Straitéis Chibearshlándála an Aontais Eorpaigh

Chuir an Coimisiún Eorpach agus Ardionadaí an Aontais do Ghnóthaí Eachtracha agus don Bheartas Slándála Straitéis nua Chibearshlándála an Aontais i láthair. 

Le claochlú digiteach na sochaí, leathnaíodh timpeallacht na bagartha agus tá dúshláin nua ag baint leis, rud a éilíonn freagairtí oiriúnaithe agus nuálacha. Tá méadú ag teacht i gcónaí ar líon na gcibirionsaithe, agus tá ionsaithe atá ag éirí níos sofaisticiúla ag teacht ó raon leathan foinsí laistigh agus lasmuigh den Aontas araon.

Dá bhrí sin, ba cheart don Aontas a bheith ar thús cadhnaíochta sna hiarrachtaí chun digitiú slán a bhaint amach. Ba cheart é a bheith ina noirm spreagtha le haghaidh réitigh agus caighdeáin chibearshlándála den chéad scoth le haghaidh seirbhísí fíor-riachtanacha agus bonneagair chriticiúla, chomh maith le forbairt agus cur i bhfeidhm teicneolaíochtaí nua a chur chun cinn. Beidh freagracht ar gach rialtas, gnólacht agus saoránach as claochlú digiteach cibearshlán a áirithiú. 

Cad faoi a bhfuil an straitéis?

Déantar cur síos sa straitéis ar an gcaoi ar féidir leis an Aontas leas a bhaint as a chuid uirlisí agus acmhainní uile agus iad a neartú chun bheith ceannasach ó thaobh na teicneolaíochta de. Leagtar amach ann freisin conas is féidir leis an Aontas dlús a chur lena chomhar le comhpháirtithe ar fud an domhain a roinneann ár luachanna maidir leis an daonlathas, an smacht reachta agus cearta an duine.

Ní mór ceannasacht theicneolaíoch an Aontais a bhunú ar athléimneacht na seirbhísí agus na dtáirgí nasctha uile. Ní mór do na ceithre chibearphobal uile – iad siúd a bhfuil baint acu leis an margadh inmheánach, le forfheidhmiú an dlí, taidhleoireacht agus cosaint – oibriú níos dlúithe i dtreo feasacht chomhroinnte ar bhagairtí. Ba cheart dóibh a bheith réidh chun freagairt i dteannta a chéile nuair a tharlaíonn ionsaí, ionas gur féidir leis an Aontas a bheith níos mó ná suim a chodanna.

Clúdaíonn an straitéis slándáil seirbhísí riachtanacha amhail ospidéil, eangacha fuinnimh, iarnróid agus an méadú leanúnach atá ag teacht ar líon na réad nasctha inár dtithe, inár n-oifigí agus inár monarchana.  Is é is aidhm don straitéis cumais chomhchoiteanna a fhorbairt chun freagairt do chibirionsaithe móra. Leagtar amach ann freisin pleananna chun oibriú le comhpháirtithe ar fud an domhain chun slándáil agus cobhsaíocht idirnáisiúnta sa chibearspás a chinntiú. Thairis sin, leagtar amach ann conas is féidir le Cibearaonad Comhpháirteach an fhreagairt is éifeachtaí ar chibearbhagairtí a áirithiú trí úsáid a bhaint as na hacmhainní comhchoiteanna agus as an saineolas comhchoiteann atá ar fáil do na Ballstáit agus don Aontas.

Príomhaidhm na straitéise

Tá sé mar aidhm ag an straitéis nua Idirlíon domhanda agus oscailte a chinntiú le cosaintí láidre i gcás ina bhfuil rioscaí ann don tslándáil agus do chearta bunúsacha daoine san Eoraip. Tar éis an dul chun cinn a rinneadh faoi na straitéisí roimhe seo, tá tograí nithiúla ann chun trí phríomhionstraim a chur in úsáid. Is tionscnaimh rialála, infheistíochta agus beartais iad na trí ionstraim sin. Tabharfaidh siad aghaidh ar thrí réimse gníomhaíochta de chuid an Aontais:

1. athléimneacht, ceannasacht theicneolaíoch agus ceannaireacht;
2. acmhainneacht oibríochtúil chun cosc, díspreagadh agus freagairt a thabhairt;
3. comhar chun cibearspás domhanda agus oscailte a chur chun cinn.

Tá an tAontas tiomanta tacú leis an straitéis sin trí leibhéal infheistíochta nach bhfacthas a leithéid riamh roimhe seo in aistriú digiteach an Aontais sna seacht mbliana amach romhainn. Mhéadódh sé sin na leibhéil infheistíochta a bhí ann roimhe seo faoi cheathair. Léiríonn sé tiomantas an Aontais dá bheartas nua teicneolaíoch agus tionsclaíoch agus don chlár oibre téarnaimh.

Tá Straitéis Chibearshlándála nua an Aontais don Deacáid Dhigiteach ina príomhchuid de Thodhchaí Dhigiteach na hEorpa a Mhúnlú, Plean Téarnaimh an Choimisiúin don Eoraip agus Straitéis an Aontais Slándála 2020-2025.