European Commission
Fl-okkażjoni tal-laqgħa ministerjali, l-UE u r-Repubblika tal-Korea qablu dwar l-eżiti ewlenin biex javvanzaw il-kooperazzjoni għal trasformazzjoni diġitali inklużiva u reżiljenti.
Iż-żewġ sħab qablu li jaħdmu fuq is-semikondutturi, il-Computing ta’ Prestazzjoni Għolja (HPC) u t-teknoloġija Quantum, il-5G u lil hinn, l-ekonomija tal-pjattaformi, l-intelliġenza artifiċjali (IA) u ċ-ċibersigurtà.
Eżiti ewlenin tal-ewwel kunsill tas-Sħubija Diġitali
L-UE u r-Repubblika tal-Korea impenjaw ruħhom li jikkooperaw dwar teknoloġiji emerġenti li ġew ippreżentati reċentement fl-istrateġija tas-sigurtà ekonomika tal-UE.
L-UE u r-Repubblika tal-Korea għandhom kapaċitajiet ewlenin fil-qasam tas-semikondutturi. Huma ddeċidew li jistabbilixxu Forum ROK-UE għar-Riċerkaturi tas-Semikondutturi li għandu l-għan li jippromwovi r-riċerka f’oqsma komplementari. Fil-qasam tal-Computing ta’ Prestazzjoni Għolja (HPC), iż-żewġ sħab qablu li jingħaqdu flimkien biex jiżviluppaw applikazzjonijiet għall-użu f’każijiet ta’ interess komuni bħal avvenimenti estremi tat-temp jew xjenza tal-materjali. Biex jintlaħqu dawn l-objettivi, l-UE u r-Repubblika tal-Korea se jfittxu li jiffaċilitaw l-aċċess tar-riċerkaturi għall-infrastrutturi rispettivi tal-HPC. Se jiġi stabbilit ukoll grupp ta’ esperti Quantum biex jaħdem fuq l-istandards u r-riċerka.
Iż-żewġ sħab se jiddefinixxu viżjoni komuni għall-6G, li tibni fuq it-tmexxija tagħhom fit-teknoloġiji tal-5G. Dawn se jżidu wkoll il-kooperazzjoni dwar l-Intelliġenza Artifiċjali u jistabbilixxu djalogu permanenti biex jippermettu aġġornament regolari minn kull naħa dwar inizjattivi għal IA affidabbli, inkluż dwar mudelli kbar ta’ IA ġenerattiva u jappoġġaw approċċi komuni f’korpi tal-istandards internazzjonali relatati mal-IA.
Barra minn hekk, bħala sħab strateġiċi tal-istess fehma, l-UE u l-Korea ħadu passi biex isaħħu l-kooperazzjoni tagħhom għal trasformazzjoni diġitali inklużiva u reżiljenti. Iż-żewġ sħab jikkondividu l-istess viżjoni għal ambjent online ġust u sigur li b’mod armonjuż jibbilanċja l-innovazzjoni, is-sikurezza u l-ġustizzja. Huma qablu li jsaħħu l-kooperazzjoni dwar iċ-ċibersigurtà, b’mod partikolari permezz tal-iskambju ta’ informazzjoni u l-kollaborazzjoni industrijali, u ser ikomplu jimplimentaw il-prinċipji tad-Dikjarazzjoni għall-Futur tal-Internet.
Il-passi li jmiss
Rigward il-ħidma futura, iż-żewġ naħat qablu li jiskambjaw informazzjoni dwar il-katina tal-provvista tas-semikondutturi u li jespandu l-kooperazzjoni tagħhom fil-futur dwar konnessjonijiet siguri tal-infrastruttura tal-konnettività diġitali inklużi kejbils sottomarini; il-ħiliet diġitali u l-bini tal-kapaċità; u l-iskambju tal-aħjar prattiki dwar negozji ġodda diġitali.
Il-Kunsill ta’ Sħubija Diġitali li jmiss huwa ppjanat għall-bidu tal-2024, fi Brussell, biex jirrieżamina l-progress u jagħmel passi ulterjuri biex japprofondixxi s-sħubija diġitali bejn l-UE u r-Repubblika tal-Korea.
Sfond
Is-sħubija Diġitali UE-ROK tħabbret b’mod konġunt mill-President von der Leyen u l-President Yoon fit-28 ta’ Novembru 2022. L-ewwel Sħubija Diġitali ġiet konkluża f’Mejju 2022 mal-Ġappun matul it-28 Summit bejn l-UE u l-Ġappun. Fl-1 ta’ Frar 2023, ġiet iffirmata s-Sħubija Diġitali UE-Singapore, li kompliet issaħħaħ is-sħubijiet tal-UE fl-Asja, f’konformità mal-istrateġija tal-UE għall-Kooperazzjoni fl-Indo-Paċifiku.
L-UE u r-Repubblika tal-Korea stabbilixxew relazzjonijiet diplomatiċi 60 sena ilu, u għandhom kooperazzjoni fit-tul fl-oqsma tal-kummerċ, ir-riċerka u diġitali mal-Ftehim ta’ Kummerċ Ħieles ROK-UE (FTA, 2011) u l-Ftehim dwar il-Kooperazzjoni Xjentifika u Teknoloġika bejn il-Komunità Ewropea u l-Gvern tar-Repubblika tal-Korea (Ftehim S &T, 2006). Fl-okkażjoni tas-Summit ROK-UE tat-22 ta’ Mejju 2023, il-President tal-Kunsill Ewropew Charles Michel, il-President tal-Kummissjoni Ewropea Ursula von der Leyen u l-President tar-Repubblika tal-Korea Yoon Suk Yeol, affermaw mill-ġdid l-importanza tar-relazzjoni bejn l-UE u r-ROK u appellaw għall-espansjoni tal-kooperazzjoni taħt is-Sħubija Diġitali UE-ROK.