Id-deżinjazzjoni hija r-riżultat ta’ investigazzjonijiet tal-Kummissjoni li jikkonkludu li t-tliet servizzi jissodisfaw il-limitu ta’ 45 miljun utent medju fix-xahar fl-UE.
Id-deżinjazzjonijiet tal-lum isegwu l-ewwel sett ta’ deċiżjonijiet ta’ deżinjazzjoni ta’ 19 Pjattaformi Online Kbar Ħafna u Magna tat-Tiftix fil-25 ta’ April 2023, li l-Kummissjoni ppubblikat il-verżjonijiet mhux kunfidenzjali tagħhom illum.
Margrethe Vestager, Viċi President Eżekuttiv għal Ewropa Lesta għall-Era Diġitali — 20/12/2023
Nilqa’ d-deżinjazzjonijiet ta’ Pornhub, Xvideos u Stripchat bħala Pjattaformi Online Kbar Ħafna. Dan se jippermetti skrutinju u responsabbiltà ogħla tal-algoritmi u l-proċessi tagħhom. Id-DSA juri għal darb’ oħra li huwa għodda essenzjali biex jiġi żgurat li t-teknoloġija tirrispetta d-drittijiet fundamentali taċ-ċittadini Ewropej.
Thierry Breton, Kummissarju għas-Suq Intern — 20/12/2023
Il-kriterji biex jiġi ddeterminat jekk pjattaforma hijiex kbira ħafna fis-sens tal-Att dwar is-Servizzi Diġitali huma sempliċi ħafna: kwalunkwe pjattaforma online b’aktar minn 45 miljun utent fl-UE għandha obbligi speċjali minħabba l-iskala tagħha. Diġà ddeżinjajna 19 Pjattaforma Online Kbar Ħafna u Magna tat-Tiftix. Se nkomplu nidnominaw pjattaformi li jilħqu l-limiti u niżguraw li dawn jikkonformaw mal-obbligi tagħhom skont l-Att dwar is-Servizzi Diġitali. Kont ċar ħafna li l-ħolqien ta’ ambjent online aktar sikur għat-tfal tagħna huwa prijorità ta’ infurzar skont id-DSA.