Getty Images - 1158778963 - Tero Vasalainen
Ina Phlean Meán agus Closamhairc, chinn an Coimisiún ‘tionscnamh nuachta’ a sheoladh, lena gclúdaítear gníomhaíochtaí atá ann cheana agus gníomhaíochtaí nua agus tacaíocht d’earnáil na meán nuachta. Féachann an tionscnamh seo ar bhealach iomlánaíoch ar na dúshláin atá os comhair thionscal na meán nuachta agus tugann sé freagairt chomhleanúnach, lena dtugtar le chéile ionstraimí éagsúla beartais agus cistiúcháin faoi mheirge choiteann.
Is féidir leis na meáin agus gairmithe a bhfuil suim acu i ndeiseanna maoinithe cuairt a thabhairt ar an uirlis idirghníomhach seo. I gcás inarb ábhartha, cuireann an Coimisiún clásal neamhspleáchais sna conarthaí a síníodh faoin tionscnamh seo ionas go n-oibreoidh tairbhithe le neamhspleáchas eagarthóireachta iomlán.
Tá sé beartaithe ag an gCoimisiún tacú leis na meáin nuachta tríd an méid seo a leanas:
- idirphlé struchtúrtha
- iomaíochas a fheabhsú
- an nuálaíocht a scaoileadh
- daonlathas a chothú
Idirphlé struchtúrtha
Bíonn an Coimisiún i mbun malartuithe rialta leis an tionscal chun oibriú i dtreo clár oibre nuálaíochta sna meáin nuachta a chuideoidh leis an earnáil a bheith rathúil sa gheilleagar digiteach agus sa tsochaí dhigiteach.
Chuige sin, sheol an Coimisiún Fóram Eorpach na Meán Nuachta (ENMF) chun idirphlé a chothú ar bhonn rialta le heagraíochtaí na meán nuachta, le gairmithe, le hionadaithe na sochaí sibhialta agus le heagraíochtaí idirnáisiúnta.
Beidh an ENMF ar siúl faoi dhó sa bhliain. Déantar iniúchadh sa seisiún bliantúil san earrach ar ábhair a bhaineann le saoirse agus iolrachas na meán. Breathnaítear sa seisiún bliantúil san fhómhar ar ghnéithe gnó agus ar chlaochlú tionsclaíoch. Tionóladh an chéad eagrán de ENMF i mí an Mhárta, inar díríodh ar shábháilteacht iriseoirí.
Iomaíochas a fheabhsú
Tá sé mar aidhm ag an gCoimisiún rochtain níos fearr ar mhaoiniú a éascú chun tacú le claochlú agus iomaíochas na hearnála. Déanfaidh sé amhlaidh trí rochtain ar iasachtaí a éascú (le tacaíocht ó ráthaíocht InvestEU), agus trí infheistíocht a fheabhsú. Tá sé mar aidhm ag an gCoimisiún scéim phíolótach atá bunaithe ar chothromas a bhunú trí InvestEU, lena gcomhinfheisteofar cistí ó dhaonchairde, ó fhondúireachtaí agus ó chomhpháirtithe príobháideacha eile chun tacú le hearnáil na meán nuachta agus tuilleadh. Comhlánófar na gníomhaíochtaí sin le seirbhísí forbartha acmhainní, amhail oiliúint chun eolas ar earnáil na meán a mhéadú i measc infheisteoirí agus chun tacú le hullmhacht infheistíochta i measc eagraíochtaí meán.
Cuirfidh an Coimisiún tacaíocht ar fáil chun comhoibriú a chothú ar fud na meán nuachta trí dheontais don Eoraip Chruthaitheach. Leis na deontais sin, ar a dtugtar ‘comhpháirtíochtaí turasóireachta’, spreagfar samhlacha gnó inmharthana a thástáil, trí chaighdeáin ghnó agus eagarthóireachta a fhorbairt, trí iriseoireacht chomhoibríoch agus trasteorann, oiliúint agus soghluaisteacht gairmithe a chur chun cinn, agus trí dhea-chleachtais a chomhroinnt.
Comhlánaíonn na bearta tacaíochta sin tionscnaimh dhlíthiúla eile a d’fhéadfadh iomaíochas agus bonn airgeadais na hearnála a neartú, amhail Treoir Sheirbhísí na Meán Closamhairc (AVMSD), an Treoir maidir le Cóipcheart sa Mhargadh Aonair Digiteach, an Ionstraim um Sheirbhísí Digiteacha, an Ionstraim um Margaí Digiteacha agus an Rialachán Ginearálta maidir le Cosaint Sonraí.
Ina theannta sin, tugann Saoráid Téarnaimh agus Athléimneachta an Aontais deis do na Ballstáit infheistíocht a dhéanamh in aistrithe digiteacha agus glasa an tionscail agus athléimneacht an tionscail a neartú. Le gach Plean Náisiúnta Téarnaimh agus Athléimneachta, cuirtear íosleibhéal 20 % den chaiteachas ar fáil don earnáil dhigiteach, lena n-áirítear bearta chun borradh a chur faoi tháirgeadh agus faoi dháileadh ábhair dhigitigh, a bhféadfadh na meáin dhigiteacha a bheith san áireamh iontu.
An nuálaíocht a scaoileadh
Chun a bheith níos nuálaí agus níos iomaíche, beidh ar chuideachtaí meán nuachta na hEorpa bealaí nua a aimsiú chun ioncam a mhéadú agus samhlacha gnó tarraingteacha a thógáil. Chuige sin, beidh ardstraitéisí sonraí, uirlisí nua agus comhroinnt eolais ag teastáil.
Tá sé beartaithe ag an gCoimisiún aghaidh a thabhairt air sin trí ‘spás sonraí meán’ Eorpach a chothú. D’fhéadfaí a áireamh leissin feidhmchláir sonraí, bonneagair sonraí, straitéisí idir-inoibritheachta sonraí agus uirlisí úrscothacha chun na sonraí a bhainistiú agus a phróiseáil. Cuireann an tionscnamh leis an Straitéis Eorpach maidir le Sonraí agus maoinítear é tríd an gclár Fís Eorpach agus an Clár don Eoraip Dhigiteach (DEP).
Tacóidh Fís Eorpach le feidhmchláir agus teicneolaíochtaí nuálacha i réimse na meán. Le hinfheistíochtaí i gcomhpháirteanna meán bonneagair modúlach agus foinse oscailte, d’fhéadfaí teacht chun cinn samhlacha nua gnó agus an glacadh atá leo ag meáin thraidisiúnta agus ag meáin nua a éascú, rud a d’fheabhsódh rochtain na saoránach ar fhaisnéis a fhaightear go forleathan.
Chun treochtaí sna meáin a fhiosrú agus a réamh-mheas, soláthróidh an Coimisiún Eorpach tuarascáil freisin, ‘Ionchas Thionscal na Meán’, gach dhá bhliain.
Daonlathas a chothú
Ní féidir leis na meáin feidhmiú i gceart gan an tsaoirse agus an t-iolrachas, rud atá ina choinníoll riachtanach don daonlathas a chumhdaítear leis an gCairt Eorpach um Chearta Bunúsacha.
Tá ról ag an gCoimisiún maidir lena chinntiú go gcloítear leis na prionsabail sin. Tá tacaíocht á cur ar fáil aige do ghníomhaíochtaí sa réimse sin. Mar shampla, trí fhaireachán a dhéanamh ar iolrachas agus úinéireacht na meán, trí chomhairle dlí a chur ar fáil d’iriseoirí, agus trí chaighdeáin cháilíochta na meán agus féinrialáil a spreagadh. Faoin bPlean Gníomhaíochta um an Daonlathas Eorpach a fógraíodh le déanaí, eiseoidh an Coimisiún Moladh maidir le sábháilteacht iriseoirí agus cuirfidh sé tionscnamh i láthair chun iriseoirí agus an tsochaí shibhialta a chosaint ar chásanna dlí straitéiseacha lena gcoiscfear rannpháirtíocht an phobail in 2021.
Chun na gníomhaíochtaí sin agus na rialacha reatha maidir leis na meáin a chomhlánú, tá an Coimisiún ag obair ar Ghníomh nua Eorpach um Shaoirsena Meán, a mhéadóidh trédhearcacht, neamhspleáchas agus cuntasacht gníomhaíochtaí a dhéanann difear do rialú agus do shaoirse an phreasa agus a chabhróidh le rialachas na meán poiblí a neartú.
Is mian leis an gCoimisiún réimse poiblí bríomhar agus éagsúil a spreagadh, ina bhfuil rochtain ag saoránaigh ar fhaisnéis iontaofa faoin Aontas Eorpach. Tá tacaíocht do léiriú agus scaipeadh neamhspleách ábhair nuachta ar ghnóthaí an Aontais ar fáil trí na Gníomhartha Ilmheáin. Ina theannta sin, tacaíonn an Coimisiún le tionscadail nuachta nuálacha tharraingteacha a fhorbairt d’Eorpaigh óga.
Ar deireadh, tá gá le litearthacht láidir sna meáin chun daonlathas folláin a bhaint amach. Tacóidh an Coimisiún le bosca uirlisí a fhorbairt i gcomhar le Grúpa Eorpach na Rialálaithe Closamhairc (ERGA), leanfaidh sé den tseachtain Eorpach um Litearthacht sna Meáin agus cuirfidh sé leis an maoiniú don litearthacht sna meáin, chun cabhrú le saoránaigh de gach aois dul i ngleic leis an timpeallacht nuachta nua-aimseartha, cinntí eolasacha a dhéanamh agus a bheith in ann aghaidh a thabhairt ar bhagairtí na bréagaisnéise.