iStock photo Getty images plus
De réir an Rialacháin, ba cheart do NCC a bheith ina eintiteas earnála poiblí, nó faoi úinéireacht an Stáit den chuid is mó, nó ag comhlíonadh feidhmeanna riaracháin phoiblí, agus é de chumas aige tacú leis an Lárionad Inniúlachta agus leis an Líonra a misean a chomhlíonadh. Beidh saineolas taighde agus teicneolaíochta aige i réimse na cibearshlándála nó beidh rochtain aige ar an saineolas sin. Beidh sé d’acmhainn aige freisin dul i dteagmháil go héifeachtach leis an tionscal, leis an earnáil phoiblí, leis an bpobal acadúil agus taighde agus leis na saoránaigh, agus comhordú a dhéanamh leo.
Ainmneoidh gach Ballstát a NCC faoi dheireadh na bliana, agus féadfaidh sé tuairim a iarraidh ar an gCoimisiún chun measúnú a dhéanamh ar a chumas cistiú AE a bhainistiú. Beidh trí mhí ag an gCoimisiún chun freagra a thabhairt.
Áirítear ar fhoinsí cistiúcháin an Lárionaid nua um Inniúlachtaí Cibearshlándála agus Líonra NCCanna an Clár don Eoraip Dhigiteach agus, faoi choinníollacha áirithe, an Clár Fís Eorpach, chomh maith le ranníocaíochtaí ó na Ballstáit.
Tá an Lárionad um Inniúlachtaí Cibearshlándála á chur ar bun i mBúcairist, agus reáchtálfaidh an Coimisiún é go sealadach go dtí go mbeidh sé in ann feidhmiú go neamhspleách.
An 20 Deireadh Fómhair, tháinig Bord Rialaithe an Lárionaid Inniúlachta Cibearshlándála, atá comhdhéanta d’ionadaithe ó na Ballstáit agus ón gCoimisiún, le chéile go hoifigiúil den chéad uair. Phléigh an Bord Rialaithe go háirithe a rialacha nós imeachta, a chlár oibre do 2021, roinnt cinntí riaracháin a bhfuil gá leo chun go dtosóidh an Lárionad ag feidhmiú, chomh maith leis na chéad chéimeanna eile ar obair an Lárionaid.
Tá ról lárnach ag an Lárionad Eorpach um Inniúlachtaí Cibearshlándála agus ag Líonra NCCanna maidir le Straitéis Chibearshlándála an Aontais Eorpaigh a bhaint amach, arb é is aidhm di a áirithiú go mbeidh gach saoránach agus gnólacht níos sábháilte ó chibearbhagairtí, chun eintitis chriticiúla fhisiciúla agus dhigiteacha a dhéanamh níos athléimní agus chun cibearspás domhanda, oscailte, cobhsaí agus slán a thógáil.