It-tieni rapport dwar il-progress tal-Istati Membri fl-implimentazzjoni tas-Sett ta’ Għodod tal-UE dwar iċ-Ċibersigurtà tal-5G

Ir-rapport tħejja u ntlaħaq qbil dwaru mill-awtoritajiet tal-Istati Membri (il-Grupp ta’ Kooperazzjoni tal-NIS), bl-appoġġ tal-Kummissjoni u tal-Aġenzija tal-UE għaċ-Ċibersigurtà (ENISA). 

Ir-rapport ikopri l-implimentazzjoni tal-miżuri strateġiċi u tekniċi tas-Sett ta’ Għodod tal-UE. Il-miżuri Strateġiċi jinkludu miżuri li jikkonċernaw aktar setgħat regolatorji għall-awtoritajiet biex jiskrutinizzaw l-akkwist u l-użu tan-network, miżuri speċifiċi biex jiġu indirizzati r-riskji relatati ma’ vulnerabbiltajiet mhux tekniċi, kif ukoll inizjattivi possibbli għall-promozzjoni ta’ katina tal-provvista u tal-valur tal-5G sostenibbli u diversa sabiex jiġu evitati riskji sistemiċi ta’ dipendenza fit-tul. Il-miżuri Tekniċi jinkludu miżuri biex tissaħħaħ is-sigurtà tan-networks u tat-tagħmir 5G billi jiġu indirizzati r-riskji li jirriżultaw minn teknoloġiji, proċessi, fatturi umani u fiżiċi. Ir-rapport jagħti wkoll ħarsa ġenerali lejn il-linji ta’ ħidma li għaddejjin bħalissa dwar iċ-ċibersigurtà tal-5G fil-livell tal-UE.