iStock photo Getty Images plus
Seo mar a labhair an Leas-Uachtarán um Luachanna agus um Thrédhearcacht, Věra Jourová:
Tá sé ag éirí níos deacra a thuiscint cé leis na meáin in AE. Ní hamhlaidh atá, toisc go bhfuil sé tuillte ag daoine sa daonlathas fios a bheith acu cé a chuireann faisnéis ar fáil dóibh. Cuideoidh an uirlis nua seo le tuiscint a fháil ar mhargadh na meán agus ar thionscnaimh bheartais amach anseo.
Dúirt Thierry Breton, an Coimisinéir um an Margadh Inmheánach:
Mar phríomhcholún dár ndaonlathais, tá sé ríthábhachtach aghaidh a thabhairt ar na bagairtí atá ann cheana ar na meáin neamhspleácha agus aird a tharraingt orthu. Táimid meáite i gcónaí ar thionscnaimh nua amhail an tAcht um Shaoirse na Meán a chur i láthair agus ár dtacaíocht a mhéadú do thionscadail a chuireann trédhearcacht san earnáil chun cinn.
Beidh an uirlis nua seo ina bonn eolais do mheasúnuithe beartais agus rialála agus do thionscnaimh atá dírithe ar thacú le saoirse agus iolrachas na meán. Tabharfaidh sé léargas ar an áit a bhfuil úinéireacht na meán, rud a fhágfaidh go mbeidh saincheisteanna comhchruinnithe a d’fhéadfadh a bheith ann níos infheicthe agus, ar an gcaoi sin, cuirfidh sé leis an tuiscint ar mhargadh na meán. Is é EUR 1 mhilliún an tacaíocht a thugann an tAontas don tionscadal agus meastar go mairfidh an tionscadal go dtí mí Mheán Fómhair 2022.
Thairis sin, foilseofar an dara glao ar thograí sna seachtainí amach romhainn. Roghnaíodh tairbhithe an treoirthionscadail seo tar éis glao ar thograí, dírithe ar pháirtithe leasmhara atá ag obair i réimse shaoirse agus iolrachas na meán ar leibhéal Eorpach, réigiúnach agus áitiúil. Tá an tionscnamh seo mar chuid d’iarracht níos leithne i réimse shaoirse agus iolrachas na meán, mar a leagtar amach sa Phlean Gníomhaíochta um an Daonlathas Eorpach.