It-talba tfittex li tikseb aktar dettalji dwar l-attivitajiet u r-riżorsi ta’ moderazzjoni tal-kontenut ta’ X, dwar il-valutazzjoni tar-riskju mwettqa minn X fir-rigward tal-implimentazzjoni ta’ għodod tal-IA ġenerattivi fl-UE kif ukoll dwar oqsma oħra koperti mill- proċedimenti li għaddejjin.
B’mod partikolari, il-Kummissjoni qed titlob lil X tipprovdi informazzjoni dettaljata u dokumenti interni dwar ir-riżorsi ta’ moderazzjoni tal-kontenut tagħha fid-dawl tal-aħħar Rapport ta’ Trasparenza tagħha skont id-DSA, li żvela li X naqqas it-tim tiegħu ta’ moderaturi tal-kontenut bi kważi 20 % mir-rapport preċedenti f’Ottubru 2023, u naqqas il-kopertura lingwistika fl-Unjoni Ewropea minn 11-il lingwa tal-UE għal 7. Il-Kummissjoni qed tfittex ukoll aktar dettalji dwar il-valutazzjonijiet tar-riskju u l-miżuri ta’ mitigazzjoni marbuta mal-impatt tal-għodod tal-IA ġenerattivi fuq il-proċessi elettorali, it-tixrid ta’ kontenut illegali, u l-protezzjoni tad-drittijiet fundamentali.
F’Diċembru 2023, il-Kummissjoni fetħet proċedimenti formali kontra X biex tivvaluta jekk X setax kiser l-Att dwar is-Servizzi Diġitali (DSA) f’oqsma marbuta mal-ġestjoni tar-riskju, il-moderazzjoni tal-kontenut, ix-xejriet skuri, it-trasparenza tar-reklamar u l-aċċess għad-data għar-riċerkaturi.
It-talba għal informazzjoni hija pass ulterjuri f’investigazzjoni li għaddejja. Dan jibni fuq il-ġbir u l-analiżi tal-evidenza mwettqa s’issa, inkluż fir-rigward tar-Rapport ta’ Trasparenza ta’ X ippubblikat f’Marzu 2024 u t-tweġibiet ta’ X għal talbiet preċedenti għal informazzjoni, li indirizzaw, fost l-oħrajn, miżuri ta’ mitigazzjoni għar-riskji marbuta mal-IA ġenerattiva.
X trid tipprovdi l-informazzjoni mitluba relatata mar-riżorsi ta’ moderazzjoni tal-kontenut u l-IA ġenerattiva lill-Kummissjoni sas-17 ta’ Mejju 2024, u għall-bqija tal-mistoqsijiet sas-27 ta’ Mejju 2024. Skont l-Artikolu 74(2) tad-DSA, il-Kummissjoni tista’ timponi multi għal informazzjoni skorretta, mhux kompluta jew qarrieqa bi tweġiba għal talba għal informazzjoni. F’każ ta’ nuqqas ta’ tweġiba, il-Kummissjoni tista’ tiddeċiedi li titlob l-informazzjoni permezz ta’ deċiżjoni. F’dan ix-xenarju, in-nuqqas ta’ tweġiba sal-iskadenza jista’ jwassal għall-impożizzjoni ta’ pagamenti perjodiċi ta’ penali.
Skopri aktar dwar ir- rapporti ta’ trasparenza tal-VLOPs u s-superviżjoni tal-VLOPs taħt id-DSA.