnú riosca cibearshlándála a dhéanamh agus bearta slándála iomchuí agus comhréireacha a chur i bhfeidhm. Ceanglaítear orthu teagmhais thromchúiseacha a chur in iúl do na húdaráis ábhartha. Thairis sin, ní mór do sholáthraithe príomhsheirbhísí digiteacha (soláthraithe seirbhísí digiteacha nó soláthraithe DSPanna), amhail innill chuardaigh, seirbhísí néalríomhaireachta agus margaí ar líne, na ceanglais slándála agus fógra faoin Treoir a chomhlíonadh freisin. An tráth céanna, tá na heintitis sin faoi réir córas rialála ‘dteagmháil éadrom’, mar a thugtar air, rud a chiallaíonn nach bhfuil na heintitis sin faoi réir bearta maoirseachta ex ante.

Le Treoir NIS2, leathnaítear raon feidhme na n-earnálacha go suntasach agus tugtar isteach tairseach mhéide chun na heintitis a thagann faoina raon feidhme a shainiú agus cheanglófaí orthu teagmhais chibearshlándála shuntasacha a thuairisciú do na húdaráis inniúla náisiúnta.

Is é is aidhm do Threoir NIS2 aghaidh a thabhairt ar easnaimh na rialacha a bhí ann roimhe seo, í a chur in oiriúint do na riachtanais atá ann faoi láthair agus í a dhéanamh slán i bhfad na haimsire.

Chuige sin, leathnaítear leis an Treoir raon feidhme na rialacha a bhí ann roimhe seo trí earnálacha nua a chur leis bunaithe ar mhéid a ndigitithe agus a n-idirnascthachta agus ar a ríthábhachtaí atá siad don gheilleagar agus don tsochaí, trí riail shoiléir maidir le tairseach mhéide a thabhairt isteach — rud a chiallaíonn go n-áireofar gach cuideachta mheánmhéide agus mhórmhéide in earnálacha roghnaithe sa raon feidhme. Ag an am céanna, fágann sé lánrogha áirithe ag na Ballstáit eintitis bheaga a shainaithint a bhfuil próifíl ardriosca slándála acu ar cheart iad a chumhdach freisin le hoibleagáidí na Treorach nua.

Leis an Treoir nua, cuirtear deireadh freisin leis an idirdhealú idir oibreoirí seirbhísí fíor-riachtanacha agus soláthraithe seirbhíse digití. Dhéanfaí eintitis a aicmiú bunaithe ar a dtábhacht, agus iad a roinnt ina dhá chatagóir: eintitis fhíor-riachtanacha agus thábhachtacha, a bheidh faoi réir córas maoirseachta éagsúil.

Déanann sé ceanglais slándála agus tuairiscithe do chuideachtaí a neartú agus a chuíchóiriú trí chur chuige bainistíochta riosca a fhorchur, lena soláthraítear liosta íosta d’eilimintí bunúsacha slándála nach mór a chur i bhfeidhm. Leis an Treoir nua, tugtar isteach forálacha níos beaichte maidir leis an bpróiseas chun teagmhais a thuairisciú, maidir le hábhar na dtuarascálacha agus maidir le hamlínte.

Thairis sin, tugann NIS2 aghaidh ar shlándáil na slabhraí soláthair agus ar chaidrimh idir soláthróirí trí cheangal a chur ar chuideachtaí aonair aghaidh a thabhairt ar rioscaí cibearshlándála sna slabhraí soláthair agus sa chaidreamh idir soláthróirí. Ar an leibhéal Eorpach, neartaíonn an Treoir cibearshlándáil an tslabhra soláthair le haghaidh príomhtheicneolaíochtaí faisnéise agus cumarsáide. Féadfaidh na Ballstáit, i gcomhar leis an gCoimisiún agus le ENISA, measúnuithe riosca slándála comhordaithe a dhéanamh ar leibhéal an Aontais ar shlabhraí soláthair criticiúla, ag tógáil ar an gcur chuige rathúil a glacadh i gcomhthéacs an Mholta ón gCoimisiún maidir le Cibearshlándáil líonraí 5G.

Leis an Treoir, tugtar isteach bearta maoirseachta níos déine d’údaráis náisiúnta, ceanglais forfheidhmiúcháin níos déine agus is é is aidhm di córais smachtbhannaí a chomhchuibhiú ar fud na mBallstát.

Cuireann sé freisin le ról an Ghrúpa Comhair maidir le cinntí beartais straitéiseacha a mhúnlú agus méadaíonn sé comhroinnt faisnéise agus comhar idir údaráis na mBallstát. Cuireann sé feabhas freisin ar an gcomhar oibríochtúil laistigh de líonra CSIRT agus bunaítear leis an Líonra Eorpach um Eagrú an Idirchaidrimh maidir le Cibirghéarchéimeanna (EU-CyCLONe) chun tacú le bainistiú comhordaithe teagmhas agus géarchéimeanna cibearshlándála mórscála.

Bunaítear le NIS2 freisin creat bunúsach ina bhfuil príomhghníomhaithe freagracha maidir le nochtadh comhordaithe leochaileachtaí le haghaidh leochaileachtaí nua-aimsithe ar fud an Aontais agus cruthaítear leis bunachar sonraí leochaileachta de chuid an Aontais le haghaidh leochaileachtaí atá aitheanta go poiblí i dtáirgí TFC agus i seirbhísí TFC, a bheidh le hoibriú agus le coinneáil ar bun ag gníomhaireacht an Aontais um chibearshlándáil (ENISA).

Cumhdaítear le NIS2 eintitis ó na hearnálacha seo a leanas:

Earnálacha ardchriticiúlachta: fuinneamh (leictreachas, téamh agus fuarú ceantair, ola, gás agus hidrigin); iompar (aer, iarnród, uisce agus bóthar); baincéireacht; bonneagair an mhargaidh airgeadais; sláinte lena n-áirítear monarú táirgí cógaisíochta lena n-áirítear vacsaíní; uisce óil; fuíolluisce; bonneagar digiteach (pointí malartaithe idirlín; Soláthraithe seirbhíse DNS; clárlanna ainmneacha TLD; soláthraithe seirbhísí néalríomhaireachta; soláthraithe seirbhíse lárionaid sonraí; líonraí seachadta ábhair; soláthraithe seirbhísí iontaoibhe; soláthraithe líonraí cumarsáide leictreonaí poiblí agus seirbhísí cumarsáide leictreonaí atá ar fáil go poiblí); bainistíocht seirbhísí TFC (soláthraithe seirbhísí bainistithe agus soláthraithe seirbhísí slándála bainistithe), riarachán poiblí agus spás.

Earnálacha criticiúla eile: seirbhísí poist agus cúiréireachta; bainistiú dramhaíola; ceimiceáin; bia; monarú feistí leighis, ríomhairí agus leictreonaice, innealra agus trealaimh, mótarfheithiclí, leantóirí agus leathleantóirí agus trealaimh iompair eile; soláthraithe digiteacha (margaí ar líne, innill chuardaigh ar líne, agus ardáin seirbhíse líonraithe shóisialta) agus eagraíochtaí taighde.

Léiríodh sa mheastóireacht ar na rialacha atá ann faoi láthair maidir le ceanglais slándála agus tuairiscithe teagmhas gur chuir na Ballstáit na ceanglais sin chun feidhme ar bhealaí an-éagsúil i gcásanna áirithe. Chruthaigh sé sin ualach breise do chuideachtaí atá ag feidhmiú i níos mó ná Ballstát amháin.

Ina theannta sin, a mhéid a bhaineann le ceanglais chibearshlándála, is mian linn a bheith cinnte go dtabharfaidh gach cuideachta aghaidh ar an gcroí-thacar gnéithe is gá ina mbeartais bainistíochta riosca cibearshlándála.

Ar an gcúis sin, áirítear in NIS2 liosta de 10 bpríomhghné nach mór do gach cuideachta aghaidh a thabhairt orthu nó iad a chur chun feidhme mar chuid de na bearta a dhéanann siad, lena n-áirítear láimhseáil teagmhas slándáil shlabhra soláthair ,, láimhseáil agus nochtadh leochaileachtaí, úsáid cripteagrafaíochta agus, i gcás inarb iomchuí, criptiú.

Maidir le tuairisciú teagmhas, ní mór dúinn an chothromaíocht cheart a bhaint amach idir an gá atá le tuairisciú tapa chun leathadh féideartha teagmhas a sheachaint, agus an gá atá le tuairisciú domhain chun ceachtanna luachmhara a foghlaimíodh ó theagmhais aonair a tharraingt. Foráiltear leis an Treoir nua do chur chuige ilchéimneach maidir le tuairisciú teagmhas. Bíonn 24 uair an chloig ag cuideachtaí dá ndéantar difear ón uair a thagann siad ar an eolas ar dtús faoi theagmhas chun luathrabhadh a chur faoi bhráid CSIRT nó an údaráis náisiúnta inniúil, rud a chuirfeadh ar a gcumas cúnamh a lorg freisin (treoir nó comhairle oibríochtúil maidir le bearta maolaithe féideartha a chur chun feidhme) má iarrann siad é. Tar éis an luathrabhaidh, ba cheart fógra teagmhais a thabhairt laistigh de 72 uair an chloig tar éis teacht ar an eolas faoin teagmhas agus ba cheart tuarascáil chríochnaitheach a thabhairt tráth nach déanaí ná mí amháin ina dhiaidh sin.

Le Treoir NIS nua, cuirtear maoirseacht agus forfheidhmiú i gcroílár chúraimí na n-údarás inniúil agus leagtar amach creat comhleanúnach le haghaidh na ngníomhaíochtaí maoirseachta agus forfheidhmiúcháin uile ar fud na mBallstát.

Chun an mhaoirseacht a chuidíonn le comhlíonadh éifeachtach a áirithiú a neartú, déanann NIS2 foráil maidir le híosliosta modhanna maoirseachta trína bhféadfaidh údaráis inniúla maoirseacht a dhéanamh ar eintitis fhíor-riachtanacha agus thábhachtacha. Áirítear orthu sin iniúchtaí rialta agus spriocdhírithe, seiceálacha ar an láthair agus lasmuigh den láthair, iarraidh ar fhaisnéis, agus rochtain ar dhoiciméid nó ar fhianaise.

Ina theannta sin, bunaítear leis an Treoir nua difreáil ar chórais mhaoirseachta idir eintitis fhíor-riachtanacha agus thábhachtacha, d’fhonn cothromaíocht chóir oibleagáidí a áirithiú d’eintitis agus d’údaráis inniúla araon.

Maidir le forfheidhmiú, go dtí seo bhí drogall foriomlán ar fud na mBallstát pionóis a chur i bhfeidhm ar eintitis a mhainnigh bearta slándála a chur i bhfeidhm nó teagmhais a thuairisciú. D’fhéadfadh iarmhairtí diúltacha a bheith aige sin ar chibear-athléimneacht eintiteas. Chun go mbeidh an forfheidhmiú éifeachtach, bunaítear leis an Treoir nua creat comhsheasmhach le haghaidh smachtbhannaí ar fud an Aontais. Dá bhrí sin, bunaítear leis liosta íosta smachtbhannaí riaracháin i leith sárú ar na hoibleagáidí bainistíochta riosca agus tuairiscithe cibearshlándála a leagtar síos i dTreoir NIS2. Áirítear ar na smachtbhannaí sin treoracha ceangailteacha, ordú chun moltaí iniúchta slándála a chur chun feidhme, bearta slándála a thabhairt i gcomhréir le ceanglais NIS, agus fíneálacha riaracháin. Maidir le fíneálacha riaracháin, déantar idirdhealú i dTreoir NIS nua idir eintitis fhíor-riachtanacha agus thábhachtacha. Maidir le heintitis fhíor-riachtanacha, ceanglaítear leis ar na Ballstáit foráil a dhéanamh maidir le leibhéal áirithe fíneálacha riaracháin, go háirithe uasmhéid EUR 10 000 000 ar a laghad nó 2 % de láimhdeachas bliantúil iomlán domhanda na bliana airgeadais roimhe sin, cibé acu is airde. Maidir le heintitis thábhachtacha, ceanglaítear le NIS2 ar na Ballstáit foráil a dhéanamh maidir le fíneáil uasta EUR 7,000,000 ar a laghad nó 1,4 % ar a laghad de láimhdeachas bliantúil iomlán domhanda na bliana airgeadais roimhe sin, cibé acu is airde.

Agus a gcumhachtaí forfheidhmiúcháin á bhfeidhmiú acu, ba cheart do na húdaráis inniúla aird chuí a thabhairt ar imthosca sonracha gach cáis, amhail cineál, tromchúis agus fad an tsáraithe, an damáiste a rinneadh nó na caillteanais a tabhaíodh, cineál an tsáraithe a bheith déanta d’aon ghnó nó le faillí.

Chun fíorchuntasacht a áirithiú maidir leis na bearta cibearshlándála ar an leibhéal eagraíochtúil, tugtar isteach le NIS2 forálacha maidir le dliteanas daoine nádúrtha a bhfuil poist ardbhainistíochta acu sna heintitis a thagann faoi raon feidhme Threoir NIS nua.

Leis na rialacha nua, cuirtear feabhas ar an gcaoi a ndéanann an tAontas teagmhais agus géarchéimeanna cibearshlándála mórscála a chosc, a láimhseáil agus a fhreagairt. Déanann siad amhlaidh trí fhreagrachtaí soiléire, pleanáil iomchuí agus tuilleadh comhair ón Aontas a thabhairt isteach. Le NIS2, ceanglaítear ar na Ballstáit údaráis náisiúnta a cheapadh a bheidh freagrach as bainistiú cibirghéarchéimeanna, tugtar isteach pleananna náisiúnta maidir le teagmhais mhórscála chibearshlándála agus freagairt ar ghéarchéimeanna, agus bunaítear an Líonra Eorpach um Eagrú an Idirchaidrimh maidir le Cibirghéarchéimeanna (EU-CYCLONe) chun tacú le bainistiú comhordaithe teagmhas mórscála cibearshlándála agus géarchéimeanna ar an leibhéal oibríochtúil. Is príomhghné é an Líonra sin a rannchuidíonn le bunú chreat bainistithe cibirghéarchéime an Aontais a leag an Coimisiún amach in 2017 leis an Moladh maidir le freagairt chomhordaithe ar theagmhais agus géarchéimeanna mórscála.

De ghnáth, meastar eintitis fhíor-riachtanacha agus thábhachtacha a bheith faoi dhlínse an Bhallstáit ina bhfuil siad bunaithe. Má tá an t-eintiteas bunaithe i níos mó ná Ballstát amháin, ba cheart dó teacht faoi dhlínse gach ceann de na Ballstáit sin. Ba cheart do na húdaráis inniúla i ngach ceann de na Ballstáit sin dul i gcomhar le chéile, cúnamh frithpháirteach a thabhairt dá chéile agus, i gcás inarb iomchuí, gníomhaíochtaí maoirseachta comhpháirteacha a dhéanamh. Tá roinnt eisceachtaí ann maidir leis an riail seo:

• thiocfadh soláthraithe líonraí nó soláthraithe cumarsáide leictreonaí poiblí nó seirbhísí cumarsáide leictreonaí atá ar fáil go poiblí faoi dhlínse an Bhallstáit ina soláthraíonn siad a gcuid seirbhísí.
• thiocfadh eintitis riaracháin phoiblí faoi dhlínse an Bhallstáit a bhunaigh iad.
• bheadh cineálacha áirithe eintiteas faoi dhlínse an Bhallstáit ina bhfuil a bpríomhbhunaíocht san Aontas. Áirítear ar na heintitis sin soláthraithe seirbhíse córais ainmneacha fearainn, clárlanna ainmneacha fearainn barrleibhéil, eintitis a sholáthraíonn seirbhísí cláraithe ainmneacha fearainn, soláthraithe seirbhíse néalríomhaireachta, soláthraithe seirbhíse lárionaid sonraí, soláthraithe líonra soláthair ábhair, soláthraithe seirbhíse bainistithe, soláthraithe seirbhíse slándála bainistithe, chomh maith le soláthraithe margaí ar líne, soláthraithe inneall cuardaigh ar líne agus soláthraithe ardán líonraithe shóisialta. Déantar é sin chun a áirithiú nach mbeidh ar eintitis den sórt sin aghaidh a thabhairt ar an iliomad ceanglas dlíthiúil éagsúil, ós rud é go soláthraíonn siad seirbhísí thar theorainneacha go méid an-ard. Chun críche maoirseachta éifeachtaí, ceanglóidh na Ballstáit ar na cineálacha eintiteas sin fógra a thabhairt, i measc nithe eile, i gcás inarb í príomhbhunaíocht an eintitis chomh maith lena bhunaíochtaí dlíthiúla eile san Aontas nó, mura bhfuil siad bunaithe san Aontas, an áit ina n-ainmnítear ionadaí an eintitis. Cheanglófaí ar ENISA clárlann a chruthú agus a chothabháil ina mbeadh an fhaisnéis arna soláthar ar an mbonn sin ag na Ballstáit.

Tugtar Comhar an Aontais chun cinn trí chead a thabhairt do na Ballstáit gníomhú go comhpháirteach agus dul i ngleic leis na rioscaí slándála atá ag teacht chun cinn mar gheall ar an gclaochlú digiteach leanúnach.

Go sonrach, beidh na Ballstáit in ann maoirseacht chomhpháirteach a dhéanamh ar chur chun feidhme rialacha an Aontais agus cúnamh frithpháirteach a thabhairt dá chéile i gcás míchleachtais trasteorann, idirphlé níos struchtúrtha a bheith acu leis an earnáil phríobháideach agus nochtadh leochaileachtaí a fhaightear i mbogearraí agus i gcrua-earraí a dhíoltar ar fud an mhargaidh inmheánaigh a chomhordú. Beidh siad in ann oibriú ar bhealach comhordaithe freisin chun measúnú a dhéanamh ar na rioscaí agus na bagairtí slándála a bhaineann le teicneolaíochtaí nua, mar a rinneadh den chéad uair le 5G.

Bainfidh na Ballstáit leas as comhar an Aontais chun feabhas a chur ar chumais náisiúnta trí mhalartuithe foirne idir údaráis agus athbhreithnithe piaraí. Rannchuideoidh na grúpaí atá ann cheana, go háirithe an Grúpa Comhair a bhailíonn údaráis náisiúnta chibearshlándála agus Líonra na bhFoirne Freagartha do Theagmhais a bhaineann le Slándáil Ríomhairí (CSIRTanna), leis an gcomhar a chur chun cinn ar an leibhéal straitéiseach agus ar an leibhéal teicniúil araon.

Tá dlúthnasc idir Treoir NIS2 agus dhá thionscnamh eile, an Treoir maidir le hAthléimneacht Eintiteas Criticiúil (CER) agus an Rialachán maidir le hAthléimneacht Dhigiteach Oibríochtúil don earnáil airgeadais (an Gníomh um Athléimneacht Dhigiteach Oibríochtúil, DORA) .

Rinneadh raon feidhme NIS 2 agus na Treorach maidir le hAthléimneacht Eintiteas Criticiúil (Treoir CER) a ailíniú den chuid is mó chun a áirithiú go dtabharfar aghaidh ar bhealach cuimsitheach ar athléimneacht fhisiceach agus ar chibear-athléimneacht eintiteas criticiúil. Na heintitis a shainaithnítear mar eintitis chriticiúla faoi Threoir CER, beidh siad faoi réir oibleagáidí cibearshlándála Threoir NIS2 freisin. Thairis sin, ní mór d’údaráis inniúla náisiúnta faoi Threoracha CER agus NIS2 dul i gcomhar le chéile agus faisnéis ábhartha a mhalartú ar bhonn rialta amhail maidir le rioscaí, cibearbhagairtí agus cibeartheagmhais agus maidir le rioscaí, bagairtí agus teagmhais nach mbaineann le cibearchúrsaí. Beidh ar an nGrúpa Comhair faoi NIS2 teacht le chéile ar bhonn rialta agus uair sa bhliain ar a laghad leis an nGrúpa um Athléimneacht Eintiteas Criticiúil arna bhunú faoi Threoir CER.

A mhéid a bhaineann leis an earnáil airgeadais, cé go n-áirítear i dTreoir NIS nua institiúidí creidmheasa, oibreoirí ionad trádála agus contrapháirtithe lárnacha faoina raon feidhme, beidh feidhm ag DORA maidir leis na heintitis sin a mhéid a bhaineann le bainistiú riosca cibearshlándála agus oibleagáidí tuairiscithe. Ag an am céanna, tá sé tábhachtach caidreamh láidir a choinneáil ar bun chun faisnéis a mhalartú idir an earnáil airgeadais agus na hearnálacha eile a chumhdaítear le NIS 2. Chuige sin, faoi DORA , bheadh na hÚdaráis Mhaoirseachta Eorpacha (ÚMEnna) don earnáil airgeadais agus don earnáil airgeadais in ann páirt a ghlacadh i bpléití Ghrúpa Comhair NIS. Thairis sin, bheadh údaráis inniúla DORA in ann faisnéis ábhartha a cheadú agus a chomhroinnt leis an bPointe Teagmhála Aonair (SPOCanna) agus le CSIRTanna arna mbunú faoi NIS2. Gheobhadh na húdaráis inniúla, na SPOCanna nó na CSIRTanna arna mbunú faoi NIS2 sonraí freisin maidir le mórtheagmhais a bhaineann le TFC ó na húdaráis inniúla faoi DORA. Thairis sin, ba cheart do na Ballstáit leanúint den earnáil airgeadais a áireamh ina straitéisí cibearshlándála agus féadfaidh CSIRTanna náisiúnta an earnáil airgeadais a chumhdach ina ngníomhaíochtaí.

Beidh ar na Ballstáit an Treoir a thrasuí faoin 17 Deireadh Fómhair 2024 (21 mhí tar éis theacht i bhfeidhm NIS2). Ní mór don Choimisiún ansin athbhreithniú tréimhsiúil a dhéanamh ar fheidhmiú na Treorach agus tuairisciú ina leith sin den chéad uair faoin 17 Deireadh Fómhair 2027 do Pharlaimint na hEorpa agus don Chomhairle.