An tSaoráid um Chónascadh na hEorpa - SCE Digiteach

Tá sé ar cheann de na príomhdhúshláin dár nglúin an Eoraip a dhéanamh níos digití. Leis an méadú ar idirghníomhaíochtaí ar líne agus teacht chun cinn bealaí nua maireachtála, oibre agus gnó a dhéanamh, léiríodh an ról lárnach atá ag teicneolaíochtaí digiteacha inár ngeilleagar agus inár sochaí. Dá réir sin, tá bonneagair nascachta digití iomchuí de dhíth ar theicneolaíochtaí digiteacha chun go bhfeidhmeoidh siad.  

In ainneoin go bhfuil méadú ag teacht ar an ngá atá le nascacht, tá bearna shuntasach fós sa chistiú príobháideach agus poiblí. Is freagairt ar an mbearna sin í an tSaoráid um Chónascadh na hEorpa – An Clár Digiteach. In éineacht le hionstraimí cistiúcháin eile, lena n-áirítear an tSaoráid Téarnaimh agus Athléimneachta agus InvestEU, cuideoidh SCE Digiteach le tacú le méid infheistíochtaí nach bhfacthas a leithéid riamh roimhe atá dírithe ar bhonneagar ardfheidhmíochta atá sábháilte, slán agus inbhuanaithe. Go háirithe, líonraí Gigighiotáin agus 5G ar fud an Aontais. Beidh an ghníomhaíocht sin tábhachtach chun tacú le claochlú digiteach na hEorpa, mar a leagtar amach sa togra maidir leis an gConair i dtreo na Deacáide Digití.

Thairis sin, cuirfidh SCE Digiteach le hacmhainneacht agus athléimneacht mhéadaithe na mbonneagar cnámh droma digiteach i gcríocha uile an Aontais, go háirithe sna Réigiúin is Forimeallaí. Tá sé sin ríthábhachtach chun go leanfaidh uaillmhian na hEorpa de bheith ceannasach agus neamhspleách go digiteach sna blianta amach romhainn.

Áirítear an méid seo a leanas ar na príomhghníomhaíochtaí dá bhforáiltear faoi SCE Digiteach:

• Líonraí fíor-ardacmhainneachta, lena n-áirítear córais 5G, a imscaradh i limistéir ina bhfuil gníomhaithe socheacnamaíocha lonnaithe (féach nascacht 5G le haghaidh pobail chliste);
• Cumhdach gan bhriseadh le córais 5G ar na príomhchonairí iompair uile a ráthú, lena n-áirítear na gréasáin thras-Eorpacha iompair (féach cumhdach 5G feadh conairí trasteorann);
• Líonraí cnámh droma nua nó uasghrádú suntasach ar líonraí cnámh droma atá ann cheana a chur in úsáid, lena n-áirítear cáblaí fomhuirí, laistigh de na Ballstáit agus eatarthu agus idir an tAontas agus tríú tíortha (féach an Tionscnamh Eorpach um Bonneagar Cumarsáide Candamaí, Líonraí cnámh droma le haghaidh cónaidhmeanna néalríomhaireachta uile-Eorpacha, Nascacht cnámh droma le haghaidh Tairseacha Domhanda Digiteacha);
• Bonneagar nascachta digití a bhaineann le tionscadail trasteorann i réimsí an iompair nó an fhuinnimh a chur chun feidhme agus tacú leis (féach an Ghníomhaíocht um Chomhordú agus um Thacaíocht).