Beartais Chibearshlándála

Straitéis Chibearshlándála

Chuir an Coimisiún Eorpach agus Ardionadaí an Aontais do Ghnóthaí Eachtracha agus don Bheartas Slándála Straitéis Chibearshlándála nua an Aontais i láthair ag deireadh 2020.

Cumhdaítear leis an Straitéis slándáil seirbhísí riachtanacha amhail ospidéil, eangacha fuinnimh agus iarnróid. Cumhdaítear leis freisin slándáil líon síormhéadaitheach na réad nasctha inár dtithe, inár n-oifigí agus inár monarchana.

Dírítear sa Straitéis ar chumais chomhchoiteanna a fhorbairt chun freagairt do chibirionsaithe móra agus ar oibriú le comhpháirtithe ar fud an domhain chun slándáil agus cobhsaíocht idirnáisiúnta sa chibearspás a chinntiú. Leagtar amach ann conas is féidir le Cibearaonad Comhpháirteach an fhreagairt is éifeachtaí ar chibearbhagairtí a chinntiú trí úsáid a bhaint as na hacmhainní comhchoiteanna agus as an saineolas atá ar fáil don Aontas agus do na Ballstáit.

Reachtaíocht agus deimhniú

Treoir maidir le bearta le haghaidh ardleibhéal cibearshlándála coiteann ar fud an Aontais (Treoir NIS2)

Is bagairtí trasteorann iad bagairtí cibearshlándála beagnach i gcónaí, agus is féidir le cibearionsaí ar shaoráidí criticiúla tíre amháin difear a dhéanamh don Aontas ina iomláine. Ní mór do thíortha an Aontais comhlachtaí láidre rialtais a bheith acu a dhéanann maoirseacht ar an gcibearshlándáil ina dtír féin agus a oibríonn i gcomhar lena gcontrapháirtithe i mBallstáit eile trí fhaisnéis a roinnt. Tá tábhacht ar leith ag baint leis sin d’earnálacha atá ríthábhachtach dár sochaithe.

Leis an gcéad Treoir maidir le slándáil gréasán agus córas faisnéise (TreoirNIS),áirithítear cruthú agus comhar na gcomhlachtaí rialtais sin. Rinneadh athbhreithniú ar an Treoir seo ag deireadh 2020, as ar eascair togra agus glacadh Threoir NIS2. Bhí go dtí an 18 Deireadh Fómhair 2024 ag na Ballstáit chun NIS2 a thrasuí agus a chur chun feidhme go hiomlán.

ENISA – Gníomhaireacht an Aontais Eorpaigh um Chibearshlándáil

Is é ENISA (Gníomhaireachtan Aontais Eorpaigh um Chibearshlándáil)an ghníomhaireacht de chuid an Aontais a dhéileálann leis an gcibearshlándáil. Cuireann sé tacaíocht ar fáil do na Ballstáit, d’institiúidí an Aontais agus do ghnólachtaí i bpríomhréimsí, lena n-áirítear cur chun feidhme Threoir NIS.

An Gníomh um Chibear-Athléimneacht

Leis an togra le haghaidh rialachán maidir le ceanglais chibearshlándála le haghaidh táirgí ag a bhfuil eilimintí digiteacha, ar a dtugtar an Gníomh um Chibear-Athléimneacht, neartaítear rialacha cibearshlándála chun táirgí crua-earraí agus bogearraí níos sláine a chinntiú.

An Gníomh um Chibearshlándáil

Leis an nGníomh um Chibearshlándáil, neartaítear ról ENISA. Tá sainordú buan ag an ngníomhaireacht anois, agus tá sé de chumhacht aici rannchuidiú le dlús a chur leis an gcomhar oibríochtúil agus leis an mbainistiú géarchéime araon ar fud an Aontais. Tá níos mó acmhainní daonna agus airgeadais aige ná mar a bhí roimhe seo. An 18 Aibreán 2023, mhol an Coimisiún leasú spriocdhírithe ar Ghníomh an Aontais um Chibearshlándáil.

An Gníomh um Chibear-Dhlúthpháirtíocht

An 18 Aibreán 2023, mhol an Coimisiún Eorpach Gníomh um Chibear-Dhlúthpháirtíocht an Aontais, chun feabhas a chur ar an bhfreagairt ar chibearbhagairtí ar fud an Aontais. Áireofar sa togra Sciath Chibearshlándála Eorpach agus Sásra Cibiréigeandála cuimsitheach chun modh cibearchosanta níos fearr a chruthú.

Deimhniúchán

Ní féidir lenár saol digiteach feidhmiú go maith ach amháin má tá muinín ag an bpobal i gcoitinne as cibearshlándáil táirgí agus seirbhísí TF. Tá sé tábhachtach go bhfeicfimid go ndearnadh táirge a sheiceáil agus a dheimhniú chun cloí le hardchaighdeáin chibearshlándála. Tá scéimeanna éagsúla um dheimhniú slándála ann faoi láthair le haghaidh táirgí TF ar fud an Aontais. Bheadh sé níos éasca agus níos soiléire do chách comhscéim deimhniúcháin amháin a bheith ann.

Dá bhrí sin, tá an Coimisiún ag obair ar chreat deimhniúcháin uile-Aontais, agus ENISA ina chroílár. Leagtar amach sa Ghníomh um Chibearshlándáil an próiseas chun an creat sin a bhaint amach.

Infheistíocht

Plean Téarnaimh

Tá an chibearshlándáil ar cheann de thosaíochtaí an Choimisiúin ina fhreagairt ar ghéarchéim an choróinvíris, ós rud é gur tháinig méadú ar chibirionsaithe le linn na dianghlasála. Áirítear sa Phlean Téarnaimh don Eoraip infheistíochtaí breise sa chibearshlándáil.

Tacaíocht don taighde agus don nuálaíocht: Fís 2020 agus cPPP; Fís Eorpach

Tá taighde ar an tslándáil dhigiteach ríthábhachtach chun réitigh nuálacha a fhorbairt lena bhféadfar sinn a chosaint ar na cibearbhagairtí is forbartha agus is déanaí. Sin é an fáth gur cuid thábhachtach í an chibearshlándáil de Fís 2020 agus den chlár Fís Eorpach a tháinig ina dhiaidh. 

Sa chlár Fís Eorpach, don tréimhse 2021-2027, tá an chibearshlándáil ina cuid den bhraisle ‘Slándáil Shibhialta don tSochaí’. 

Mar chuid de Fís 2020, rinne an Coimisiún cómhaoiniú ar thaighde agus nuálaíocht in ábhair amhail ullmhacht i gcomhair na cibearshlándála trí chibear-raonta agus trí ionsamhlú, cibearshlándáil d’fhiontair bheaga agus mheánmhéide, cibearshlándáil sa chóras cumhachta leictrí agus fuinnimh, agus cibearshlándáil agus cosaint sonraí in earnálacha criticiúla. Tagann na hábhair sin faoin gcnuasach ‘Sochaithe slána – Saoirse agus slándáil na hEorpa agus a cuid saoránach a chosaint.’

In 2016, bunaíodh comhpháirtíocht chonarthach phríobháideach phoiblí (cPPP) Fís 2020 maidir leis an gcibearshlándáil idir an Coimisiún Eorpach agus an Eagraíocht Eorpach um Chibearshlándáil (ECSO), comhlachas ina bhfuil comhaltaí ón gcibearthionscal, ón saol acadúil, ó riaracháin phoiblí agus eile.

Tacaíocht do chibearacmhainneachtaí agus d’imscaradh

Tá ár mbonneagair fhisiciúla agus dhigiteacha fite fuaite ina chéile. Dá bhrí sin, tá infheistíocht déanta ag an gCoimisiún sa chibearshlándáil freisin mar chuid dá chlár cistiúcháin infheistíochta bonneagair, an tSaoráid um Chónascadh na hEorpa (SCE), don tréimhse 2014-2020.

Tugadh tacaíocht SCE d’fhoirne freagartha do theagmhais a bhaineann le slándáil ríomhairí, d’oibreoirí seirbhísí riachtanacha (OES), do sholáthraithe seirbhísí digiteacha (DSPanna), do phointí teagmhála aonair (SPOC) agus d’údaráis inniúla náisiúnta (NCAnna). Cuireann sé sin feabhas ar na cumais chibearshlándála agus ar an gcomhar trasteorann laistigh den Aontas, rud a thacaíonn le cur chun feidhme straitéis chibearshlándála an Aontais.

Is clár uaillmhianach é an Clár don Eoraip Dhigiteach, don tréimhse 2021-2027, ina bhfuil sé beartaithe €1.9 billiún a infheistiú in acmhainneacht chibearshlándála agus bonneagair agus uirlisí cibearshlándála a chur in úsáid go forleathan ar fud an Aontais do riaracháin phoiblí, do ghnólachtaí agus do dhaoine aonair.

Tá an chibearshlándáil ina cuid de InvestEU freisin. Is clár ginearálta é InvestEU lena dtugtar le chéile go leor ionstraimí airgeadais agus lena n-úsáidtear infheistíocht phoiblí chun tuilleadh infheistíochta a fháil ón earnáil phríobháideach. Tacóidh a saoráid infheistíochta straitéiseach le príomhshlabhraí luacha sa chibearshlándáil. Is cuid thábhachtach den phacáiste téarnaimh é mar fhreagairt ar ghéarchéim an choróinvíris.

Lárionad agus Líonra um Inniúlachtaí Cibearshlándála; Atlas

Déanfaidh an lárionad Eorpach um inniúlachtaí tionsclaíocha, teicneolaíochta agus taighde cibearshlándála saineolas a chomhthiomsú agus forbairt agus cur in úsáid Eorpach na teicneolaíochta cibearshlándála a ailíniú. Oibreoidh sé leis an tionscal, leis an bpobal acadúil agus le daoine eile chun clár oibre coiteann a fhorbairt le haghaidh infheistíochtaí sa chibearshlándáil, agus déanfaidh sé cinneadh maidir le tosaíochtaí cistiúcháin le haghaidh taighde, forbairt agus rolladh amach réiteach cibearshlándála trí na Cláir Fís Eorpach agus an Clár don Eoraip Dhigiteach.

Faoi láthair, tá ceithre thionscadal phíolótacha ar siúl chun an bealach a réiteach don Lárionad Inniúlachta agus don Líonra. Tá níos mó ná 170 comhpháirtí i gceist leo.

Chun forléargas níos fearr a fháil ar shaineolas agus acmhainneacht chibearshlándála ar fud an Aontais, d’fhorbair an Coimisiún ardán cuimsitheach ar a dtugtar an tAtlas Cibearshlándála.

Treoir bheartais

Treoirphlean le haghaidh freagairt chomhordaithe ar chibirionsaithe móra

I dtreoirphlean an Choimisiúin maidir le mearfhreagairt éigeandála, cuirtear plean ar fáil i gcás cibirtheagmhas nó cibirghéarchéim trasteorann ar mhórscála. Leagtar amach ann na cuspóirí agus na modhanna comhair idir na Ballstáit agus institiúidí an Aontais chun freagairt do theagmhais agus do ghéarchéimeanna den sórt sin. Mínítear ann conas is féidir leis na sásraí Bainistithe Géarchéime atá ann cheana lánúsáid a bhaint as eintitis chibearshlándála atá ann cheana ar leibhéal an Aontais.

An Cibearaonad Comhpháirteach

Mar obair leantach, d’fhógair Uachtarán an Choimisiúin Ursula von der Leyen togra le haghaidh Cibearaonad Comhpháirteach uile-Aontais. Is céim thábhachtach é an Moladh maidir le cruthú an Chibearaonaid Chomhpháirtigh a d’fhógair an Coimisiún an 23 Meitheamh 2021 i dtreo an creat bainistithe géarchéime cibearshlándála Eorpach a chur i gcrích. Is sprioc insoláthartha nithiúil é de Straitéis Chibearshlándála an Aontais Eorpaigh agus de Straitéis an Aontais Eorpaigh um an Aontas Slándála, lena gcuirtear le geilleagar agus sochaí dhigiteach shábháilte.

Feidhmeoidh an Cibearaonad Comhpháirteach mar ardán chun freagairt chomhordaithe ón Aontas a chinntiú ar chibirtheagmhais agus cibirghéarchéimeanna mórscála, chomh maith le cúnamh a chur ar fáil chun téarnamh ó na hionsaithe sin.

Imscaradh slán 5G san Aontas

Tá sé beartaithe líonraí 5G a chur i bhfeidhm ar fud an Aontais. Beidh buntáistí ollmhóra ag baint leo, ach beidh níos mó pointí iontrála féideartha acu freisin d’ionsaitheoirí mar gheall ar nádúr níos lú láraithe a n-ailtireachta, líon níos mó aeróg agus spleáchas méadaithe ar bhogearraí. Leagtar amach i mBosca Uirlisí an Aontais maidir le 5G bearta chun ceanglais slándála do líonraí 5G a neartú, srianta ábhartha a chur i bhfeidhm do sholáthraithe a mheastar a bheith ardriosca, agus éagsúlú díoltóirí a áirithiú.

An próiseas toghcháin a chinntiú

Tá ár ndaonlathais Eorpacha ag éirí níos digití: bíonn feachtais pholaitiúla ar siúl ar líne agus tarlaíonn na toghcháin iad féin trí vótáil leictreonach in go leor tíortha. 

Tá moltaí eisithe ag an gCoimisiún maidir le cibearshlándáil na dtoghchán do Pharlaimint na hEorpa, mar chuid de phacáiste níos leithne moltaí chun tacú le toghcháin Eorpacha atá saor agus cothrom. Mí roimh thoghcháin Eorpacha 2019, rinne Parlaimint na hEorpa, na Ballstáit, an Coimisiún agus ENISA tástáil bheo ar a n-ullmhacht.

Scileanna agus feasacht

Scileanna

Ní féidir linn an tslándáil dhigiteach a chinntiú ach amháin má tá saineolaithe againn a bhfuil an t-eolas agus na scileanna cearta acu, agus nach leor iad faoi láthair. Sin é an fáth a bhfuil an Coimisiún ag gníomhú chun forbairt scileanna cibearshlándála a spreagadh.

D’ullmhaigh an Coimisiún glao ar chreat comhleanúnach chun scileanna cibearshlándála a theagasc san oideachas ollscoile agus gairmiúil. Tá na ceithre thionscadal phíolótacha lena n-ullmhaítear an lárionad inniúlachta cibearshlándála agus an líonra ag ECSO ag obair air sin faoi láthair. Tá tionscnaimh athfhillteacha ann freisin atá dírithe go díreach ar mhic léinn, amhail dúshlán bliantúil cibearshlándála na hEorpa .

Tagann scileanna cibearshlándála faoi chlár oibre ginearálta an Choimisiúin maidir le scileanna digiteacha. Is cuid iad freisin de na hiarrachtaí cistiúcháin faoi Fhís 2020, Fís Eorpach agus an Clár don Eoraip Dhigiteach. Sampla amháin is ea an cistiú le haghaidh ‘cibearraonta’, ar timpeallachtaí ionsamhlúcháin beo iad de chibearbhagairtí le haghaidh oiliúna.

Feasacht

Is minic gurb é an toisc dhaonna an nasc lag sa chibearshlándáil: is féidir le duine a chliceálann ar nasc phishing iarmhairtí ollmhóra a bheith aige. Dá bhrí sin, ardaíonn an Coimisiún feasacht ar an gcibearshlándáil agus cuireann sé dea-chleachtais chun cinn i measc an phobail i gcoitinne. Mar shampla, eagraíonn sé Mí Eorpach na Cibearshlándála uair sa bhliain in éineacht le ENISA.

Acadamh Scileanna Cibearshlándála an Aontais

Déanfaidh Acadamh Scileanna Cibearshlándála an Aontais, a seoladh mar chuid den Bhliain Eorpach um Scileanna, tionscnaimh phríobháideacha agus phoiblí a chomhthiomsú ar an leibhéal Eorpach agus ar an leibhéal náisiúnta chun aghaidh a thabhairt ar an mbearna sa lucht saothair cibearshlándála. Déanfar an tionscnamh a óstáil ar líne ar ardán post agus scileanna an Choimisiúin agus beidh deiseanna maoinithe, oiliúint agus deimhnithe ó gach cearn den Aontas mar chuid de, dóibh siúd ar spéis leo gairm sa chibearshlándáil.

Teachtaireacht maidir le hAcadamh Cibearscileanna an Aontais

Bileog eolais Acadamh Cibearscileanna an Aontais

Cibearphobal

ENISA – Gníomhaireacht an Aontais Eorpaigh um Chibearshlándáil

Is é ENISA gníomhaireacht an Aontais a bhíonn ag plé leis an gcibearshlándáil. Cuireann sé tacaíocht ar fáil do na Ballstáit, d’institiúidí an Aontais agus do ghnólachtaí i bpríomhréimsí, lena n-áirítear cur chun feidhme Threoir NIS.

ISACanna

Cothaíonn Lárionaid um Chomhroinnt agus Anailísiú Faisnéise (ISACanna) comhar idir an pobal cibearshlándála in earnálacha éagsúla den gheilleagar. Is tosaíocht don Choimisiún é ISACanna a fhorbairt a thuilleadh ar leibhéal an Aontais agus ar an leibhéal náisiúnta araon. I gcomhar le ENISA, cuireann an Coimisiún bunú ISACanna nua chun cinn in earnálacha nach gcumhdaítear. Cuireann ‘cuibhreannas cumhachtaithe ISACanna an Aontais’, faoi mhaoirseacht an Choimisiúin, tacaíocht dhlíthiúil, theicniúil agus eagraíochtúil ar fáil do ISACanna.

JRC

Tá Airmheán Comhpháirteach Taighde (JRC) an Choimisiúin ag cur go gníomhach leis an gCibearshlándáil san Aontas. Mar shampla, tá Tacsanomaíocht Chibearshlándála forbartha ag an Airmheán Comhpháirteach Taighde. Leis sin, déantar an téarmaíocht a úsáidtear sa chibearshlándáil a ailíniú ionas gur féidir linn forléargas níos soiléire a fháil ar chumais chibearshlándála san Aontas.

D’fhoilsigh JRC tuarascáil le déanaí freisin ina dtugtar léargas ar thírdhreach cibearshlándála reatha an Aontais agus ar a stair, dar teideal ‘Cibearshlándáil– ár n-ancaire digiteach’.

CSIRTanna/CERTanna

Faoi Threoir NIS, ceanglaítear ar Bhallstáit an Aontais a áirithiú go bhfuil Foirne Freagartha do Theagmhais a bhaineann le Slándáil Ríomhairí (‘CSIRTanna’) acu a fheidhmíonn go maith, ar a dtugtar Foirne Práinnfhreagartha Ríomhaire (‘CERTanna’) freisin. Déileálann na foirne sin le teagmhais agus rioscaí cibearshlándála sa chleachtas. Oibríonn siad i gcomhar le chéile ar leibhéal an Aontais, agus oibríonn siad i gcomhar leis an earnáil phríobháideach freisin.
Ní mór do gach cineál oibreora seirbhísí fíor-riachtanacha agus soláthraithe seirbhíse digití a bheith cumhdaithe ag CSIRTanna ainmnithe.

Is iad seo a leanas príomhchúraimí CSIRTanna:

• faireachán a dhéanamh ar theagmhais ar an leibhéal náisiúnta;
• luathrabhadh, foláirimh, fógraí agus faisnéis eile faoi rioscaí agus teagmhais a sholáthar do gheallsealbhóirí ábhartha;
• freagairt do theagmhais;
• anailís dhinimiciúil riosca agus teagmhas agus feasacht staide a sholáthar;
• páirt a ghlacadh i líonra CSIRTanna.

ECSO

Cruthaíodh an Eagraíocht Eorpach um Chibearshlándáil (ECSO) in 2016 chun gníomhú mar chontrapháirt an Choimisiúin i gcomhpháirtíocht phríobháideach phoiblí chonarthach lena gcumhdaítear Fís 2020 sna blianta 2016 go 2020. Baineann formhór 250 comhalta ECSO le tionscal na cibearshlándála nó le hinstitiúidí taighde agus acadúla sa réimse. Ar leibhéal níos lú, is gníomhaithe san earnáil phoiblí agus tionscail ar thaobh an éilimh iad comhaltaí ECSO freisin.

Chomh maith le moltaí a dhéanamh maidir le Fís 2020, déanann ECSO gníomhaíochtaí éagsúla atá dírithe ar thógáil pobail agus ar fhorbairt thionsclaíoch ar an leibhéal Eorpach.

Women4Cyber

Tá sé tábhachtach aird a tharraingt ar ról na mban sa phobal cibearshlándála, atá faoi ghannionadaíocht. Is é sin an fáth a bhfuil Clárlann Women4Cyber curtha ar bun ag an gCoimisiún, i gcomhar le tionscnamh ECSO Women4Cyber. Fágann sé go bhfuil sé níos éasca do na meáin, d’eagraithe imeachtaí agus do dhaoine eile teacht ar an iliomad ban éirimiúil atá ag obair sa chibearshlándáil, ionas go mbeidh na mná sin níos feiceálaí agus níos feiceálaí sa chibearphobal agus sa díospóireacht phoiblí.

Cibear-Idirphlé

Oibríonnan tAontas i gcomhar le comhpháirtithe chun leasanna comhroinnte sa bheartas cibearshlándála a chur chun cinn. Tionóladh an 9ú Cibear-Idirphlé idir an tAontas agus na Stáit Aontaithe sa Bhruiséil i mí na Nollag 2023. Tá dul chun cinn déanta ag an Aontas agus ag na Stáit Aontaithe maidir leis an gcomhar i réimsí amhail an chibearthaidhleoireacht, bainistiú géarchéime, fothú acmhainneachta, cibearshlándáil an bhonneagair chriticiúil (lena n-áiríteartuairisciú teagmhas),cibearshlándáil táirgí crua-earraí agus bogearraí (lena n-áirítear an Plean Gníomhaíochta Comhpháirteach um Tháirgí Cibearshábháilte),agus gnéithe cibearshlándála de theicneolaíochtaí atá ag teacht chun cinn amhail an intleacht shaorga. 

Ó 2021 i leith, reáchtáil an tAontas agus an Úcráin dhá Chibear-Idirphlé. In 2023, chuir Gníomhaireacht an Aontais Eorpaigh um Chibearshlándáil ENISA Socrú Oibre ar bhonn foirmiúil le contrapháirtithe na hÚcráine chun fothú acmhainneachta, malartú dea-chleachtais agus feasacht staide a chothú. Tá Cibear-Idirphlé leis an India, leis an tSeapáin, le Poblacht na Cóiré agus leis an mBrasaíl cuimsithe ag an Aontas freisin. Tionóladh an chéad Chibear-Idirphlé idir an tAontas agus an Ríocht Aontaithe sa Bhruiséil i mí na Nollag 2023.

Pléitear anchibearshlándáil freisin i gcomhthéacs na gComhpháirtíochtaí Digiteacha déthaobhacha agus an Idirphlé Dhigitigh dhéthaobhaigh, chomh maith leis an gComhghuaillíocht Dhigiteach idir an tAontas agus Meiriceá Laidineach agus Muir Chairib, an tIdirphlé Rialála idir an tAontas agus na Balcáin Thiar, an tIdirphlé Struchtúrtha idir an tAontas agus ECAT maidir le hAthléimneacht agus an tIdirphlé Struchtúrtha idir an tAontas agus ECAT maidir leis an gCibearshlándáil agus leis an gCibearchosaint. In 2023, d’fhoilsigh an Tascfhórsa idir an tAontas agus ECAT maidir le hathléimneacht an bhonneagair chriticiúil tuarascáilinar leagadh amach earnálacha tábhachtacha trasearnálacha. 

An 11 Samhain 2024, thionóil an tAontas agus an tSeapáin a séú Cibear-Idirphlé i dTóiceo, inar mhalartaigh siad maidir le timpeallacht na mbagairtí agus an fhreagairt ar chibearghníomhaíochtaí mailíseacha, inar chuir siad nuashonruithe ar fáil maidir lena bhforbairtí beartais agus reachtacha is déanaí maidir leis an gcibearshlándáil agus i réimsí na dteicneolaíochtaí atá ag teacht chun cinn, an bhainistithe cibear-ghéarchéime agus na cibearchosanta.

Réimsí eile cibearbheartais

Cibearchoireacht

Baineann gnáthchoirpigh úsáid as cibirionsaithe a chuireann muintir na hEorpa i mbaol. Déanann roinn Imirce agus Gnóthaí Baile an Choimisiúin monatóireacht agus nuashonrú ar dhlí an Aontais maidir leis an gcibearchoireacht agus tacaíonn sí le cumas forfheidhmithe dlí. Oibríonn an Coimisiún i gcomhar le hIonad Cibearchoireachta na hEorpa in Europol freisin.

Cibearthaidhleoireacht

Tá iarrachtaí á ndéanamh ag an Aontas é féin a chosaint ar chibearbhagairtí ó lasmuigh dá theorainneacha. Mar chuid de sin, oibríonn an Coimisiún i gcomhar leis an tSeirbhís Eorpach Gníomhaíochta Seachtraí agus leis na Ballstáit chun freagairt chomhpháirteach taidhleoireachta ar chibirghníomhaíochtaí mailíseacha a chur chun feidhme (‘bosca uirlisí na cibearthaidhleoireachta’). Áirítear leis an bhfreagairt sin comhar agus idirphlé taidhleoireachta, bearta coisctheacha i gcoinne cibirionsaithe, agus smachtbhannaí ina gcoinne siúd a bhfuil baint acu le cibirionsaithe lena mbagraítear ar an Aontas.

Cuidíonn an Coimisiún le cinnteoireacht maidir le freagairt do chibearbhagairtí seachtracha nuair is gá. Tugann sé maoiniú díreach freisin do Thionscnamh Tacaíochta Cibearthaidhleoireachta an Aontais atá ar siúl faoi láthair .

Cibearchosaint

An 10 Samhain 2022, chuir an Coimisiún agus an tArdionadaí Teachtaireacht Chomhpháirteach ar aghaidh maidir le Beartas Cibearchosanta de chuid an Aontais chun aghaidh a thabhairt ar an timpeallacht slándála atá ag dul in olcas tar éis fhogha na Rúise faoin Úcráin agus chun borradh a chur faoi chumas an Aontais a shaoránaigh agus a bhonneagar a chosaint.  

Tá Beartas an Aontais maidir leis an gCibearchosaint bunaithe ar cheithre cholún lena gcumhdaítear raon leathan tionscnamh a chuideoidh leis an Aontas agus leis na Ballstáit a bheith in ann cibirionsaithe a bhrath, a dhíspreagadh agus a chosaint ar bhealach níos fearr:

1. Gníomhú le chéile ar mhaithe le cibearchosaint níos láidre san Aontas

2. An t-éiceachóras cosanta a dhaingniú

3. Infheistíocht a dhéanamh i gcumais chibearchosanta

4. Comhpháirtí chun aghaidh a thabhairt ar dhúshláin choiteanna

Leis an mbeartas nua, éilítear infheistíochtaí igcumais chibearchosanta speictrim iomláin agus neartófar an comhordú agus an comhar idir cibearphobail mhíleata agus shibhialtacha an Aontais. Cuirfidh sé feabhas ar an gcomhar leis an earnáil phríobháideach agus ar bhainistiú éifeachtúil cibear-ghéarchéime laistigh den Aontas. Cuideoidh an beartas nua freisin lenár spleáchais straitéiseacha ar chibeartheicneolaíochtaí criticiúla a laghdú, agus Bonn Tionsclaíoch Teicneolaíoch na Cosanta Eorpaí (EDTIB) a neartú. Spreagfaidh sé oiliúint, meallfaidh sé agus coinneoidh sé cibearbhuanna.

Oibríonn an tAontas i gcomhar maidir le cosaint sa chibearspás trí ghníomhaíochtaí an Choimisiúin Eorpaigh, na Seirbhíse Eorpaí Gníomhaíochta Seachtraí (SEGS),na Gníomhaireachta Eorpaí um Chosaint, chomh maith le ENISA agus Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol).

Forbairt cibear-acmhainne i dtríú tíortha

Oibríonn an tAontas i gcomhar le tíortha eile chun cur lena n-acmhainneacht cosaint a dhéanamh ar bhagairtí cibearshlándála. Tacaíonn an Coimisiún le cláir chibearshlándála éagsúla sna Balcáin Thiar agus sna sé thír i gcomhpháirtíocht an oirthir i ngarchomharsanacht an Aontais, agus i dtíortha eile ar fud an domhain trína roinn um Chomhar Idirnáisiúnta agus Forbairt.