iStock photo Getty images plus
It-theddid reċenti għall-infrastruttura kritika tal-UE pprova jdgħajjef is-sigurtà kollettiva tagħna. Diġà fl-2020, il-Kummissjoni kienet ipproponiet aġġornament sinifikanti għar-regoli tal-UE dwar ir-reżiljenza tal-entitajiet kritiċi u s-sigurtà tan-networks u tas-sistemi tal-informazzjoni.
It-2 Direttiva li daħlu fis-seħħ huma:
- Direttiva dwar miżuri għal livell għoli komuni ta’ ċibersigurtà madwar l-Unjoni (Direttiva NIS 2)
- Direttiva dwar ir-reżiljenza tal-entitajiet kritiċi (id-Direttiva CER)
Id-Direttiva NIS 2 se tiżgura Ewropa aktar sikura u aktar b’saħħitha billi tespandi b’mod sinifikanti s-setturi u t-tip ta’ entitajiet kritiċi li jaqgħu fil-kamp ta’ applikazzjoni tagħha. Dawn jinkludu fornituri ta’ networks u servizzi pubbliċi tal-komunikazzjoni elettronika, servizzi ta’ ċentri tad-data, ġestjoni tal-ilma mormi u tal-iskart, manifattura ta’ prodotti kritiċi, servizzi postali u tal-kurrier u entitajiet tal-amministrazzjoni pubblika, kif ukoll is-settur tal-kura tas-saħħa b’mod aktar wiesa’. Barra minn hekk, se ssaħħaħ ir-rekwiżiti tal-ġestjoni tar-riskju taċ-ċibersigurtà li l-kumpaniji huma obbligati jikkonformaw magħhom, kif ukoll tissimplifika l-obbligi ta’ rapportar tal-inċidenti b’ dispożizzjonijiet aktar preċiżi dwar ir-rapportar, il-kontenut u l-iskeda ta’ żmien. Id-Direttiva NIS2 tissostitwixxi r-regoli dwar is-sigurtà tan-netwerks u tas-sistemi tal-informazzjoni, l-ewwel leġiżlazzjoni għall-UE kollha dwar iċ-ċibersigurtà.
Kontra xenarju ta’ riskju dejjem aktar kumpless, id-Direttiva CER il-ġdida tissostitwixxi d-Direttiva dwar l-Infrastruttura Kritika Ewropea tal-2008. Ir-regoli l-ġodda ser isaħħu r-reżiljenza tal-infrastruttura kritika għal firxa ta’ theddid, inklużi perikli naturali, attakki terroristiċi, theddid minn ġewwa, jew sabutaġġ. Se jiġu koperti 11 setturi: l-enerġija, it-trasport, il-banek, l-infrastrutturi tas-swieq finanzjarji, is-saħħa, l-ilma tax-xorb, l-ilma mormi, l-infrastruttura diġitali, l-amministrazzjoni pubblika, l-ispazju u l-ikel. L-Istati Membri se jkollhom jadottaw strateġija nazzjonali u jwettqu valutazzjonijiet tar-riskju regolari biex jidentifikaw entitajiet li huma meqjusa kritiċi jew vitali għas-soċjetà u l-ekonomija.
L-Istati Membri għandhom 21-il xahar biex jittrasponu ż-żewġ Direttivi fil-liġi nazzjonali. Matul dan iż-żmien, l-Istati Membri għandhom jadottaw u jippubblikaw il-miżuri meħtieġa biex jikkonformaw magħhom.
F’Diċembru 2022, il-Kunsill adotta rakkomandazzjoni dwar approċċ ta’ koordinazzjoni fl-Unjoni kollha biex tissaħħaħ ir-reżiljenza tal-infrastruttura kritika fejn l-Istati Membri huma mistiedna jaċċelleraw il-ħidma preparatorja għat-traspożizzjoni u l-applikazzjoni tal-NIS 2 u tad-Direttiva dwar ir-reżiljenza tal-entitajiet kritiċi (CER).