© JackF - iStock Getty Images Plus
Id-DĠ Connect tal-Kummissjoni Ewropea jimmaniġġja l-Azzjonijiet Multimedjali li għandhom l-għan li jinvolvu liċ-ċittadini fil-proċess tat-tfassil tal-politika tal-UE billi jipprovdulhom informazzjoni dwar suġġetti Ewropej minn perspettivi pan-Ewropej, jiġifieri juru aktar minn perspettiva nazzjonali biss. Jingħata appoġġ għall-produzzjoni u t-tixrid ta’ informazzjoni u kontenut, filwaqt li tiġi rispettata l-indipendenza editorjali sħiħa, garantita permezz ta’ klawżola speċjali fil-ftehimiet kollha ta’ għotja.
Bħala parti mill-Azzjonijiet Multimedjali, din is-Sejħa hija miftuħa għall-organizzazzjonijiet tal-midja tal-aħbarijiet li jistgħu jibnu fuq rappurtar ta’ kwalità tax-xandara tar-radju madwar l-UE, filwaqt li jagħmlu l-aħjar użu mit-teknoloġiji u l-formati diġitali bħall-podcasting. Ir-riżultati mistennija jinkludu formati awdjo regolari ta’ kwalità għolja u editorjalment indipendenti, li jipprovdu perspettiva fil-fond u diversa dwar l-affarijiet tal-UE f’kemm jista’ jkun lingwi tal-UE.
L-applikanti għandhom jiżguraw kopertura f’mill-inqas 6 lingwa tal-UE, permezz ta’ netwerk ta’ mill-inqas 4 membru. Jenħtieġ li jipproponu grilja ta’ programmazzjoni b’mill-inqas 10 minuta ta’ kontenut oriġinali għal kull membru u għal kull lingwa fil-ġimgħa, b’kopertura fil-fond tal-affarijiet kurrenti tal-UE permezz ta’ rivisti, rapporti, dokumentarji u/jew wirjiet ta’ taħditiet, u b’hekk jiġu esklużi bullettini tal-aħbarijiet u rieżamijiet tal-istampa.
Il-membri tan-netwerk se jaqsmu r-responsabbiltà editorjali. Huma se jfasslu linji gwida editorjali, jimmonitorjaw il-konformità minn bord editorjali konġunt, u jinvolvu sottokuntrattur indipendenti biex jivvaluta l-kwalità editorjali u l-perspettiva Ewropea tal-kontenut prodott fuq bażi regolari.
Bħala minimu, l-applikanti jridu jiżguraw li dawn il-programmi jilħqu b’mod konġunt mill-inqas 1 miljun semmiegħ uniku kull xahar (permezz ta’ kanali tar-radju u diġitali) u 200.000 viżitatur diġitali uniku bħala medja kull xahar.
Sabiex tintlaħaq l-akbar udjenza possibbli u tiġi żgurata t-trasparenza lejn organizzazzjonijiet tal-midja oħra potenzjalment interessati, in-netwerk għandu jiżgura x-xandir (mill-ġdid) jew il-pubblikazzjoni mill-ġdid ta’ kontenut minn 25 midja li mhumiex membri.
Il-proposti huma mistennija li jkopru 24-il xahar u jibdew kmieni fl-2023.
L-ammont massimu tal-għotja huwa ta’ EUR 4.4 miljun, li jirrappreżenta sa 95 % tal-ispejjeż totali eliġibbli.
L-applikazzjonijiet għandhom jiġu stampati, iffirmati, u mibgħuta mhux aktar tard mit-Tnejn 12 ta’ Settembru 2022.
Jekk jogħġbok ftakar li kull applikant huwa meħtieġ jibgħat email qabel l-iskadenza biex jinforma lill-Kummissjoni dwar is-sottomissjoni fuq karta.
Aktar informazzjoni
- Il-mistoqsijiet għal din is-sejħa għandhom jintbagħtu lil cnect-multimedia-actions@ec.europa.eu mhux aktar tard mill-5 ta’ Settembru. Il-mistoqsijiet u t-tweġibiet kollha se jiġu ppubblikati, b’mod anonimu, fuq din il-paġna.
- Għal aktar dettalji, jekk jogħġbok ara l-paġna web tal-Azzjonijiet Multimedjali u l-Anness tal-aħħar Deċiżjoni ta’ Finanzjament (2022).
- Għal ħarsa ġenerali lejn opportunitajiet oħra ta’ għotjiet għall-midja tal-aħbarijiet, ara l-aġġornamenti f’ din il-paġna, il-ħarsa ġenerali tal-iskeda informattiva ta’ Marzu 2022 u/jew ingħaqad mal-webinar nhar il-Ħamis 7 ta’ Lulju 10h CEST.
- Tista’ tabbona biex tirċievi aġġornamenti awtomatiċi kull meta l-artikli relatati mal-midja jiġu ppubblikati fuq is-sit web tas-CNECT.
(Jekk taqra b’lingwa oħra, ikkonsulta l-oriġinal bl-Ingliż għad-dokumenti tas-sejħa.)