Iċ-Ċentru u n-Network Ewropew ta’ Kompetenza fiċ-Ċibersigurtà: Il-Kummissjoni toħroġ linji gwida għall-evalwazzjoni tal-kapaċità taċ-Ċentri Nazzjonali ta’ Koordinazzjoni biex jimmaniġġjaw il-fondi tal-UE

Skont ir-Regolament, jenħtieġ li NCC ikun entità tas-settur pubbliku, jew fil-biċċa l-kbira proprjetà tal-Istat, jew li twettaq funzjonijiet ta’ amministrazzjoni pubblika, u li jkollha l-kapaċità li tappoġġa liċ-Ċentru ta’ Kompetenza u lin-Netwerk fit-twettiq tal-missjoni tagħhom. Huwa għandu jkollu fil-pussess tiegħu, jew ikollu aċċess għal, għarfien espert ta’ riċerka u teknoloġija fiċ-ċibersigurtà. Għandu jkollu wkoll il-kapaċità li jinvolvi ruħu b’mod effettiv u jikkoordina mal-industrija, mas-settur pubbliku, mal-komunità akkademika u tar-riċerka u maċ-ċittadini.

Kull Stat Membru għandu jinnomina l-NCC tiegħu sa tmiem is-sena, u jista’ jitlob opinjoni lill-Kummissjoni biex tivvaluta l-kapaċità tiegħu li jimmaniġġja l-finanzjament tal-UE. Il-Kummissjoni se jkollha tliet xhur biex twieġeb. 

Is-sorsi ta’ finanzjament taċ-Ċentru l-ġdid ta’ Kompetenza fiċ-Ċibersigurtà u n-Network tal-NCCs jinkludu l-Programm Ewropa Diġitali u, taħt ċerti kundizzjonijiet, il-Programm Orizzont Ewropa, kif ukoll kontribuzzjonijiet mill-Istati Membri.

Iċ-Ċentru ta’ Kompetenza fiċ-Ċibersigurtà qed jiġi stabbilit f’Bukarest, u l-Kummissjoni se tmexxih proviżorjament sakemm ikun jista’ jopera b’mod awtonomu.  

Fl-20 ta’ Ottubru, il-Bord ta’ Tmexxija taċ-Ċentru ta’ Kompetenza fiċ-Ċibersigurtà, li huwa magħmul minn rappreżentanti mill-Istati Membri u mill-Kummissjoni, iltaqa’ uffiċjalment għall-ewwel darba. Il-Bord ta’ Tmexxija ddiskuta b’mod partikolari r-regoli ta’ proċedura tiegħu, il-programm ta’ ħidma tiegħu għall-2021, għadd ta’ deċiżjonijiet amministrattivi, li huma meħtieġa biex iċ-Ċentru jibda jopera, kif ukoll il-passi li jmiss dwar il-ħidma taċ-Ċentru.

Iċ-Ċentru Ewropew ta’ Kompetenza fiċ-Ċibersigurtà u n-Network tal-NCCs għandhom rwol ewlieni fit-twettiq tal-Istrateġija tal-UE dwar iċ-Ċibersigurtà, bl-għan li jiġi żgurat li ċ-ċittadini u n-negozji kollha jkunu aktar sikuri mit-theddid ċibernetiku, biex l-entitajiet kritiċi fiżiċi u diġitali jsiru aktar reżiljenti u biex jinbena ċiberspazju globali, miftuħ, stabbli u sigur.

Aktar informazzjoni

• Linji gwida dwar il-valutazzjoni tal-kapaċità taċ-Ċentri Nazzjonali ta’ Koordinazzjoni biex jimmaniġġjaw il-fondi biex jissodisfaw il-missjoni u l-objettivi stabbiliti fir-Regolament (UE) 2021/887
• In-netwerku ċ-Ċentru Ewropew ta’ Kompetenza fiċ-Ċibersigurtà.