WiFi4EU: Ċittadini

X’inhi WiFi4EU?

WiFi4EU hija inizjattiva mmexxija mill-Kummissjoni Ewropea biex tipprovdi konnessjonijiet tal-Wi-Fi pubbliku fil-muniċipalitajiet lokali. Bħala parti mill-Istrateġija għal Suq Uniku Diġitali, il-Kummissjoni Juncker impenjat ruħha biex ittejjeb il-konnettività madwar l-Ewropa. L-inizjattiva WiFi4EU hija l-prodott ta’ dan il-għan. WiFi4EU għandha l-għan li toħloq network pan-Ewropew ta’ hotspots pubbliċi għall-Ewropej fil-muniċipalitajiet madwar l-Unjoni Ewropea.

L-użu ta’ WiFi4EU

Il-muniċipalità lokali tiegħek tista’ tapplika għal vawċer b’valur ta’ EUR 15 000 li jkopri l-ispejjeż tal-installazzjoni tal-hotspots tal-Wi-Fi fil-belt tiegħek. Jekk jirnexxielha, il-muniċipalità tiegħek tospita hotspot ta’ WiFi4EU għal perjodu minimu ta’ tliet snin. Ir-residenti lokali u l-viżitaturi kollha b’hekk ikunu jistgħu jaċċessaw l-internet liberament.

WiFi4EU – Bla Ħlas Għalik

WiFi4EU se tkun kompletament bla ħlas. Ir-regoli stabbiliti mill-Kummissjoni Ewropea jiżguraw li la rimunerazzjoni monetarja, u lanqas forom indiretti ta’ ħlas, permezz ta’ reklamar jew ipproċessar tad-data, mhuma se jkunu permessi fuq in-network ta’ WiFi4EU għall-perjodu ta’ tliet snin ta’ impenn.

WiFi4EU – Nikkonnettjawk

Il-konnessjoni man-network ta’ WiFi4EU se tkun sempliċi ħafna. Il-Kummissjoni Ewropea tat mandat li l-isem tan-network (l-SSID tiegħu) għandu jkun “WiFi4EU”. Dan se jkun l-istess kullimkien, biex il-hotspots ta’ WiFi4UE jkunu rikonoxxibbli madwar l-Ewropa. Meta tikkonnettja man-network tal-Wi-Fi bla ħlas għall-ewwel darba, tkun ridirett lejn paġna tal-login sigura (captive portal). Inti tkun tista’ tagħmel sign in b’sempliċi funzjonalità click-to-connect. Ladarba tikkonnettja man-network tal-Wi-Fi, tista’ tibda tuża l-internet liberament bl-użu ta’ WiFi4EU! Barra minn hekk, jekk tiskonnettja u terġa’ tikkonnettja fi żmien 12-il siegħa, m’intix se tintalab terġa’ tilloggja.

Iktbilna