L-għan huwa li jiġi żgurat ambjent sterili fl-isptarijiet mingħajr ma l-persunal jiġi espost għal riskju bla bżonn. Peress li dan huwa proċess fiżiku aktar milli wieħed li juża diżinfettant kimiku, huwa aktar sikur għall-persunal tal-isptar peress li m’għadx hemm bżonn jimmaniġġja, jittrasporta jew jaħżen sustanzi kimiċi tossiċi, perikolużi jew korrużivi. Il-persunal tat-tindif jopera r-robot mill-bogħod permezz ta’ applikazzjoni mobbli u l-operazzjoni tinbeda minn barra l-kamra biex tiġi diżinfettata, u għalhekk l-ebda ħaddiem tal-kura tas-saħħa ma jkun preżenti matul il-proċess. Fornuti mill-kumpanija Daniża UVD Robots, li rebħet sejħa għall-offerti ta’ emerġenza, l-apparati huma parti mill-isforz tal-Kummissjoni biex tipprovdi tagħmir utli u meħtieġ lill-Istati Membri bħala għajnuna biex tiġi indirizzata l-pandemija. B’kollox, EUR 12 miljun huma disponibbli mill-Istrument għall-Appoġġ ta’ Emerġenza biex jinxtraw 200 robots.