© GettyImages Blue Planet Studio
Leis an Treoirphlean Cibearshlándála, ba cheart gníomhaithe ábhartha an Aontais (a chiallaíonn eintitis aonair ar leibhéal an Aontais agus líonraí eintiteas) a chumasú chun tuiscint a fháil ar conas idirghníomhú agus an úsáid is fearr a bhaint as na sásraí atá ar fáil ar feadh shaolré iomlán an bhainistithe géarchéime. Is é is aidhm dó a mhíniú cad is cibir-ghéarchéim ann agus cad a spreagann sásra cibirghéarchéime ar leibhéal an Aontais. Mínítear ann úsáid na sásraí atá ar fáil amhail an Sásra um Éigeandáil Chibearshlándála, lena n-áirítear Cúltaca Cibearshlándála an Aontais, chun ullmhú do ghéarchéim a eascraíonn as teagmhas mórscála cibearshlándála a bhainistiú, freagairt di agus téarnamh uaithi. Thairis sin, tá sé d’aidhm aige comhar níos struchtúrtha a chothú idir gníomhaithe sibhialta agus míleata, lena n-áirítear comhar le hEagraíocht Chonradh an Atlantaigh Thuaidh (ECAT), ós rud é go bhféadfadh cibirtheagmhas mórscála a dhéanann difear do bhonneagar sibhialtach an Aontais ar a bhfuil an t-arm ag brath sásraí freagartha ECAT a ghníomhachtú freisin.
Is ionstraim neamhcheangailteach é an Treoirphlean Cibearshlándála lena sainaithnítear gníomhaíochtaí sonracha do ghníomhaithe ábhartha le linn cibirghéarchéime agus lenar féidir éifeachtacht fhoriomlán an chreata bainistithe cibirghéarchéime a fheabhsú. Nuashonraítear leis an treoirphlean a leagtar amach i Moladh (AE) 2017/1584 ón gCoimisiún maidir le freagairt chomhordaithe ar theagmhais agus géarchéimeanna cibearshlándála mórscála, agus tá sé bunaithe ar na torthaí agus ar na ceachtanna a foghlaimíodh ó chleachtaí ar leibhéal an Aontais ó glacadh an moladh sin.