Dan l-istudju jappoġġa lill-Kummissjoni Ewropea fir-rappurtar dwar l-implimentazzjoni tal- programm ta’ politika tad-Deċennju Diġitali (DDPP), billi jivvaluta l-prestazzjoni diġitali tal-UE fil-kuntest internazzjonali.
l-istudju jikkompara l-UE ma’ seba’ pajjiżi mhux tal-UE identifikati bħala pajjiżi bl-aħjar prestazzjoni globali fid-diġitalizzazzjoni (l-Awstralja, iċ-Ċina, l-Iżrael, il-Ġappun, il-Korea t’Isfel, ir-Renju Unit, u l-Istati Uniti).
Tematikament, l-istudju jiffoka fuq l-erba’ punti kardinali tad-DDPP: il-ħiliet diġitali, l-infrastruttura diġitali, it-trasformazzjoni diġitali tan-negozji, u s-servizzi pubbliċi diġitali. Dan jinvolvi kemm analiżi kwantitattiva (li tiffoka fuq l-eżiti tad-diġitalizzazzjoni) kif ukoll valutazzjoni kwalitattiva (b’enfasi fuq l-oqfsa ta’ politika dwar id-diġitalizzazzjoni) tal-pożizzjoni tal-UE meta mqabbla ma’ dawn il-pajjiżi ta’ referenza magħżula.
l-istudju huwa ta’ natura esploratorja. B’mod partikolari, data statistika internazzjonali komparabbli hija limitata, filwaqt li l-ambitu tal-istudju huwa ristrett aktar mill-ġbir limitat ta’ data primarja (kwalitattiva).