Aktar minn EUR 240 miljun biex ikomplu jiġu appoġġati l-infrastrutturi tal-konnettività diġitali

Il-programm Diġitali tal-FNE se jikkontribwixxi għall-iżvilupp ta’ networks tal-Gigabits u tal-5G, kif ukoll għat-tisħiħ tal-kapaċità u r-reżiljenza tal-infrastrutturi ċentrali diġitali u d-diġitalizzazzjoni tan-networks tat-trasport u tal-enerġija.

Dan is-sett ġdid ta’ sejħiet jinkludi kopertura 5G tul il-Kurituri tat-trasport (EUR 100 miljun); 5G u Edge Cloud għall-Komunitajiet Intelliġenti (EUR 51 miljun); u konnettività ċentrali għall-Portal Globali Diġitali (EUR 90 miljun).

L-ewwel żewġ sejħiet jiffukaw fuq it-titjib tal-konnettività tal-5G fil-komunitajiet rurali u fiż-żoni urbani kollha, biex jiġi żgurat li ċ-ċittadini kollha tal-UE jkollhom aċċess għat-teknoloġiji u s-servizzi diġitali. Is-sejħiet jappoġġaw ukoll l-iżvilupp tal-infrastruttura tal-5G tul il-kurituri tat-trasport Ewropej, pereżempju biex jiġu appoġġati s-servizzi tas-sikurezza fit-toroq u jiġu pprovduti servizzi ta’ konnettività tal-gigabits lill-utenti tal-vetturi u lill-passiġġieri, filwaqt li tiġi żgurata l-integrazzjoni tal-5G/cloud edge.

Permezz tas-sejħa “Digital Global Gateways”, il-FNE Diġitali se tappoġġa l-konnessjonijiet ċentrali, prinċipalment permezz ta’ kejbils sottomarini, biex jittejbu l-prestazzjoni u r-reżiljenza tan-networks ta’ konnettività fil-gżejjer u fir-reġjuni ħdejn il-baħar, kif ukoll f’żoni remoti, ultraperiferiċi u skarsament popolati, u bejn l-UE u pajjiżi terzi. Dan huwa kruċjali biex jiżdiedu l-kapaċità u r-reżiljenza tan-networks diġitali tal-Unjoni, f’konformità mal-istrateġija tal-Global Gateway tal-UE.

L-iżvilupp ta’ konnettività mifruxa u ta’ kwalità għolja huwa wieħed mill-miri tad-Deċennju Diġitali, li se jippermetti wkoll lill-UE tilħaq objettivi diġitali importanti, bħall-ħtieġa li jitħaffu l-iskjerament u l-adozzjoni tan-nodi tal-cloud edge, fost l-oħrajn.

L-iskadenza biex wieħed japplika għal dawn is-sejħiet għal proposti hija l-20 ta’ Frar 2024 fis-17.00pm. Aktar informazzjoni dwar l-applikazzjoni, l-evalwazzjoni u l-proċess tal-għoti għal dan is-sett ta’ sejħiet se tkun disponibbli fil-jum ta’ informazzjoni online fis-26 ta’ Ottubru.

Aktar informazzjoni

Sejħiet għall-proposti

Il-Faċilità Nikkollegaw l-Ewropa (FNE)