Eoraip na Cruthaitheachta MEDIA — Tacú le beartas closamhairc Eorpach iomlánaíoch

Is é is aidhm don chlár MEDIA beartas closamhairc Eorpach iomlánaíoch a chur chun cinn. Déanfaidh sé amhlaidh trí idirphlé rialála, trí anailís agus sonraí a chomhroinnt, trí fhaisnéis réamhbhreathnaitheach maidir le treochtaí san éiceachóras closamhairc, trí chomhairliúchán le páirtithe leasmhara, agus trí ghníomhaíochtaí cur chun cinn agus for-rochtana.

Mar fhreagairt ar dhúshláin an chlaochlaithe dhigitigh agus na forbartha inbhuanaithe, tabharfar aird ar leith ar a áirithiú go mbainfear leas iomlán as acmhainneacht an chlaochlaithe dhigitigh. Áirítear leis sin glasú an tionscail a chothú agus cuimsiú, comhionannas, éagsúlacht agus rannpháirtíocht a spreagadh.

Faoin gcnuasach beartais, saothrófar na cuspóirí seo a leanas:

• tacaíocht a thabhairt do ghníomhaíochtaí nuálacha beartais agus do mhalartú dea-chleachtas trí bhailiú sonraí agus staidéir réamhbhreathnaitheacha lenar féidir léargas a thabhairt ar threochtaí amach anseo san éiceachóras closamhairc;
• rannpháirtíocht geallsealbhóirí, gníomhaíochtaí scaipthe agus feachtais feasachta a bhaineann le hábhar Eorpach a chur chun cinn.

Chun na cuspóirí thuas a bhaint amach, maoineofar na gníomhaíochtaí seo a leanas:

• Anailís agus sonraí margaidh agus dlí ar ardchaighdeán: ballraíocht san Fhaireachlann Eorpach Chlosamhairc agus comhoibriú léi chun tacú le trédhearcacht agus le rochtain chomhionann ar fhaisnéis dhlíthiúil agus airgeadais/margaidh agus chun rannchuidiú le hinchomparáideacht faisnéise dlíthiúla agus staidrimh.
• Lorgófar cur i bhfeidhm iomchuí chreat rialála an Aontais trí chomhairle maidir le cur chun feidhme Threoir AVMS mar aon le comhar i measc comhlachtaí rialála náisiúnta trí Ghrúpa na Rialálaithe Eorpacha um Sheirbhísí Meán Closamhairc. 
• Déanfar staidéar ar neamhspleáchas rialtóirí na meán i mBallstáit an Aontais toisc go bhfuil siad ríthábhachtach chun caighdeáin inneachair a fhorfheidhmiú go héifeachtach.
• Staidéir ardleibhéil ad hoc le haghaidh faisnéis maidir le treochtaí an éiceachórais chlosamhairc amach anseo: cur chuige iomlánaíoch agus freagairtí beartais leordhóthanacha ar dhúshláin an tionscail closamhairc a chur chun cinn.
• Malartuithe beartais agus comhar i bpríomhréimsí: le saineolaithe agus rialtóirí na mBallstát chun tosaíochtaí beartais a phlé in Eoraip na Cruthaitheachta MEDIA, go háirithe i réimsí na rochtana ar mhaoiniú, na gclaochluithe digiteacha agus glasa chomh maith leis an éagsúlacht agus an chothromaíocht inscne.
• Cumarsáid, abhcóideacht agus rannpháirtíocht leis an tionscal agus le saoránaigh chun infheictheacht thorthaí an chláir a áirithiú, agus ar an gcaoi sin forbairt na hearnála closamhairc a struchtúrú ar an leibhéal Eorpach. Áirítear ar na gníomhaíochtaí go háirithe malartuithe rialta leis an tionscal, gníomhaíochtaí for-rochtana lucht féachana agus feachtais feasachta chun seoda Eorpacha a thaispeáint trí Dhuaiseanna Eorpacha amhail Gradam Lucht Féachana LUX Pharlaimint na hEorpa agus Gradam Scannánaíochta na hEorpa. Áireofar ar na gníomhaíochtaí sin oidhreacht scannánaíochta na hEorpa a chur chun cinn trí leanúint den tionscadal Season of Classic a tionscnaíodh in 2019. Ar deireadh, tacófar le feachtais abhcóideachta a mbeidh baint ag an eagraíocht ábhartha uile-Eorpach leo agus cuirfear béim ar an méid a chuireann an t-éiceachóras closamhairc le comhdhlúthú luachanna Eorpacha.