Firem elettroniċi - Direttiva dwar il-Firem elettroniċi

Sistema affidabbli ta’ firem elettroniċi li taħdem madwar il-pajjiżi tal-UE hija vitali għall-kummerċ elettroniku sikur u t-twassil elettroniku effiċjenti tas-servizzi pubbliċi lin-negozji u liċ-ċittadini.

Id-Direttiva dwar il-Firem Elettroniċi stabbiliet il-qafas legali fil-livell Ewropew għall-firem elettroniċi u s-servizzi ta’ ċertifikazzjoni. L-għan huwa li jiġi ffaċilitat l-użu tal-firem elettroniċi u li dawn jiġu rikonoxxuti legalment fil-pajjiżi tal-UE. Id-Direttiva ma tiffavorixxi l-ebda teknoloġija speċifika.

Madankollu, sabiex jiġu żgurati s-sigurtà u l-validità legali ta’ tranżazzjoni elettronika f’xenarji transfruntiera hija l-istess bħal fil-livell nazzjonali, il-firma elettronika kienet ċertament importanti iżda mhux biżżejjed.

Servizzi fiduċjarji oħra jintużaw flimkien mal-firma elettronika biex tiġi żgurata l-validità, inklużi:

• ittimbrar tal-ħin: id-data u l-ħin fuq dokument elettroniku li juri li d-dokument kien jeżisti f’punt fil-ħin u li ma nbidilx minn dak iż-żmien ’l hawn
• siġill elettroniku: l-ekwivalenti elettroniku ta’ siġill jew timbru li jiġi applikat fuq dokument biex jiġu ggarantiti l-oriġini u l-integrità tiegħu
• konsenja elettronika: servizz li, sa ċertu punt, huwa l-ekwivalenti fid-dinja diġitali tal-posta rreġistrata fid-dinja fiżika
• ammissibilità legali ta' dokumenti elettroniċi biex jiġu żgurati l-awtentiċità u l-integrità tagħhom
• awtentikazzjoni tas-sit web: informazzjoni affidabbli fuq sit web (eż. ċertifikat) li tippermetti lill-utenti jivverifikaw l-awtentiċità tas-sit web u l-link tiegħu għall-entità/persuna li tkun is-sid tas-sit web

Mingħajr ċertezza dwar il-validità legali ta’ dawn is-servizzi relatati kollha, in-negozji u ċ-ċittadini se jibqgħu lura milli jużaw l-interazzjonijiet diġitali bħala l-mod naturali ta’ interazzjoni tagħhom minħabba li mhux se jkunu ċerti dwar il-kwistjoni ta’ tilwima possibbli.

Din hija l-intenzjoni wara r-Regolament eIDAS dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern. Id-dispożizzjonijiet applikabbli għas-servizzi fiduċjarji stabbiliti mir-Regolament eIDAS japplikaw direttament fis-27 pajjiż kollha tal-UE.