Sejħa konġunta għal interess biex tissieħeb fil-Kodiċi ta’ Prattika dwar id-Diżinformazzjoni

Is-sejħa hija indirizzata lil firxa wiesgħa ta’ partijiet ikkonċernati, inklużi fornituri ta’ servizzi online li jipparteċipaw fid-disseminazzjoni ta’ kontenut lill-pubbliku bħall-media soċjali jew servizzi ta’ tiftix, applikazzjonijiet ta’ messaġġi privati, partijiet ikkonċernati mis-settur tar-reklamar u atturi oħra li jipprovdu servizzi li jistgħu jintużaw biex jimmonetizzaw id-diżinformazzjoni. Il-partijiet ikkonċernati li jgħinu biex jiġi indirizzat it-tixrid tad-diżinformazzjoni permezz tal-għodod, l-isforzi tekniċi, il-ħidma filantropika jew l-għarfien espert speċifiku tagħhom jistgħu jsiru firmatarji wkoll.

L-inċentivi għas-sħubija fil-Kodiċi ta’ Prattika dwar id-Diżinformazzjoni jinkludu: li jsir parti minn qafas tal-UE, innovattiv u robust li għandu l-għan li jipprovdi lill-utenti b’salvagwardji xierqa fir-rigward tal-użu ħażin tas-servizzi online biex ixerrdu d-diżinformazzjoni. Il-firmatarji jistgħu jiggwadanjaw mill-kondiviżjoni tal-aħjar prattiki u mill-istabbiliment ta’ sinerġiji possibbli mas-servizzi tal-firmatarji l-oħra. Il-parteċipazzjoni fil-Kodiċi se tikkontribwixxi għall-integrità, il-kredibbiltà u l-immaġni pubblika ġenerali tal-firmatarji, filwaqt li tipprovdi wkoll protezzjoni kontra l-ħsara għar-reputazzjoni li tirriżulta mir-riskji relatati mat-tixrid tad-diżinformazzjoni.  Barra minn hekk, il-pjattaformi kbar ħafna se jibbenefikaw ukoll mill-parteċipazzjoni fil-Kodiċi msaħħaħ b’antiċipazzjoni ta’ obbligi ġodda applikabbli għalihom skont l-Att dwar is-Servizzi Diġitali (DSA) propost, b’mod partikolari fir-rigward tal-valutazzjoni tar-riskju, il-mitigazzjoni tar-riskju, l-awtonomizzazzjoni tal-utenti, u t-trasparenza fir-rigward tar-reklamar.

Il-firmatarji l-ġodda huma mistennija li jiffurmaw il-Kodiċi rivedut flimkien mal-firmatarji attwali rigward l-abbozzar tal-impenji li huma rilevanti għas-servizzi tagħhom u li jissottoskrivu għal dawn l-impenji.

Il-firmatarji prospettivi ġodda huma mistiedna jippreżentaw l-applikazzjoni tagħhom sa mhux aktar tard mill-15 ta’ Novembru, sabiex jiffaċilitaw il-proċess u t-twassil ta’ Kodiċi ġdid fiż-żmien mistenni. Wara dik id-data, il-partijiet ikkonċernati xorta jkunu jistgħu jingħaqdu u jieħdu impenji rilevanti tal-Kodiċi ladarba dan jiġi ffinalizzat u miftuħ għall-iffirmar, iżda ma jibqax jieħu sehem fl-abbozzar tiegħu.

Din is-Sejħa ssegwi l-Gwida tal-Kummissjoni dwar it-Tisħiħ tal-Kodiċi ta’ Prattika dwar id-Diżinformazzjoni, ippubblikata fis-26 ta’ Mejju 2021 li tissuġġerixxi parteċipazzjoni usa’ fil-Kodiċi biex dan isir rispons aktar komprensiv u kkoordinat għat-tixrid tad-diżinformazzjoni. Il-partijiet interessati huma mħeġġa jippreżentaw l-applikazzjonijiet tagħhom malajr kemm jista’ jkun sabiex jinvolvu ruħhom fl-abbozzar tal-Kodiċi l-ġdid minn stadju bikri.