© ipopba - iStock Getty Images Plus
L-ewwel seba’ pjattaformi diġà ppubblikaw ir-rapporti tagħhom, u l-bqija għandhom sas-6 ta’ Novembru biex jagħmlu dan. Dawn l-ewwel seba’ pjattaformi huma Amazon, LinkedIn, TikTok, Pinterest, Snapchat, Zalando (.pdf) u Bing.
Ir-rapport dwar it-trasparenza, flimkien ma’ bażi tad-data tal-Kummissjoni dwar id-dikjarazzjonijiet tar-raġunijiet, kif ukoll rekwiżiti addizzjonali għal servizzi deżinjati, bħall-aċċess futur għad-data għar-riċerkaturi, se jiżguraw it-trasparenza u r-responsabbiltà fuq il-moderazzjoni tal-kontenut online — għall-benefiċċju taċ-ċittadini, ir-riċerkaturi u r-regolaturi. Dan se jikkontribwixxi b’mod sinifikanti għall-iskrutinju u r-responsabbiltà pubblika.
Ir-rapporti ta’ trasparenza jridu jinkludu informazzjoni dwar il-moderazzjoni tal-kontenut fuq is-servizzi tal-pjattaformi, li tagħti dettalji dwar l-għadd ta’ avviżi li jirċievu mill-utenti (u ladarba jkunu fis-seħħ, sinjalaturi fdati), l-għadd ta’ biċċiet ta’ kontenut imneħħija fuq l-inizjattiva proprja tal-pjattaforma, l-għadd ta’ ordnijiet li jirċievu mill-awtoritajiet ġudizzjarji jew amministrattivi nazzjonali rilevanti kollha, u l-preċiżjoni u r-rata ta’ żball tas-sistemi awtomatizzati tagħhom ta’ moderazzjoni tal-kontenut. Ir-rapporti jridu jinkludu wkoll informazzjoni dwar it-timijiet tal-moderazzjoni tal-kontenut, inklużi l-kwalifiki u l-għarfien espert lingwistiku tagħhom.
Il-pjattaformi Online Kbar Ħafna u l-Magni tat-Tiftix iridu jippubblikaw dawn ir-rapporti ta’ trasparenza għall-ewwel darba, wara d-deżinjazzjoni tagħhom fil-25 ta’ April, u se jkollhom jagħmlu dan kull sitt xhur. Il-pjattaformi b’inqas minn 45 miljun utent u servizzi intermedjarji se jkollhom jippubblikaw ukoll rapporti annwali ta’ trasparenza ladarba d-DSA jibda japplika għalihom fi Frar 2024. Id-DSA jagħti wkoll lill-Kummissjoni l-possibbiltà li tadotta atti ta’ implimentazzjoni biex tistabbilixxi mudelli dwar il-forma, il-kontenut, u dettalji oħra tar-rapporti ta’ trasparenza.