European Commission
Sena wara t-tnedija tal-Kodiċi msaħħaħ, il-firmatarji ser jiddiskutu l-isforzi kontinwi tagħhom biex jimplimentaw il-Kodiċi u l-isfidi li ġejjin. Dawn l-isfidi jinkludu t-tħejjija għall-elezzjonijiet Ewropej li jmiss, l-approfondiment tal-ħidma fuq il-verifika tal-fatti, it-titjib tal-aċċess għad-data għar-riċerka, l-għoti tas-setgħa lill-utenti, u r-rispons għall-aħħar żviluppi fil-qasam tal-IA ġenerattiva.
Il-Viċi President għall-Valuri u t-Trasparenza, Věra Jourová, qalet:
Il-kooperazzjoni fost il-firmatarji u l-għadd kbir ta’ organizzazzjonijiet ġodda li lesti jiffirmaw il-Kodiċi ta’ Prattika l-ġdid juru li dan sar strument effettiv u dinamiku għall-ġlieda kontra d-diżinformazzjoni. Madankollu, il-progress għadu kajman wisq fuq aspetti kruċjali, speċjalment fir-rigward tal-propaganda tal-gwerra favur il-Kremlin jew l-aċċess indipendenti għad-data. Il-kodiċi jenħtieġ li jibda jindirizza wkoll theddid ġdid bħall-użu ħażin tal-IA ġenerattiva. Hekk kif inħejju għall-elezzjonijiet tal-UE tal-2024, nappella lill-pjattaformi biex iżidu l-isforzi tagħhom fil-ġlieda kontra d-diżinformazzjoni u jindirizzaw il-manipulazzjoni tal-informazzjoni Russa, u dan fl-Istati Membri u l-lingwi kollha, kemm jekk kbar kif ukoll jekk żgħar.
Il-Kummissarju għas-Suq Intern, Thierry Breton, qal:
L-ewwel eżerċizzju ta’ rappurtar tal-Kodiċi tatna data bla preċedent dwar kif il-pjattaformi jindirizzaw id-diżinformazzjoni, iżda wera wkoll li jrid isir aktar dwar il-kapaċità tal-verifika tal-fatti, il-moderazzjoni tal-kontenut fil-lingwi kollha tal-UE u l-aċċess għad-data għar-riċerkaturi. Il-pjattaformi għandhom responsabbiltà importanti lejn is-soċjetajiet u d-demokraziji tagħna, b’mod partikolari fid-dawl tad-diżinformazzjoni madwar l-Ukrajna u r-riskji ta’ diżinformazzjoni li tħalli impatt fuq l-elezzjonijiet. Din ir-responsabbiltà ssir obbligu legali skont id-DSA, u Pjattaformi Online Kbar Ħafna ddeżinjati se jkollhom jivvalutaw u jimmitigaw ir-riskji sistemiċi, inkluża d-diżinformazzjoni, sal-25 ta’ Awwissu.
Fi Frar 2023, il-firmatarji tal-kodiċi ta’ prattika ppreżentaw l-ewwel rapporti ta’ referenza tagħhom. Dawn ir-rapporti kienu għarfien bla preċedent tal-azzjonijiet tal-pjattaformi għall-ġlieda kontra d-diżinformazzjoni.
Il-Kummissjoni tistenna żieda fir-rappurtar għar-rawnd li jmiss f’Lulju 2023, inkluż titjib fl-implimentazzjoni tal-impenji fil-Kodiċi, kif ukoll data aktar granulari u adatta għall-iskop tagħha, b’mod partikolari dwar l-implimentazzjoni fil-livell tal-Istati Membri. Dan se jseħħ flimkien mal-eżerċizzju tal-valutazzjoni tar-riskju li l-Pjattaformi Online Kbar Ħafna jridu jlestu, li għandu jinkludi, fost affarijiet oħra, analiżi ta’ kif id-diżinformazzjoni u l-kontenut illegali jistgħu jiġu disseminati permezz tas-servizz tagħhom. Il-kodiċi għandu l-għan li jiġi rikonoxxut bħala Kodiċi ta’ Kondotta skont l-Att dwar is-Servizzi Diġitali biex jittaffew ir-riskji li jirriżultaw mid-diżinformazzjoni għal Pjattaformi Online Kbar Ħafna.
Il-kodiċi jibqa’ miftuħ għal Firmatarji ġodda biex jissieħbu, u l-espressjonijiet ta’ interess issa jistgħu jiġu sottomessi permezz taċ-Ċentru ta’ Trasparenza.
Aktar informazzjoni
Il-kodiċi ta’ Prattika tal-2022 dwar id-Diżinformazzjoni
Aġġornament fil-5 ta’ Ġunju: Minħabba impenji oħra, il-Kummissarju Thierry Breton se jiġi sostitwit fil-plenarja mid-Direttur Ġenerali tad-DĠ CNECT, Roberto Viola.