Meta mqabbla mal-ewwel pubblikazzjoni tar-Rapport dwar l-Istat tad-Dritt adottat fl-2020, l-Istati Membri u l-UE kollha kemm hi huma mħejjija ħafna aħjar biex jidentifikaw, jipprevjenu u jindirizzaw l-isfidi emerġenti. Dan jikkontribwixxi għar-reżiljenza tad-demokraziji Ewropej tagħna u għall-fiduċja reċiproka fl-UE. Jikkontribwixxi wkoll għal funzjonament tajjeb tas-suq uniku u huwa ta’ benefiċċju għall-ambjent tan-negozju li jrawwem il-kompetittività u t-tkabbir sostenibbli.
Mill-ewwel pubblikazzjoni tiegħu fl-2020, ir-rapport sar mutur veru ta’ riformi pożittivi: żewġ terzi (68 %) tar-rakkomandazzjonijiet maħruġa fl-2023 ġew indirizzati, kompletament jew parzjalment. Madankollu, f’xi Stati Membri għad hemm tħassib sistematiku u s-sitwazzjoni kompliet tmur għall-agħar. Dan it-tħassib huwa indirizzat fir-rakkomandazzjonijiet tar-rapport ta’ din is-sena.
Ir-rapport ta’ din is-sena jinkludi, għall-ewwel darba, erba’ kapitoli tal-pajjiżi dwar l-iżviluppi fl-Albanija, fil-Montenegro, fil-Maċedonja ta’ Fuq u fis-Serbja. L-inklużjoni ta’ dawn il-pajjiżi tat-tkabbir fir-Rapport dwar l-Istat tad-Dritt, l-aktar avvanzati fil-proċess, se tappoġġa l-isforzi ta’ riforma tagħhom, tgħin lill-awtoritajiet jagħmlu aktar progress fil-proċess ta’ adeżjoni u jħejju għall-kontinwazzjoni tal-ħidma fuq l-istat tad-dritt bħala Stat Membru futur.
Il-libertà u l-pluraliżmu tal-media
Mill-aħħar Rapport dwar l-Istat tad-Dritt, diversi Stati Membri għamlu passi konkreti biex itejbu s-sikurezza u l-ambjent tax-xogħol tal-ġurnalisti, anke fid-dawl ta’ inizjattivi tal-Kummissjoni bħall-Att Ewropew dwar il-Libertà tal-Media (EMFA), diġà fis-seħħ u applikabbli bis-sħiħ minn Awwissu 2025, id-direttiva u r-rakkomandazzjoni “Anti-SLAPP” u r-Rakkomandazzjoni dwar is-sikurezza tal-ġurnalisti.
Aqra l-istqarrija għall-istampa sħiħa u l-ħames Rapport annwali dwar l-Istat tad-Dritt.