Proposta għal direttiva dwar miżuri għal livell għoli komuni ta’ ċibersigurtà madwar l-Unjoni

Minkejja l-kisbiet notevoli tagħha, id-Direttiva dwar is-sigurtà tan-netwerks u tas-sistemi tal-informazzjoni (id-Direttiva NIS), li wittiet it-triq għal bidla sinifikanti fil-mentalità, fl-approċċ istituzzjonali u regolatorju għaċ-ċibersigurtà f’ħafna Stati Membri, sa issa wriet ukoll il-limitazzjonijiet tagħha. It-trasformazzjoni diġitali tas-soċjetà (intensifikata mill-kriżi tal-COVID-19) espandiet ix-xenarju tat-theddid u qed iġġib magħha sfidi ġodda, li jeħtieġu reazzjonijiet adattati u innovattivi.
Issa kwalunkwe tfixkil, anki wieħed inizjalment limitat għal entità waħda jew settur wieħed, jista’ jkollu effetti kaskata b’mod aktar wiesa’, li potenzjalment jirriżultaw f’impatti negattivi estensivi u dejjiema fit-twassil tas-servizzi fis-suq intern kollu.

Biex tindirizza dawn l-isfidi, kif imħabbar fil-Komunikazzjoni dwar Insawru l-Futur Diġitali tal-Ewropa, il-Kummissjoni aċċellerat ir-rieżami tad-Direttiva sa tmiem l-2020, wettqet valutazzjoni tal-impatt u ppreżentat proposta leġiżlattiva ġdida.

Elementi ewlenin tal-proposta tal-Kummissjoni

Il- proposta l-ġdida tal-Kummissjoni għandha l-għan li tindirizza n-nuqqasijiet tad- Direttiva NIS preċedenti, tadattaha għall-ħtiġijiet attwali u tagħmilha valida għall-futur.

Għal dan l-għan, il-proposta tal-Kummissjoni tespandi l-kamp ta’ applikazzjoni tad-Direttiva NIS attwali billi żżid setturi ġodda bbażati fuq il-kritikalità tagħhom għall-ekonomija u s-soċjetà, u billi tintroduċi limitu massimu ċar fuq id-daqs — li jfisser li l-kumpaniji medji u kbar kollha f’setturi magħżula se jiġu inklużi fil-kamp ta’ applikazzjoni. Fl-istess ħin, tħalli ftit flessibbiltà għall-Istati Membri biex jidentifikaw entitajiet iżgħar bi profil ta’ riskju għoli għas-sigurtà.

Il-proposta telimina wkoll id-distinzjoni bejn l-operaturi ta’ servizzi essenzjali u l-fornituri ta’ servizzi diġitali. l-entitajiet jiġu kklassifikati abbażi tal-importanza tagħhom, u jinqasmu rispettivament f’kategoriji essenzjali u importanti bil-konsegwenza li jkunu soġġetti għal reġimi superviżorji differenti.

Il-proposta ssaħħaħ ir-rekwiżiti tas-sigurtà għall-kumpaniji, billi timponi approċċ ta’ ġestjoni tar-riskju li jipprovdi lista minima ta’ elementi bażiċi ta’ sigurtà li jridu jiġu applikati. Il-proposta tintroduċi dispożizzjonijiet aktar preċiżi dwar il-proċess għar-rappurtar tal-inċidenti, il-kontenut tar-rapporti u l-iskedi taż-żmien.

Barra minn hekk, il-Kummissjoni tipproponi li tindirizza s-sigurtà tal-ktajjen tal-provvista u r-relazzjonijiet tal-fornituri billi tirrikjedi li l-kumpaniji individwali jindirizzaw ir-riskji taċ-ċibersigurtà fil-ktajjen tal-provvista u fir-relazzjonijiet tal-fornituri. Fil-livell Ewropew, il-proposta ssaħħaħ iċ-ċibersigurtà tal-katina tal-provvista għat-teknoloġiji ewlenin tal-informazzjoni u tal-komunikazzjoni. l-Istati Membri f’kooperazzjoni mal-Kummissjoni u l-ENISA, se jwettqu valutazzjonijiet tar-riskju kkoordinati tal-ktajjen tal-provvista kritiċi, filwaqt li jibnu fuq l-approċċ ta’ suċċess meħud fil-kuntest tar- Rakkomandazzjoni tal-Kummissjoni dwar iċ-Ċibersigurtà tan-networks 5G.

Il-proposta tintroduċi miżuri superviżorji aktar stretti għall-awtoritajiet nazzjonali, rekwiżiti ta’ infurzar aktar stretti u għandha l-għan li tarmonizza r-reġimi ta’ sanzjonijiet madwar l-Istati Membri.

Il-proposta ssaħħaħ ukoll ir-rwol tal- Grupp ta’ Kooperazzjoni fit-tfassil ta’ deċiżjonijiet ta’ politika strateġika dwar teknoloġiji emerġenti u xejriet ġodda, u żżid il-kondiviżjoni tal-informazzjoni u l-kooperazzjoni bejn l-awtoritajiet tal-Istati Membri. Issaħħaħ ukoll il-kooperazzjoni operazzjonali inkluż dwar il-ġestjoni tal-kriżijiet ċibernetiċi.

Il-proposta tal-Kummissjoni tistabbilixxi qafas bażiku b’atturi ewlenin responsabbli dwar l-iżvelar ikkoordinat tal-vulnerabbiltajiet għal vulnerabbiltajiet li għadhom kif ġew skoperti madwar l-UE u l-ħolqien ta’ reġistru tal-UE dwar dak operat mill-Aġenzija tal-Unjoni Ewropea għaċ-Ċibersigurtà (ENISA).
 

Il-passi li jmiss

l-azzjonijiet rilevanti tal-passi li jmiss huma:

• Il-Proposta se tkun soġġetta għal negozjati bejn il-koleġiżlaturi, b’mod partikolari l-Kunsill tal-UE u l-Parlament Ewropew
• Ladarba l-proposta tiġi miftiehma u konsegwentement adottata, l-Istati Membri se jkollhom jittrasponu d-Direttiva NIS2 fi żmien 18-il xahar.
• Il-Kummissjoni għandha tirrevedi perjodikament id-Direttiva NIS2 u tirrapporta għall-ewwel darba dwar ir-reviżjoni 54 xahar wara d-dħul fis-seħħ.
• Il-Kummissjoni Ewropea tistenna bil-ħerqa l-implimentazzjoni tal-istrateġija Ċibernetika l-ġdida fix-xhur li ġejjin.