112 imsaħħa bl-aħħar teknoloġija
Sejħa għall-112 tista’ tingħata spinta bl-aħħar teknoloġija, mhux disponibbli 30 sena ilu. Il-Kummissjoni tappoġġa l-aġġornament teknoloġiku tal-komunikazzjonijiet ta’ emerġenza. Pereżempju, l-implimentazzjoni tal-Lokazzjoni Mobbli Avvanzata, jew AML, ġiet iffinanzjata fi 10-il Stat Membru permezz tal-proġetti HELP112 u HELP112 II. F’ 10 sena, l-AML tista’ potenzjalment issalva aktar minn 10,000 ħajja fl-UE.
L-identifikazzjoni preċiża tal-post ta’ min ikun qed iċempel u t-trażmissjoni tiegħu malajr lis-servizzi ta’ emerġenza jistgħu jikkontribwixxu biex jiffrankaw il-ħin li jieħu biex jintervjeni f’mumenti prezzjużi bħal dawn. Meta min iċempel iċempel 112 mill-ismartphone tiegħu, l-AML tuża l-funzjonalitajiet integrati tat-telefown u d-data mis-sistema ta’ navigazzjoni bis-satellita Galileo tal-UE, biex tidentifika b’mod preċiż il-post fejn jinsab min qed iċempel u tittrażmettiha lis-servizzi ta’ emerġenza. L-AML hija disponibbli fi 19-il Stat Membru, fl-Iżlanda u fin-Norveġja. Il-Kummissjoni tħeġġeġ lill-Istati Membri biex jimplimentaw malajr din it-teknoloġija li ssalva l-ħajja, f’konformità mal-Kodiċi Ewropew għall-Komunikazzjonijiet Elettroniċi. Sabiex jiġu żgurati l-kundizzjonijiet tekniċi t-tajbin għal detezzjoni preċiża u rapida tal-lokalizzazzjoni f’sitwazzjoni ta’ emerġenza, il-Kummissjoni adottat Regolament Delegat, li se japplika mit-22 ta’ Marzu 2022. Il-manifatturi tal-ismartphones se jkunu obbligati jiżguraw li d-data mis-Sistemi Globali ta’ Navigazzjoni bis-Satellita (GNSS), tal-anqas mill-Galileo tal-UE, u li d-data mill-Wi-Fi, tkun disponibbli fil-komunikazzjonijiet ta’ emerġenza. Dan jiżgura li min iċempel ikun lokalizzat b’mod preċiż u rapidu.
L-iżgurar li l-Ewropej iħossuhom kunfidenti li jistgħu faċilment jilħqu s-servizzi ta’ emerġenza fi kwalunkwe post fl-UE huwa kruċjali biex ikunu jistgħu jsiru komunikazzjonijiet effettivi ta’ emerġenza. Il-Kummissjoni tkompli tissorvelja mill-qrib l-implimentazzjoni tal-112 fl-Istati Membri, permezz ta’ rapporti regolari.