Il-Patt dwar l-IA

Fl-2021, il-Kummissjoni ppreżentat il- proposta tagħha għall-Att dwar l-IA li bħalissa jinsab fl-istadji finali tal-proċess leġiżlattiv. F’Diċembru 2023 intlaħaq qbil politiku mill-koleġiżlaturi u t-test finali għandu jiġi approvat fil-ġimgħat li ġejjin.

Filwaqt li xi dispożizzjonijiet tal-Att dwar l-IA diġà se japplikaw ftit wara l-adozzjoni tar-Regolament, oħrajn (pereżempju, xi rekwiżiti dwar is-sistemi tal-IA b’riskju kbir) se jkunu applikabbli biss fi tmiem perjodu tranżitorju (jiġifieri ż-żmien bejn id-dħul fis-seħħ u d-data tal-applikabbiltà). 

F’dan il-kuntest, il-Kummissjoni qed tniedi l-Patt dwar l-IA, billi tfittex l-impenn volontarju tal-industrija biex tantiċipa l-Att dwar l-IA u tibda timplimenta r-rekwiżiti tiegħu qabel l-iskadenza legali.

Dan huwa aktar u aktar importanti minħabba li f’dawn l-aħħar ftit xhur l-iżviluppi teknoloġiċi u l-adozzjoni ġenerali ta’ sistemi tal-IA bi skop ġenerali u ġenerattivi kienu qed jaċċelleraw. Filwaqt li ħafna atturi fil-qasam diġà ħadu passi biex itaffu t-tħassib, huma meħtieġa aktar azzjonijiet urġenti.

1.    X’se jikkonsisti l-Patt? 

Il-Patt dwar l-IA huwa skema li se trawwem l-implimentazzjoni bikrija tal-miżuri previsti mill-Att dwar l-IA. Il-kumpaniji se jkollhom l-opportunità li juru u jikkondividu l-impenn tagħhom lejn l-objettivi tal-Att futur dwar l-IA u jħejju kmieni biex ikunu lesti għall-implimentazzjoni tiegħu. B’mod aktar speċifiku, il-Patt se jħeġġeġ lill-kumpaniji jikkomunikaw b’mod volontarju l-proċessi u l-prattiki li qed jistabbilixxu biex iħejju għall-konformità u jiżguraw li t-tfassil, l-iżvilupp u l-użu tal-IA jkunu affidabbli.

l-impenji tal-industrija se jieħdu l-forma ta’ wegħdiet (dikjarazzjonijiet ta’ impenn) biex jaħdmu lejn il-konformità mal-Att dwar l-IA li jmiss flimkien ma’ dettalji dwar azzjonijiet konkreti li qed jitwettqu jew li huma ppjanati biex jiġu indirizzati rekwiżiti speċifiċi tal-Att futur dwar l-IA. Dawn l-impenji jistgħu jinkludu approċċ gradwali, jiġifieri jiddeskrivu pjanijiet biex, f’qafas ta’ żmien definit, jimxu lejn livelli ogħla ta’ ambizzjoni mill-azzjonijiet diġà implimentati. 

Il-wegħdiet jinġabru u jiġu ppubblikati mill-Kummissjoni, sabiex jipprovdu viżibbiltà, iżidu l-kredibbiltà, u jibnu fiduċja addizzjonali fit-teknoloġiji żviluppati mill-kumpaniji li jieħdu sehem fil-Patt. 

2.    Liema atturi se jkunu involuti? 

Il-Patt dwar l-IA se jlaqqa’, fuq bażi volontarja, atturi ewlenin tal-industrija tal-UE u mhux tal-UE biex jieħdu sehem f’komunità ta’ skambju tal-aħjar prattiki li se jkollha l-għan li żżid is-sensibilizzazzjoni dwar il-prinċipji li jirfdu l-Att futur dwar l-IA, u (mal-adozzjoni tal-Att) tiżgura impenn biex tantiċipa u timla d-distakk qabel l-applikabbiltà tar-regolament dwar l-IA.

3.    X’inhuma l-benefiċċji tal-Patt għall-parteċipanti?

Il-Kummissjoni se taħdem flimkien mal-parteċipanti u se tappoġġahom:

• il-bini ta’ fehim komuni tal-objettivi tal-Att futur dwar l-IA;  
• it-teħid ta’ azzjonijiet konkreti biex wieħed jifhem, jadatta u jħejji għall-implimentazzjoni futura tal-Att dwar l-IA (eż. jibni proċessi interni, iħejji l-persunal u jivvaluta lilu nnifsu s-sistemi tal-IA);
• il-kondiviżjoni tal-għarfien u ż-żieda fil-viżibbiltà u l-kredibbiltà tas-salvagwardji stabbiliti biex tintwera IA affidabbli; u fl-aħħar mill-aħħar
• il-bini ta’ fiduċja addizzjonali fit-teknoloġiji tal-IA. 

Il-Patt se jippermetti lil dawk li jkunu minn ta’ quddiem nett u lill-parteċipanti ambizzjużi jittestjaw u jaqsmu s-soluzzjonijiet tagħhom mal-komunità usa’, u b’hekk jagħtihom vantaġġ lil dawk li jidħlu l-ewwel.

4.    X’inhuma l-passi li jmiss?

F’Novembru 2023, il-Kummissjoni nediet “sejħa għal interess” għall-organizzazzjonijiet li lesti jinvolvu ruħhom b’mod attiv fil-Patt dwar l-IA. Bħala l-pass li jmiss, il-Kummissjoni se tlaqqa’ flimkien lill-partijiet interessati, fl-ewwel nofs tal-2024, biex jiddiskutu l-ambizzjonijiet tal-Patt u jiġbru ideat preliminari u l-aħjar prattiki li jistgħu jispiraw wegħdiet futuri. Wara l-adozzjoni formali tal-Att dwar l-IA, il-Patt dwar l-IA se jitnieda uffiċjalment u l-organizzazzjonijiet “ta’ quddiem nett” se jiġu mistiedna jippubblikaw l-ewwel wegħdiet tagħhom.

Interessat li tkun parti interessata attiva fil-Patt tal-IA? Ingħaqad mal-inizjattiva f’isem il-kumpanija tiegħek!

Il-kumpanija tiegħek diġà pproduċiet linji gwida jew proċessi interni biex tiżgura d-disinn, l-iżvilupp u l-użu ta’ sistemi affidabbli tal-IA? Aqsamhom u ttestjahom mal-komunità tal-Patt tal-IA!