Sett ta’ Għodod għall-Konnettività għall-5G u l-broadband veloċi

Is-Sett ta’ Għodod għall-Konnettività

Is-Sett ta’ Għodod għall-Konnettività (.pdf) huwa sett tal-aħjar prattiki għall-introduzzjoni f’waqtha tal-5G u tal-broadband veloċi. Minn naħa waħda, il-miżuri jgħinu lill-operaturi tan-networks inaqqsu l-kost tal-introduzzjoni tan-networks. Min-naħa l-oħra, l-Istati Membri jistgħu jużaw dawn il-miżuri biex jagħtu lill-operaturi aċċess għall-ispettru li jeħtieġu biex jintroduċu l-5G u biex iħeġġu lill-operaturi jinvestu aktar fil-kopertura tal-5G. Is-Sett ta’ Għodod għall-Konnettività huwa r-riżultat ta’ skambji bejn l-Istati Membri, f’kooperazzjoni mal-Kummissjoni, wara r-Rakkomandazzjoni tal-Kummissjoni. 

Ir-Rakkomandazzjoni dwar is-Sett ta’ Għodod għall-Konnettività

F’Settembru 2020, il-Kummissjoni adottat Rakkomandazzjoni li tistieden lill-Istati Membri jagħtu spinta lill-investiment f’infrastruttura ta’ konnettività tal-broadband b’kapaċità għolja ħafna, inklużi l-fibra u l-5G. L-għan tar-Rakkomandazzjoni huwa li l-Istati Membri jiżviluppaw Sett ta’ Għodod tal-aħjar prattiki għat-tnaqqis tal-kost tal-introduzzjoni tan-networks tal-komunikazzjoni elettronika u għall-aċċess effiċjenti għall-ispettru tar-radju tal-5G. L-Istati Membri se jaqsmu l-esperjenzi tagħhom ma’ xulxin sabiex jiffukaw l-azzjonijiet tagħhom fuq miżuri li jaħdmu l-aħjar fit-tnedija ta’ networks avvanzati.

Grupp Speċjali dwar il-Konnettività

Il-Grupp Speċjali dwar il-Konnettività, magħmul minn rappreżentanti tal-Istati Membri responsabbli fil-qasam tal-komunikazzjoni elettronika u l-Kummissjoni kif stabbilit fit-termini ta’ referenza tiegħu (.pdf), għandu l-għan li jassisti lill-Istati Membri fl-identifikazzjoni u l-qbil dwar l-aħjar prattiki, u, fuq talba, fl-implimentazzjoni u r-rapportar tas-Sett ta’ Għodod.

Il-Grupp Speċjali dwar il-Konnettività ġie stabbilit f’Ottubru 2020 bħala pjattaforma ta’ kooperazzjoni. Huwa appoġġat minn żewġ sottogruppi:

• sottogrupp dwar it-tnaqqis tal-kost tal-introduzzjoni tan-networks tal-komunikazzjoni elettronika
• sottogrupp iffukat fuq l-aċċess għall-ispettru tar-radju tal-5G 

Il-Grupp Speċjali dwar il-Konnettività huwa kopresedut minn rappreżentant tal-Presidenza attwali tal-Kunsill u rappreżentant tal-Presidenza li jmiss tal-Kunsill, kif ukoll minn rappreżentant tal-Kummissjoni, li qed jaġixxi wkoll bħala s-segretarjat tal-Grupp.

Il-Grupp Speċjali dwar il-Konnettività qed jinvolvi ruħu, fejn xieraq, mal-Grupp għall-Politika dwar l-Ispettru tar-Radju (RSPG), il-Korp ta’ Regolaturi Ewropej jew Komunikazzjonijiet Elettroniċi (BEREC), l-awtoritajiet regolatorji nazzjonali (NRAs), in-network tal-Uffiċċji ta’ Kompetenza fil-Broadband (in-network BCO) u l-awtoritajiet kompetenti inkarigati mill-funzjonijiet tal-punt uniku tal-informazzjoni. Il-lista tal-membri tal-Grupp Speċjali dwar il-Konnettività (.pdf) hija disponibbli.

­­­­-Kalendarju u riżultati ewlenin

Ir-Rakkomandazzjoni tas-Sett ta’ Għodod għall-Konnettività tistabbilixxi stadji importanti ċari li għandhom jintlaħqu mill-Istati Membri f’kooperazzjoni mill-qrib mal-Kummissjoni:

1. Sal-20 ta’ Diċembru 2020: L-Istati Membri jidentifikaw u jikkondividu bejniethom u mal-Kummissjoni l-aħjar prattiki fit-tnaqqis tal-kost u fiż-żieda tal-veloċità tal-introduzzjoni ta’ networks b’kapaċità għolja ħafna, kif ukoll fl-iżgurar ta’ aċċess f’waqtu u faċli għall-investiment għall-ispettru tar-radju tal-5G. Fit-18 ta’ Diċembru 2020, il-Grupp Speċjali dwar il-Konnettività adotta rapport li jiġbor l-informazzjoni kollha dwar l-aħjar prattiki pprovduti mill-Istati Membri.
2. Sat-30 ta' Marzu 2021: L-Istati Membri jaqblu dwar Sett ta’ Għodod tal-Unjoni tal-aħjar prattiki dwar il-Konnettività.
3. Sat-30 ta' April 2021: L-Istati Membri jipprovdu lill-Kummissjoni bi pjanijiet direzzjonali għall-implimentazzjoni tas-Sett ta’ Għodod.
4. Sat-30 ta' April 2022: L-Istati Membri jikkondividu r-rapporti ta’ implimentazzjoni dwar il-miżuri fis-Sett ta’ Għodod għall-Konnettività. Il-Kummissjoni ppubblikat ħarsa ġenerali lejn l-istat tal-implimentazzjoni.