Il-privatezza diġitali

Meta taċċessa l-web, ħafna drabi tafda informazzjoni personali vitali, bħal ismek, l-indirizz, u n-numru tal-karta tal-kreditu, lill-Fornitur tas-Servizz tal-Internet tiegħek u l-websajt li qed tuża. X'jiġri minn din id-data? Tista' taqa' f'idejn il-ħżiena? Liema drittijiet għandek fir-rigward tal-informazzjoni personali tiegħek?

Ġew stabbiliti regoli komuni tal-UE biex jiġi żgurat li jkun hemm standard għoli ta’ protezzjoni għad-data personali kullimkien fl-UE. Bħalissa, iż-żewġ fergħat ewlenin tal-qafas legali tal-protezzjoni tad-data fl-UE huma d-Direttiva dwar il-Privatezza Elettronika (id-Direttiva dwar il-privatezza u l-komunikazzjoni elettronika), u r-Regolament Ġenerali dwar il-Protezzjoni tad-Data (GDPR).

Id-Direttiva dwar il-Privatezza Elettronika tibni fuq l-oqfsa tal-UE dwar it-telekomunikazzjoni u l-protezzjoni tad-data biex tiżgura li l-komunikazzjonijiet kollha fuq in-networks pubbliċi jżommu r-rispett għad-drittijiet fundamentali. Għandu jkun hemm livell għoli ta’ protezzjoni tad-data u ta’ privatezza irrispettivament mit-teknoloġija użata.

Il-GDPR tal-UE jiżgura li d-data personali tista’ tinġabar biss taħt kundizzjonijiet stretti u għal skopijiet leġittimi. L-organizzazzjonijiet li jiġbru u jimmaniġġjaw l-informazzjoni personali tiegħek iridu jipproteġuha wkoll minn użu ħażin u jirrispettaw ċerti drittijiet.

Ksur ta’ data personali

L-operaturi tat-telekomunikazzjoni u l-Fornituri tas-Servizz tal-Internet għandhom ammont kbir ta’ data tal-klijenti, li trid tinżamm kunfidenzjali u sigura. Madankollu, xi drabi informazzjoni sensittiva tista’ tinsteraq, tintilef, jew tiġi aċċessata illegalment. Id-Direttiva dwar il-Privatezza Elettronika tiżgura li l-fornitur jirrapporta kwalunkwe ksur ta’ data personali lill-awtorità nazzjonali u jinforma lill-abbonat jew lill-individwu direttament dwar kwalunkwe riskju relatat mad-data personali jew mal-privatezza.