European Commission
Le gach táscaire tomhaisfear an chaoi a bhfuil an tAontas ag déanamh na spriocanna maidir le bonneagar digiteach, scileanna, gnó agus seirbhísí poiblí a bhaint amach. Cuirfidh an Coimisiún i láthair an dul chun cinn a rinneadh sa chéad tuarascáil maidir le staid na Deacáide Digití, ar cheart í a fhoilsiú tar éis an tsamhraidh. Thairis sin, ba cheart do na Ballstáit na táscairí a úsáid chun a gconairí náisiúnta a shainiú chun na spriocanna a shaothrú ar an leibhéal náisiúnta.
Seo mar a labhair Margrethe Vestager, an Leas-Uachtarán Feidhmiúcháin um Eoraip atá oiriúnach don ré dhigiteach:
Le Deacáid Dhigiteach 2030, táimid tar éis dul i dtreo chlaochlú digiteach na hEorpa i gcomhar leis na Ballstáit. Tá sé ríthábhachtach faireachán a dhéanamh ar an dul chun cinn chun sinn a choinneáil ar an mbóthar ceart agus chun an todhchaí dhigiteach atá beartaithe a bhaint amach i dteannta a chéile.
Seo mar a labhair Thierry Breton, an Coimisinéir um an Margadh Inmheánach:
Is é Deacáid Dhigiteach 2030 ár bplean tionsclaíoch do chlaochlú digiteach na hEorpa, le spriocanna sonracha i réimse an bhonneagair dhigitigh, scileanna, gnó agus seirbhísí rialtais. Ní mór dúinn anois an plean sin a aistriú go conairí nithiúla chun na spriocanna a bhaint amach. A bhuí leis na príomhtháscairí feidhmíochta a shainmhíníomar inniu, beimid in ann an dul chun cinn atá déanta againn feadh na gconairí sin a thomhas agus a chinntiú gur féidir linn ár n-uaillmhianta a chomhlíonadh. Trí bheith ag obair le chéile, beimid in ann leas iomlán a bhaint as na deiseanna a ghabhann leis na teicneolaíochtaí digiteacha inár saol laethúil agus gairmiúil ón am seo go dtí 2030.
Ba cheart do na Ballstáit treochláir náisiúnta a ghlacadh faoin 9 Deireadh Fómhair. Leagfaidh siad amach a gconairí náisiúnta agus na bearta beartais a bhfuil sé i gceist acu a dhéanamh mar rannchuidiú le hiarracht chomhchoiteann an Aontais na cuspóirí agus na spriocanna a bhaint amach faoi 2030.
Treoir do na Ballstáit maidir le treochláir straitéiseacha náisiúnta na Deacáide Digití a ullmhú