European Commission
Iċ-Ċentru ta’ Trasparenza l-ġdid se jiżgura l-viżibbiltà u r-responsabbiltà tal-isforzi tal-firmatarji fil-ġlieda kontra d-diżinformazzjoni u l-implimentazzjoni tal-impenji meħuda skont il-Kodiċi billi jkollu repożitorju uniku fejn iċ-ċittadini, ir-riċerkaturi u l-NGOs tal-UE jkunu jistgħu jaċċessaw u jniżżlu informazzjoni online.
Għall-ewwel darba b’dawn ir-rapporti ta’ referenza, il-pjattaformi qed jipprovdu għarfien u data inizjali estensiva bħal: kemm ġie evitat id-dħul mir-reklamar li jmur għand l-atturi tad-diżinformazzjoni; l-għadd jew il-valur tar-reklami politiċi aċċettati u ttikkettati jew irrifjutati; każijiet ta’ mġiba manipulattiva identifikata (jiġifieri l-ħolqien u l-użu ta’ kontijiet foloz); u informazzjoni dwar l-impatt tal-verifika tal-fatti; u fil-livell tal-Istati Membri.
Věra Jourová, il-Viċi President għall-Valuri u t-Trasparenza, qalet:
Il-pubblikazzjoni tal-ewwel rapporti tal-Kodiċi kontra d-diżinformazzjoni mġedded hija pass importanti fil-ġlieda kontra d-diżinformazzjoni u għandi l-pjaċir nara kif il-biċċa l-kbira tal-firmatarji, kbar u żgħar, qed jinvolvu ruħhom. Ninsab kuntent li għall-ewwel darba nara rappurtar fil-livell tal-pajjiż, iżda hemm bżonn ta’ aktar xogħol fir-rigward tal-għoti ta’ aċċess għad-data lir-riċerkaturi. Irid ikollna aktar trasparenza u ma nistgħux niddependu fuq il-pjattaformi online waħedhom għall-kwalità tal-informazzjoni. Jeħtieġ li jkunu verifikabbli b’mod indipendenti. Ninsab diżappuntat meta nara li r-rapport ta’ Twitter għadu lura meta mqabbel ma’ oħrajn u nistenna impenn aktar serju għall-obbligi tagħhom li jirriżultaw mill-Kodiċi. Ir-Russja hija involuta wkoll fi gwerra sħiħa ta’ diżinformazzjoni u l-pjattaformi jeħtieġ li jerfgħu r-responsabbiltajiet tagħhom.
Thierry Breton, il-Kummissarju għas-Suq Intern, qal:
Ir-rapporti tal-lum jimmarkaw pass fil-ġlieda kontra d-diżinformazzjoni online. Mhijiex sorpriża li l-livell ta’ kwalità jvarja ħafna skont ir-riżorsi li l-kumpaniji allokaw għal dan il-proġett. Huwa fl-interess tal-firmatarji kollha li jirrispettaw l-impenn tagħhom li jimplimentaw bis-sħiħ il-Kodiċi ta’ prattika kontra d-diżinformazzjoni, b’antiċipazzjoni tal-obbligi skont l-Att dwar is-Servizzi Diġitali. Billi jipprovdi aċċess sħiħ għar-rapporti tal-lum, iċ-Ċentru ta’ Trasparenza jagħti l-opportunità lil kulħadd — inklużi r-riċerkaturi u l-NGOs — biex jidħol fid-data disponibbli u jagħmel pressjoni għal titjib u responsabbiltà kontinwi.
Il-firmatarji kollha ppreżentaw ir-rapporti tagħhom fil-ħin, bl-użu ta’ mudell ta’ rappurtar armonizzat li għandu l-għan li jindirizza l-impenji u l-miżuri kollha li ffirmaw fuqhom. Madankollu, dan mhuwiex kompletament il-każ għal Twitter, li r-rapport tiegħu huwa nieqes mid-data, bl-ebda informazzjoni dwar l-impenji biex tingħata s-setgħa lill-komunità tal-verifika tal-fatti. Is-sett li jmiss ta’ rapporti minn firmatarji ewlenin tal-pjattaforma online huwa mistenni f’Lulju, li jipprovdi aktar għarfien dwar l-implimentazzjoni tal-Kodiċi u data aktar stabbli li tkopri 6-il xahar.