TikTok u YouTube jridu jipprovdu l-informazzjoni mitluba lill-Kummissjoni sat-30 ta’ Novembru 2023. Abbażi tal-valutazzjoni tat-tweġibiet, il-Kummissjoni se tivvaluta l-passi li jmiss. Dan jista’ jinvolvi l-ftuħ formali ta’ proċedimenti skont l-Artikolu 66 tad-DSA.
Skont l-Artikolu 74(2) tad-DSA, il-Kummissjoni tista’ timponi multi għal informazzjoni skorretta, mhux kompluta, jew qarrieqa bi tweġiba għal talba għal informazzjoni. F’każ ta’ nuqqas ta’ tweġiba, il-Kummissjoni tista’ tiddeċiedi li titlob l-informazzjoni permezz ta’ deċiżjoni. F’dan il-każ, in-nuqqas ta’ tweġiba sal-iskadenza jista’ jwassal għall-impożizzjoni ta’ pagamenti perjodiċi ta’ penali.
Wara d-deżinjazzjoni tagħhom bħala Pjattaforma Online Kbira Ħafna, TikTok u YouTube huma meħtieġa jikkonformaw mas-sett sħiħ ta’ dispożizzjonijiet introdotti mid-DSA, inklużi l-valutazzjoni u l-mitigazzjoni tar-riskji relatati mad-disseminazzjoni ta’ kontenut illegali u ta’ ħsara, kwalunkwe effett negattiv fuq l-eżerċizzju tad-drittijiet fundamentali, inkluż fuq id-drittijiet tat-tfal, u fuq il-protezzjoni tal-minorenni. Fid-19 ta’ Ottubru 2023 TikTok diġà rċieva talba għal informazzjoni dwar it-tixrid ta’ kontenut terroristiku u vjolenti u diskors ta’ mibegħda, l-allegat tixrid ta’ diżinformazzjoni u aspetti ġenerali dwar il-protezzjoni tal-minorenni online.