Il-Kummissjoni tieħu nota u tilqa’ l-adozzjoni tat-Tieni Rapport ta’ Progress dwar l-implimentazzjoni tas-Sett ta’ Għodod tal-UE mill-Grupp ta’ Kooperazzjoni tal-NIS.
Fid-dawl ta’ dan ir-rapport, il-Kummissjoni hija mħassba ħafna dwar ir-riskji maħluqa minn ċerti fornituri ta’ tagħmir ta’ komunikazzjoni tan-netwerk mobbli għas-sigurtà tal-Unjoni, kif rifless ukoll mid-deċiżjonijiet meħuda minn xi Stati Membri. Ir-rapport tal-NIS jenfasizza “r-riskju ċar ta’ dipendenza persistenti fuq fornituri b’riskju għoli fis-suq intern b’impatti negattivi potenzjalment serji fuq is-sigurtà għall-utenti u l-kumpaniji madwar l-UE u l-infrastruttura kritika tal-UE”.
Kif imsemmi fir-Rapport ta’ Progress tal-NIS u f’rapport preċedenti mill-Qorti Ewropea tal-Awdituri, huwa evidenti li l-fornituri tal-5G juru differenzi ċari fil-karatteristiċi tagħhom, b’mod partikolari fir-rigward tal-probabbiltà tagħhom li jiġu influwenzati minn pajjiżi terzi speċifiċi li għandhom liġijiet ta’ sigurtà u governanza korporattiva li huma riskju potenzjali għas-sigurtà tal-Unjoni. Kif indikat ukoll fir-rapport tal-NIS, Huawei u ZTE kienu soġġetti għal deċiżjonijiet u pariri pubbliċi f’ċerti Stati Membri, abbażi ta’ tħassib dwar is-sigurtà nazzjonali, inklużi valutazzjonijiet mis-servizzi tal-intelligence ta’ dawk l-Istati Membri.
Fi Stati Membri oħra, id-deċiżjonijiet biex jiġu ristretti jew esklużi ċerti fornituri min-networks 5G tagħhom saru b’mod kunfidenzjali, abbażi tal-valutazzjoni tagħhom. Is-sejbiet ta’ dawk l-Istati Membri huma simili għall-analiżi tal-awtoritajiet kompetenti ta’ ċerti pajjiżi terzi.
Minħabba dawn ir-riskji għoljin, u abbażi ta’ valutazzjoni tal-kriterji stabbiliti fis-Sett ta’ Għodod għall-identifikazzjoni ta’ “fornituri b’riskju għoli”, il-Kummissjoni tqis li d-deċiżjonijiet adottati mill-Istati Membri biex jirrestrinġu jew jeskludu lil Huawei u ZTE huma ġġustifikati u konformi mas-Sett ta’ Għodod 5G. Mingħajr preġudizzju għall-kompetenzi tal-Istati Membri fir-rigward tas-sigurtà nazzjonali, il-Kummissjoni applikat ukoll il-kriterji tas-Sett ta’ Għodod biex tivvaluta l-ħtiġijiet u l-vulnerabbiltajiet tas-sistemi ta’ komunikazzjoni korporattiva tagħha stess u dawk tal-istituzzjonijiet, il-korpi u l-aġenziji Ewropej l-oħra, kif ukoll l-implimentazzjoni tal-programmi ta’ finanzjament tal-Unjoni fid-dawl tal-objettivi ta’ politika ġenerali tal-Unjoni.
F’dan il-kuntest, b’mod konsistenti mal-applikazzjoni ta’ ċerti Stati Membri tas-Sett ta’ Għodod tal-5G, il-Kummissjoni tqis li Huawei u ZTE fil-fatt jirrappreżentaw riskji materjalment ogħla minn fornituri oħra tal-5G.