Skont l-Att dwar is-Servizzi Diġitali (DSA), il-Pjattaformi Online Kbar Ħafna (VLOPs) u l-Magni tat-Tiftix Online Kbar Ħafna (VLOSEs) iridu jkunu soġġetti għal awditu annwali, imwettaq minn awditur indipendenti, biex jivvalutaw il-konformità tagħhom mal-obbligi tad-DSA tagħhom u ma’ kwalunkwe impenn meħud skont il-kodiċijiet ta’ kondotta u l-protokolli ta’ kriżi adottati.
Dan l-att delegat dwar l-awditi indipendenti jipprovdi qafas biex jiggwida lill-fornituri tal-VLOPs u tal-VLOSEs, kif ukoll lill-organizzazzjonijiet tal-awditjar, fit-tħejjija u l-ħruġ tal-awditi.
L-att delegat huwa pass importanti lejn l-iżgurar tal-komparabbiltà tal-awditi mwettqa għall-pjattaformi differenti. Dan tagħmlu billi tistabbilixxi mudelli obbligatorji għar-rapporti tal-awditjar prodotti mill-awdituri, kif ukoll għar-rapporti dwar l-implimentazzjoni tal-awditjar, li se jiġu prodotti mill-VLOPs u mill-VLOSEs.
Ir-rapporti għandhom jippreżentaw opinjoni ċara dwar il-konformità tas-servizz awditjat mad-DSA, u opinjoni dwar il-konformità ma’ kull kodiċi ta’ kondotta u protokoll ta’ kriżi li skontu VLOP jew VLOSE awditjat ikun ħa impenji volontarji. Dawn il-kodiċijiet u l-protokolli jeħtieġ li jiġu rikonoxxuti mill-Kummissjoni u mill-Bord Ewropew għas-Servizzi Diġitali, li ġie stabbilit fis-17 ta’ Frar 2023.
Il-pubblikazzjoni tar-rapporti tal-awditjar u l-implimentazzjoni tal-awditjar iġġib magħha bidla gradwali fit-trasparenza u l-obbligu ta’ rendikont ta’ tali fornituri u għandha toffri bażi komparattiva għall-iskrutinju pubbliku. Ir-rapporti tal-awditjar jenħtieġ li jkunu wkoll sors siewi ta’ informazzjoni għall-Kummissjoni u għall-Koordinaturi tas-Servizzi Diġitali u għal awtoritajiet kompetenti oħra fil-qafas tal-Att dwar is-Servizzi Diġitali.
L-20 VLOPs u t-2 VLOSEs se jkollhom jittrażmettu dawn ir-rapporti tal-awditjar lill-Kummissjoni u lill-Koordinatur tas-Servizzi Diġitali kompetenti fl-Istat Membru tal-istabbiliment tagħhom. Se jkollhom ukoll jippubblikawhom sa mhux aktar tard minn tliet xhur minn meta jlestu r-rapport tal-awditjar.