Il-White Paper “Kif nistgħu nimmaniġġjaw il-ħtiġijiet tal-infrastruttura diġitali tal-Ewropa?” tanalizza l-isfidi li l-Ewropa qed tiffaċċja bħalissa fit-tnedija ta’ networks ta’ konnettività futuri u tippreżenta xenarji possibbli għall-ġejjieni. L-isfidi huma diversi: it-teknoloġija, il-ħtiġijiet ta’ investiment, in-nuqqas ta’ swieq uniċi għat-telekomunikazzjoni, in-nuqqas ta’ kundizzjonijiet ekwi, id-dipendenza, l-approċċ frammentat għall-ġestjoni tal-ispettru tar-radju, il-ħtieġa għal aktar innovazzjoni u kapaċitajiet industrijali tul il-katina tal-valur tat-telekomunikazzjoni, is-sostenibbiltà u s-sigurtà.
Hemm diversi xenarji possibbli biex jiġu indirizzati dawk l-isfidi, jiġu attirati l-investimenti, titrawwem l-innovazzjoni, tiżdied is-sigurtà, u jinkiseb Suq Uniku Diġitali reali.
Dan l-att adottat huwa miftuħ għall-feedback għal perjodu ta’ 18 ġimgħat. Il-feedback li jasal se jiġi mqassar mill-Kummissjoni Ewropea u ppreżentat lill-Parlament Ewropew u l-Kunsill, bl-għan li jikkontribwixxi għad-dibattitu leġiżlattiv.