© Jens Schlueter
Din is-sensiela ġdida ta’ sejħiet se tkompli tappoġġa l-industrija Ewropea tas-semikondutturi billi ssaħħaħ il-kollaborazzjoni, il-kompetittività industrijali u t-trasferiment tal-għarfien mil-laboratorji għall-fabbriki. Il-konsorzji jistgħu jissottomettu proposti dwar suġġetti li jindirizzaw firxa wiesgħa ta’ sfidi definiti fl-Aġenda Strateġika ta’ Riċerka u Innovazzjoni — minn tranżisters f’ċipep tas-siliċju għal IA inkorporata, konnettività jew il-koordinazzjoni u l-kontroll ta’ sistemi kumplessi biex jittejbu l-prestazzjoni u s-sikurezza.
Barra minn hekk, il-proġetti ffinanzjati taħt dawn is-sejħiet il-ġodda se jikkontribwixxu għall-iżvilupp ta’ hardware b’sors miftuħ għall-industrija awtomobilistika, jappoġġaw it-tranżizzjoni lejn vetturi li jaħdmu bis-software, u jippromwovu proċessi ta’ manifattura li ma jagħmlux ħsara lill-ambjent. Sejħa konġunta speċifika mar-Repubblika tal-Korea se tavvanza l-integrazzjoni eteroġena u t-teknoloġiji tal-informatika newromorfiċi (simili għall-moħħ).
Dawn is-sejħiet huma mmirati lejn konsorzji magħmula minn atturi industrijali tal-UE attivi f’dawn l-oqsma mill-Istati Membri kollha. Dawn huma mistennija li jkunu akkumpanjati minn ammont proporzjonali ta’ finanzjament mill-Istati parteċipanti fl-Impriża Konġunta taċ-Ċipep u mill-investiment tas-settur privat. L-applikanti jistgħu jissottomettu l-applikazzjonijiet ta’ finanzjament tagħhom fuq il-portal tal-Opportunitajiet ta’ Finanzjament u ta’ Offerti sal-14 ta’ Mejju 2024 (l-ewwel skadenza). Aktar informazzjoni dwar dawn is-sejħiet u l-proċedura ta’ applikazzjoni tista’ tinstab fuq is-sit web tal-Impriża Konġunta taċ-Ċipep.