iStock photo Getty images plus
Is-sejbiet tar-rapport jikkonfermaw li r-Regolament ikompli jiggarantixxi l-bilanċ essenzjali bejn il-protezzjoni tad-drittijiet tal-utenti finali u l-appoġġ ta’ ambjent kompetittiv fis-Suq Uniku Diġitali tal-UE.
Ir-rapport jindika wkoll il-bidliet teknoloġiċi u tas-suq li għaddejjin minn meta nħareġ l-ewwel rapport dwar l-implimentazzjoni tar-Regolament dwar l-aċċess miftuħ għall-internet fl-2019. Fid-dawl ta’ dawn is-sejbiet, ir-rapport jidentifika oqsma fejn gwida ulterjuri dwar l-applikazzjoni tar-regoli tal-aċċess għall-internet miftuħ tista’ tkun xierqa biex jiġi żgurat li tali regoli jibqgħu rilevanti fil-futur. Pereżempju, ir-rapport isib li, hekk kif ikompli l-iżvilupp tat-teknoloġija u jitfaċċaw servizzi innovattivi, bħall-awtomatizzazzjoni tat-trasport jew il-kirurġija remota, ċarezza legali akbar fl-interpretazzjoni ta’ ċerti kunċetti u definizzjonijiet inklużi fir-Regolament tista’ tkun ta’ benefiċċju kemm għall-innovaturi kif ukoll għall-utenti finali.
Il-bidliet teknoloġiċi u tas-suq li għaddejjin bħalissa huma wkoll is-suġġett tal-konsultazzjoni esploratorja dwar il-futur tal-konnettività u l-infrastruttura, li tfittex il-fehmiet tal-partijiet ikkonċernati dwar kif tista’ tgħin fl-implimentazzjoni tal-infrastruttura meħtieġa biex l-Ewropa tkun tista’ tmexxi t-trasformazzjoni diġitali. Il-konsultazzjoni tibqa’ għaddejja sad-19 ta’ Mejju 2023.
Il-prinċipju tal-internet miftuħ ġie inkluż ukoll fid-Dikjarazzjoni Ewropea dwar id-Drittijiet u l-Prinċipji Diġitali, li turi l-importanza kontinwa tiegħu fl-UE.