An Intleacht Shaorga

Tagraíonn an intleacht shaorga, nó IS, do theicneolaíochtaí atá cláraithe chun anailís a dhéanamh ar an domhan thart timpeall orthu agus beart a dhéanamh chun spriocanna sonracha a bhaint amach.

B’fhéidir nach dtuigimid é, ach tá ról lárnach ag IS inár saol laethúil, idir post turscair a scagadh, amhrán nua a mholadh dúinn, an bealach is tapúla a aimsiú dúinn go dtí an áit a bhfuilimid ag dul.

De réir mar a thagann forbairt ar an intleacht shaorga, is féidir léi níos mó tairbhí fós a chur ar fáil do shaoránaigh agus do ghnólachtaí ar fud na hEorpa. Áirítear orthu sin galair a chosc ar bhealach níos fearr, líon níos lú básanna i dtionóiscí tráchta, réamhaíocht ar chibearbhagairtí agus tuilleadh.

Tá rialacha agus gníomhaíochtaí nua maidir leis an intleacht shaorga molta ag an Aontas ionas gur féidir linn leas iomlán a bhaint as a hacmhainneacht agus as na tairbhí a bhaineann léi sa Deacáid Dhigiteach.

Is é an Gníomh um an Intleacht Shaorga an chéad togra ar domhan le haghaidh creat dlíthiúil lena rialaítear úsáidí sonracha na hintleachta saorga agus leis an bPlean Comhordaithe maidir leis an Intleacht Shaorga tugtar chun cinn ailíniú straitéiseach, gníomhaíocht bheartais agus dlús a chur leis an infheistíocht. I dteannta a chéile, leagtar amach iontu cur chuige Eorpach i leith na hintleachta saorga lena dtugtar tús áite do dhaoine. Leis na rialacha nua, cinnteofar go gcuirfear muinín, sábháilteacht agus cearta bunúsacha chun cinn leis an dul chun cinn san Intleacht Shaorga, agus go gcothófar barr feabhais sa nuálaíocht ag an am céanna.

Cuireadh tús leis an Oifig Eorpach um Intleacht Shaorga i mí Feabhra 2024 mar chuid den Choimisiún. Tá ról lárnach aici maidir le forfheidhmiú agus cur chun feidhme an Ghnímh um an Intleacht Shaorga i gcomhar leis na Ballstáit. Is é is príomhchuspóir dó timpeallacht a chothú ina seasann teicneolaíochtaí IS le dínit agus cearta an duine agus ina gcothaítear iontaofacht i réitigh IS ag an am céanna. Cothaíonn an Oifig um Intleacht Shaorga comhoibriú i measc páirtithe leasmhara éagsúla freisin chun eolas a roinnt, nuálaíocht a spreagadh, agus taighde ar IS a chur chun cinn. Cuireann sé comhar agus idirphlé idirnáisiúnta chun cinn freisin maidir le cúrsaí IS, agus aitheantas á thabhairt do thábhacht dhomhanda cur chuige comhchuibhithe maidir le rialachas IS. Trí thacú leis na tionscnaimh sin, spreagann an Oifig Eorpach um Intleacht Shaorga an Eoraip chun ról ceannaireachta a ghlacadh i bhforbairt fhreagrach agus inbhuanaithe theicneolaíochtaí IS.