Barrfheabhas IS: Coinníollacha cumasúcháin maidir le forbairt agus glacadh IS

Tá sócmhainní láidre ag an Aontas chun éiceachóras rathúil nuathionscanta agus nuálaíochta a chruthú don intleacht shaorga. Agus méadú ag teacht ar líon na ngnólachtaí nuathionscanta, na n-ollscoileanna agus na n-ionad taighde IS atá ag fás go tapa, tá oideachas ardcháilíochta, díorma cumasach taighdeoirí agus bonn láidir eolaíoch ag an Eoraip.

Sa Teachtaireacht maidir le borradh a chur faoi ghnólachtaí nuathionscanta agus faoin nuálaíocht in IS iontaofa, leagtar amach gníomhaíochtaí agus infheistíochtaí do na blianta atá le teacht. Is é is aidhm dó gnólachtaí nuathionscanta agus tionscail an Aontais a chumhachtú chun a n-acmhainneacht a chomhlíonadh maidir le bheith ina gceannródaithe domhanda i bhforbairt ardsamhlacha, ardchóras agus ardfheidhmchlár intleachta saorga iontaofa.

Léargais bheartais a fháil, a chomhthiomsú agus a chomhroinnt

Braitheann forbairt agus glacadh rathúil IS ar roinnt coinníollacha. Tá gá le creat rialachais agus comhordaithe atá éifeachtúil agus feidhmiúil chun barainneachtaí scála a fhorbairt agus chun sineirgí a éascú. Chomh maith leis sin, tá gá le sonraí móra, ardcháilíochta agus slána, mar aon leis an mbonneagar ríomha chun na sonraí sin a stóráil, a anailísiú agus a phróiseáil.

Is féidir le comhroinnt eolais agus léargais bheartais, agus comhordú gníomhaíochtaí beartais agus infheistíochtaí a bheith ina mbuntáiste iomaíoch tábhachtach. Tá sé sin fíor go háirithe i gcás limistéar den sórt sin atá ag forbairt go tapa mar IS. Ó 2018 i leith, tá iarrachtaí suntasacha déanta ag na Ballstáit uile chun straitéisí náisiúnta maidir leis an intleacht shaorga a fhorbairt nó chun gné na hintleachta saorga a áireamh sna straitéisí agus sna cláir atá ann cheana. D’éascaigh a gcuid oibre machnamh struchtúrtha ar na tosaíochtaí agus na cuspóirí maidir le forbairt agus glacadh IS. Agus spreag sé díospóireacht phoiblí níos leithne i roinnt mhaith Ballstát.

Is é is aidhm do ghníomhaíochtaí an Choimisiúin sa réimse seo:

• na buntáistí a bhaineann le straitéisí náisiúnta a uasmhéadú agus dlús a chur leis na gníomhaíochtaí atá beartaithe
• leas iomlán a bhaint as saineolas teicniúil na ngrúpaí saineolaithe maidir leis an intleacht shaorga arna n-éascú ag an gCoimisiún Eorpach, amhail an Grúpa Ardleibhéil Saineolaithe um an Intleacht Shaorga
• malartuithe agus comhar a neartú trí Ghrúpa na mBallstát um an Intleacht Shaorga agus um Thionscal na hEorpa a Dhigitiú.

Tapáil ar phoitéinseal na sonraí

Tá dhá phríomhspreagadh ann a chuirfidh borradh faoin nuálaíocht:

1. Bhunaigh an Coimisiún "Monarchana IS "Chun ceannaireacht ghnólachtaí nuathionscanta na hEorpa a neartú agus chun teacht chun cinn éiceachóras iomaíoch IS san Aontas a spreagadh. Is éiceachórais oscailte iad sin atá bunaithe ar shár-ríomhairí poiblí Eorpacha agus lena dtugtar le chéile na príomhacmhainní ábhartha agus daonna is gá chun samhlacha agus feidhmchláir intleachta saorga giniúnaí a fhorbairt. Áirítear ar Mhonarchana IS sár-ríomhairí atá tiomnaithe don intleacht shaorga, lárionaid sonraí ghaolmhara – i ngaireacht do líonraí ardluais nó nasctha leo – agus an caipiteal daonna chun na hacmhainní sin a úsáid go héifeachtach. Dá bhrí sin, tugann siad saineolaithe sár-ríomhaireachta agus IS, speisialtóirí sonraí, taighdeoirí, gnólachtaí nuathionscanta agus úsáideoirí deiridh le chéile.
2. Leis an tionscnamh ‘GenAI4EU’, spreagfar glacadh na hintleachta saorga giniúnaí ar fud phríomhéiceachórais thionsclaíocha straitéiseacha an Aontais, rud a thacóidh leis na conairí aistrithe a leagtar amach i Straitéis Tionsclaíochta an Aontais. Le ‘GenAI4EU’, spreagfar forbairt éiceachóras nuálaíochta oscailte mór lena gcothófar comhar idir gnólachtaí nuathionscanta IS agus úsáideoirí gairmiúla IS sa tionscal agus san earnáil phoiblí.

Áireofar leis sin feidhmeanna tionsclaíocha (amhail monaraíocht), agus léiriú á thabhairt ag an am céanna ar thiomantas an Aontais a gheilleagar a ghlasú agus aghaidh a thabhairt ar an athrú aeráide. Bainfidh príomhréimsí feidhme ‘GenAI4EU’ tairbhe as na ‘Monarchana IS’ agus as na sonraí ábhartha ardcháilíochta snaSpásanna Coiteanna Sonraí Eorpacha.

Tacóidh an tionscnamh le forbairt príomhfheidhmchlár lena ngiarálfar IS giniúnach chun feabhas a chur ar a bhfeidhmíocht nó ar a gcumais. Déanfaidh anOifig Eorpach um Intleacht Shaorganuabhunaithe faireachán ar an dul chun cinn maidir leis na feidhmchláir straitéiseacha sin a fhorbairt trí spriocanna nithiúla cur chun feidhme.

Beidh an ghníomhaíocht faireacháin sin nasctha leis an measúnú a dhéanfar tríd an Ardán Eorpach um Chonairí Aistrithe.